ഗുരുവായൂരിൽ പാൽപായസം വിതരണം; പ്രശസ്ത ഗായകൻ പി. ഉണ്ണികൃഷ്ണൻ ഉദ്ഘാടനം ചെയ്തു

ഗുരുവായൂർ: മലയാള സിനിമയുടെ മഹാനടനും പ്രിയപ്പെട്ട നടനുമായ മമ്മുട്ടിയുടെ പിറന്നാൾ ദിനമായ ഇന്ന്, ഗുരുവായൂരപ്പന് സമർപ്പിതമായ പാൽപായസം വഴിപാട് നടത്തി. ക്ഷേത്ര നടയിൽ ഭക്തജനങ്ങൾക്ക് പാൽപായസം വിതരണം ചെയ്ത് വിശിഷ്ടമായ ആഘോഷ നിമിഷം പങ്കുവച്ചു.

മമ്മുട്ടിയുടെ ആയുരാരോഗ്യ സൗഖ്യത്തിനായി, സുഹൃത്തും ഗുരുവായൂരിലെ സാംസ്കാരിക പ്രവർത്തകനുമായ ബാബുരാജ് ഗുരുവായൂർ വഴിപാടുകൾ അർപ്പിച്ചു. ഗുരുവായൂരപ്പന്റെ പാൽപായസം മമ്മൂട്ടിക്ക് ഏറെ പ്രിയപ്പെട്ടതാണെന്നും, പല തവണ തന്നെ മഹാനടന് പാൽപായസം എത്തിച്ചു നൽകിയിട്ടുണ്ടെന്നും ബാബുരാജ് അറിയിച്ചു.

പ്രശസ്ത പിന്നണി ഗായകനും ദേശീയ അവാർഡ് ജേതാവുമായ ശ്രീ. പി. ഉണ്ണികൃഷ്ണൻ, മമ്മൂട്ടിക്ക് പിറന്നാളാശംസകൾ നേർന്ന് പായസവിതരണം ഉദ്ഘാടനം ചെയ്തു. സംഗീതലോകത്ത് പ്രശസ്തയായ അദ്ദേഹത്തിന്റെ മകൾ ഉത്തരയും ചടങ്ങിൽ പങ്കുചേർന്ന് ആശംസകൾ അറിയിച്ചു.

ഗുരുവായൂർ നഗരസഭ പ്രതിപക്ഷ നേതാവ് ശ്രീ. കെ.പി. ഉദയൻ, ഡോ. കെ. മണികണ്ഠൻ (ഗുരുവായൂർ), മാധ്യമ പ്രവർത്തകൻ കലൂർ ഉണ്ണികൃഷ്ണൻ, ബാബുരാജ് ഗുരുവായൂർ എന്നിവർ ചടങ്ങിൽ പങ്കെടുത്ത് മമ്മൂട്ടിയുടെ ജന്മദിനത്തിൽ ഹൃദയം നിറഞ്ഞ ആശംസകൾ നേർന്നു സംസാരിച്ചു.

മേൽപ്പത്തൂർ ഓഡിറ്റോറിയത്തിൽ ഹൃദയസ്പർശിയായ അരങ്ങേറ്റം

ഗുരുവായൂർ: വർഷങ്ങളുടെ ഇടവേളയ്ക്കു ശേഷം ഗുരുവായൂരിലെ മേൽപ്പത്തൂർ ഓഡിറ്റോറിയം സാക്ഷിയായത് ഹൃദയസ്പർശിയായൊരു നൃത്താവിഷ്കാരത്തിനാണ്. കണ്ണന്റെ സന്നിധാനത്ത് അമ്മമാർ വീണ്ടും ചിലങ്ക അണിഞ്ഞ്, താളത്തിനൊത്ത് കാൽ പതിച്ച്, മനോഹരമായൊരു നൃത്താവിസ്മയം പ്രേക്ഷകർക്ക് സമ്മാനിച്ചു.

ഗുരു സുനിൽകുമാർ കല്ലാട്ടിന്റെ നേതൃത്വത്തിൽ പ്രവർത്തിക്കുന്ന ശ്രീ ഭഗവതി നൃത്ത വിദ്യാലയത്തിലെ കുട്ടികളുടെ നൃത്ത അരങ്ങേറ്റത്തിന്റെ ഭാഗമായി അമ്മമാരുടെ ഈ അവതരണം സംഘടിപ്പിക്കപ്പെട്ടു. കുട്ടികളുടെ ആദ്യ അരങ്ങേറ്റത്തിനൊപ്പം അമ്മമാരുടെ ഈ നിർത്താവിഷ്കാരം, ഒരു പ്രത്യേക തനിമ നൽകി.

ഇന്ന് വൈകീട്ട് ക്ഷേത്രത്തിലെ ശീവേലിക്ക് ശേഷമാണ് മേൽപ്പത്തൂർ ഓഡിറ്റോറിയത്തിൽ വേദി നിറഞ്ഞത്. ഗുരുവായൂരിൽ വർഷങ്ങളായി തിരുവാതിരകളി അവതരിപ്പിച്ചു വരുന്ന കൃഷ്ണാമൃതം തിരുവാതിരക്കളി സംഘം അംഗങ്ങളാണ് ഈ പരിപാടിയുടെ ആത്മാവ്. ഇവരുടെ അവതരണം പ്രേക്ഷകർക്കു പഴയ ഓർമ്മകളുടെ മണിമുഴക്കമായി.

ഗുരുവായൂർ ഉത്സവങ്ങൾക്ക് വർഷംതോറും ഇവർ തിരുവാതിരകളി അവതരിപ്പിക്കാറുണ്ട്. ഏറെകാലത്തിനുശേഷം കണ്ണന്റെ മുമ്പിൽ ചിലങ്കയണിഞ്ഞ് അരങ്ങേറിയതായിരുന്നു ഇന്നത്തെ പ്രത്യേകത. അമ്മമാർ ഒരുമിച്ചിറങ്ങിയപ്പോൾ, വേദിയിലെ കലാരൂപത്തിന് അതിന്റെ സമ്പൂർണ ഭംഗി വീണ്ടെടുക്കാനായി.

ബിന്ദു നാരായണന്റെ നേതൃത്വത്തിൽ പ്രസന്ന ബാബു, ദീപ രാധാകൃഷ്ണൻ, പഞ്ചമി, സ്മിത, ഷീന പ്രേംകുമാർ, അനു, ചിത്ര എന്നിവരുടെ ചുവടുകളാണ് വേദി തെളിച്ചെടുത്തത്. ഓരോ ചുവടിലും കലാപ്രേമവും ഭക്തിയും നിറഞ്ഞിരുന്നു. പ്രേക്ഷകർ കൈയടികളിലൂടെ അതിനെ സ്വീകരിക്കുകയും അഭിനന്ദിക്കുകയും ചെയ്തു.
ഈ അവതരണം, കലയും ഭക്തിയും ഒരുമിച്ചപ്പോൾ ഉണ്ടാകുന്ന ആത്മീയാനുഭവത്തിന്റെ മികച്ച ഉദാഹരണമായി. ഗുരുവായൂരിന്റെ കലാപാരമ്പര്യത്തിനും ഭക്തിസാംസ്കാരിക പൈതൃകത്തിനും ഇത് പുതുജീവൻ നൽകിയിരിക്കുന്നു. ഇവർക്ക് ഇനിയും കൂടുതൽ വേദികളിൽ നൃത്തം അവതരിപ്പിക്കാൻ ഭഗവാൻ അനുഗ്രഹിക്കുമാറാകട്ടെ….