ഗുരുവായൂർ: സംസ്ഥാനത്തിലെ ദേവസ്വം ബോർഡുകളിൽ നടക്കുന്ന സ്വർണ്ണക്കൊളളയും ഗുരുതര ക്രമക്കേടുകളും വെളിവാകുന്ന സാഹചര്യത്തിൽ വിശ്വാസം സംരക്ഷിക്കണമെന്നും കുറ്റക്കാരെ ശിക്ഷിക്കണമെന്നും ആവശ്യപ്പെട്ട് കേരള പ്രദേശ് കോൺഗ്രസ്സ് കമ്മറ്റിയുടെ നേതൃത്വത്തിൽ സംഘടിപ്പിക്കുന്ന ‘വിശ്വാസ സംരക്ഷണ ജാഥ’ ഇന്ന് (ഒക്ടോബർ 14) പാലക്കാട് ജില്ലയിൽ നിന്ന് ആരംഭിക്കുന്നു.

കോൺഗ്രസ്സ് പ്രവർത്തക സമിതി അംഗം കൊടിക്കുന്നിൽ സുരേഷ് എം.പി. ക്യാപ്റ്റനായും, കെ.പി.സി.സി രാഷ്ട്രീയ കാര്യ സമിതി അംഗം ടി.എൻ. പ്രതാപൻ മുൻ എം.പി. വൈസ് ക്യാപ്റ്റനായും നേതൃത്വം നൽകുന്ന ഈ ജാഥ ഒക്ടോബർ 15 ബുധനാഴ്ച ഉച്ചതിരിഞ്ഞ് 3 മണിക്ക് ഗുരുവായൂർ പടിഞ്ഞാറെ നടയിൽ എത്തിച്ചേരും.

പടിഞ്ഞാറെ നടയിലെ സ്വീകരണ സമ്മേളനം എ.ഐ.സി.സി ജനറൽ സെക്രട്ടറി ദീപദാസ് മുൻഷി ഉദ്ഘാടനം ചെയ്യും. ഡി.സി.സി പ്രസിഡൻറ് അഡ്വ. ജോസഫ് ടാജറ്റ് അദ്ധ്യക്ഷത വഹിക്കും. കെ.പി.സി.സി, ഡി.സി.സി നേതാക്കൾ പ്രസംഗിക്കും..

ശബരിമല ക്ഷേത്രത്തിലെ ദ്വാരപാലക ശിൽപ്പത്തിലെ സ്വർണ്ണ പാളികൾ, കട്ടിളപ്പടി അടക്കമുള്ള അമൂല്യ വസ്തുക്കളുടെ കൊള്ള, ദേവസ്വം ബോർഡുകളിലെ ഉന്നതരുടെ അറിവില്ലാതെ നടക്കില്ലെന്ന ആരോപണങ്ങൾ ശക്തമാകുകയാണ്. ഹൈക്കോടതിയുടെ ഇടപെടലിൽ മാത്രമാണ് ഈ കൊള്ളകൾ പുറത്ത് വന്നത്. മലബാർ, ഗുരുവായൂർ ദേവസ്വം ബോർഡുകളിലും സമാന സ്വഭാവത്തിലുള്ള അനിയമങ്ങൾ ഉയർന്നുവന്നതായി കോൺഗ്രസ് ആരോപിച്ചു.

വിശ്വാസ സംരക്ഷണ സംഗമത്തിൽ കുന്നംകുളം, നാട്ടിക, മണലൂർ, ഗുരുവായൂർ നിയോജക മണ്ഡലങ്ങളിൽ നിന്നുള്ള പ്രവർത്തകർ പങ്കെടുക്കും.

പത്രസമ്മേളനത്തിൽ കെ.പി.സി.സി സെക്രട്ടറി കെ.ബി. ശശികുമാർ, കെ.ഡി. വീരമണി, ബ്ലോക്ക് പ്രസിഡൻറ് അരവിന്ദൻ പല്ലത്ത്, മണ്ഡലം പ്രസിഡൻറ് ഒ.കെ.ആർ. മണികണ്ഠൻ, യു.ഡി.എഫ് നിയോജക മണ്ഡലം കൺവീനർ കെ.വി. ഷാനവാസ് എന്നിവർ പങ്കെടുത്തു.

“നഗരസഭയുടെ അനാസ്ഥയ്ക്ക് ‘ശ്വാനപുരസ്കാരം’; തെരുവ് നായ ഭീതിക്കെതിരെ കോൺഗ്രസിന്റെ രൂക്ഷപ്രതിക്ഷേധം”

ഗുരുവായൂർ: തുടർച്ചയായി ഗുരുവായൂർ നഗരസഭയുടെ വിവിധ ഭാഗങ്ങളിൽ തെരുവ് നായകളുടെ ആക്രമണങ്ങൾ വർധിച്ച സാഹചര്യത്തിൽ, ഇന്ന് ക്ഷേത്രപരിസരത്ത് വരെ ഭക്തന് നായയുടെ കടിയേറ്റതോടെ ജനവികാരങ്ങൾ പൊട്ടിത്തെറിച്ചു. ഇതിനെതിരെ ഗുരുവായൂർ മുനിസിപ്പൽ കോൺഗ്രസ്സ് കമ്മിറ്റി നഗരസഭയ്ക്ക് മുന്നിൽ പ്രതിക്ഷേധ സദസ്സ് സംഘടിപ്പിച്ചു.

സദസ്സ് കെ.പി.സി.സി സെക്രട്ടറി കെ.ബി. ശശികുമാർ ഉദ്ഘാടനം ചെയ്തു. നഗരസഭ പ്രതിപക്ഷ നേതാവ് കെ.പി. ഉദയൻ അദ്ധ്യക്ഷത വഹിച്ചു.
നഗരസഭയുടെ തികഞ്ഞ നിസങ്കതയെ പ്രതീകാത്മകമായി ചൂണ്ടിക്കാട്ടി, തെരുവ് നായ സൗഹൃദ നഗരസഭയ്ക്കുള്ള “ശ്വാന പുരസ്കാര” വിതരണവും പ്രതിഷേധത്തിന്റെ ഭാഗമായി നടന്നു.
അധികാര കഥാപാത്രങ്ങളെ പരിഹാസാത്മകമായി പ്രതിനിധീകരിച്ചുകൊണ്ട് ഈ ചടങ്ങ് സംഘടിപ്പിക്കപ്പെട്ടു.

ബ്ലോക്ക് കോൺഗ്രസ്സ് പ്രസിഡണ്ട് അരവിന്ദൻ പല്ലത്ത്, മുനിസിപ്പൽ കോൺഗ്രസ്സ് കമ്മിറ്റി കോഓർഡിനേറ്റർ ആർ. രവികുമാർ, മണ്ഡലം പ്രസിഡന്റുമാരായ ആന്റോ തോമസ്, ബി.വി. ജോയ്, ഒ.കെ.ആർ. മണികണ്ഠൻ, ബാലൻ വാറണാട്ട്, കെ.പി.എ. റഷീദ്, സി.എസ്. സൂരജ്, വി.കെ. സുജിത്ത്, ഷെഫീന ഷാനിർ, അജിത അജിത് മോഹൻദാസ് ചേലനാട്, ശിവൻ പാലിയത്ത്, സ്റ്റീഫൻ ജോസ്, ടി.വി. കൃഷ്ണദാസ്, ടി.കെ. ഗോപാലകൃഷ്ണൻ, വിജയകുമാർ അകമ്പടി, വി.എസ്. നവനീത്, ഹരി എം. വാരിയർ, എം.പി. ബഷീർ ഹാജി, പി.കെ. മോഹനൻ, ഷാജി ടി.എ., ഷാനിർ പൂക്കോട്, ശ്രീധരൻ എടമിനി, ബാബു ജേക്കബ് തുടങ്ങിയവർ സംസാരിച്ചു.

പ്രതിഷേധസദസ്സിൽ പങ്കെടുത്തവർ നഗരസഭയുടെ അനാസ്ഥയ്‌ക്കെതിരെ ശക്തമായ വാക്കുകളിൽ പ്രതിഷേധം രേഖപ്പെടുത്തി.

ഗുരുവായൂർ തെരുവുനായകളുടെ പിടിയിലാകുന്നു; നഗരസഭ മൗനം പാലിക്കുമ്പോൾ ജനങ്ങൾ ആശങ്കയിൽ…

ഗുരുവായൂർ: നഗരത്തിലെ തെരുവുനായ ഭീതിയ്ക്ക് വിരാമമില്ല. ഇന്ന് രാവിലെ പടിഞ്ഞാറെ നടയിൽ ക്ഷേത്ര ദർശനത്തിനെത്തിയ ഭക്തന് തെരുവുനായയുടെ ആക്രമണത്തിൽ പരിക്കേറ്റു.

ഇതിനുമുമ്പ്, നഗരസഭയുടെ 25, 26-ാം വാർഡുകളിലായി മാവിൻചുവട് മേഖലയിൽ ആറ് പേർ തെരുവുനായയുടെ ആക്രമണത്തിൽ പരിക്കേറ്റിരുന്നു. നിരന്തരമായ പരാതികൾക്കിപ്പുറവും നഗരസഭ ഇതുവരെ ഫലപ്രദമായ നടപടികൾ ഒന്നും സ്വീകരിച്ചിട്ടില്ലെന്നതാണ് ജനങ്ങൾ ഉന്നയിക്കുന്ന ആരോപണം.

പ്രദേശത്ത് കഴിഞ്ഞ ആഴ്ചകളിലായി തെരുവുനായകളുടെ എണ്ണം ഗണ്യമായി വർധിച്ചതായും, പ്രത്യേകിച്ച് രാത്രി സമയത്ത് സഞ്ചരിക്കുന്നവർക്ക് അപകടഭീഷണിയാണെന്നും പ്രദേശവാസികൾ പറയുന്നു.ജനങ്ങളുടെ സുരക്ഷ ഉറപ്പാക്കാൻ നഗരസഭ അടിയന്തിരമായി ഇടപെടണമെന്നും ഭക്തജനങ്ങളും നാട്ടുകാരും ആവശ്യപ്പെട്ടു.

”

? “അനാസ്ഥയുടെ കുഴിയിൽ വാഴനട്ട്; നഗരസഭയ്‌ക്കെതിരെ യൂത്ത്കോൺഗ്രസിന്റെ കുത്തൊഴുക്ക് പ്രതിഷേധം”

ഗുരുവായൂർ: സ്ട്രീറ്റ് ലൈറ്റിനായി മാസങ്ങളോളമായി കുഴിയെടുത്ത് ഭക്തജനങ്ങൾക്കും വഴിയാത്രക്കാരനും അപകടം സൃഷ്ടിക്കുന്ന നഗരസഭാ ഭരണാധികാരികൾക്കെതിരെ യൂത്ത് കോൺഗ്രസ്സ് ഗുരുവായൂർ മണ്ഡലം കമ്മിറ്റി പടിഞ്ഞാറേ നടയിലെ കുഴിയിൽ വാഴനട്ട് സവിശേഷ പ്രതിഷേധം നടത്തി.

മണ്ഡലം പ്രസിഡന്റ് കെ. കെ. രഞ്ജിത് അധ്യക്ഷത വഹിച്ചു. യൂത്ത് കോൺഗ്രസ്സ് സംസ്ഥാന സെക്രട്ടറി സി. എസ്. സൂരജ് ഉദ്ഘാടനം നിർവഹിച്ചു.
നഗരസഭയുടെ വികസനപണികളിൽ വൻകിട കരാറുകാരും ഭരണാധികാരികളും തമ്മിലുള്ള “അവിശുദ്ധ ബന്ധം” തന്നെയാണ് പണികൾ വൈകിപ്പിക്കാനുള്ള കാരണം എന്നു സൂരജ് ആരോപിച്ചു.

നിയോജകമണ്ഡലം സെക്രട്ടറി വി. എസ്. നവനീത്, മണ്ഡലം ഭാരവാഹികളായ മനീഷ് നീലിമന, രാകേഷ് നെന്മിനി, ശ്രീജിഷ് ചാമുണ്ഡേശ്വരി, അക്ഷയ് മുരളീധരൻ, അതുൽദാസ്, അക്ഷയ്, അബു യഹിയ എന്നിവർ നേതൃത്വം നൽകി.

പടിഞ്ഞാറേ നടയിലെ തെരുവ് കുഴികൾ ഭക്തജനങ്ങൾക്കും നാട്ടുകാർക്കും കനത്ത ബുദ്ധിമുട്ടാണ് സൃഷ്ടിക്കുന്നത്. ഗുരുവായൂർ ക്ഷേത്രസന്നിധിയിലെ ഈ ഭാഗത്ത് ദിവസേന ആയിരക്കണക്കിന് പേർ കടന്നുപോകുമ്പോഴും നഗരസഭ പണി പാതിവഴിയിൽ ഉപേക്ഷിച്ചതായി നാട്ടുകാർ ആരോപിച്ചു.

യുവ കോൺഗ്രസിന്റെ ഈ വാഴനട്ട് പ്രതിഷേധം സാമൂഹ്യമാധ്യമങ്ങളിൽ വ്യാപക ശ്രദ്ധ നേടി. നഗരസഭയുടെ അനാസ്ഥയ്‌ക്കെതിരെ യുവജനങ്ങൾ പ്രതിരോധ മനോഭാവത്തോടെ രംഗത്തിറങ്ങിയ ഈ പ്രതിഷേധം പ്രദേശത്ത് രാഷ്ട്രീയ ചൂടേറി.

അടിസ്ഥാന സൗകര്യങ്ങൾ ഒരുക്കുന്നതിൽ പരാജയപ്പെട്ട ഭരണാധികാരികൾ: കടുത്ത വിമർശനവുമായി ഡി.സി.സി മുൻ പ്രസിഡണ്ട് ജോസ് വള്ളൂർ

ഗുരുവായൂർ: നഗരസഭയുടെ അടിസ്ഥാന സൗകര്യങ്ങൾ ഒരുക്കുന്നതിലും പൊതുപ്രവർത്തന പദ്ധതികളിലും ഗുരുവായൂർ നഗരസഭ ഭരണാധികാരികൾ സമ്പൂർണ്ണ പരാജയമാണ് കാഴ്ചവെച്ചതെന്ന് ഡി.സി.സി മുൻ പ്രസിഡണ്ട് ജോസ് വള്ളൂർ വിമർശിച്ചു.

തെരുവ് നായ്ക്കളുടെ നിയന്ത്രണത്തിൽ പരാജയപ്പെട്ടതിന്റെ ഉത്തമ ഉദാഹരണമാണ് ഇന്നലെ തൈക്കാട് പ്രദേശത്ത് നടന്ന തെരുവ് നായാക്രമണം എന്ന് അദ്ദേഹം ചൂണ്ടിക്കാട്ടി. “ജനങ്ങൾ ഭീതിയോടെ ജീവിക്കേണ്ട അവസ്ഥ സൃഷ്ടിച്ചതാണ് ഇന്നത്തെ ഭരണാധികാരികൾ,” ജോസ് വള്ളൂർ ആരോപിച്ചു.

ഇടതുമുന്നണി നേതൃത്വത്തിലുള്ള ഗുരുവായൂർ നഗരസഭ ഭരണത്തിനെതിരെ കോൺഗ്രസ്സ് ഗുരുവായൂർ മുനിസിപ്പൽ കമ്മിറ്റിയുടെ നേതൃത്വത്തിൽ സംഘടിപ്പിച്ച ‘ഗുരുവായൂർ മോചനയാത്ര’യുടെ സമാപന സമ്മേളനം ചൊവ്വല്ലൂർ പടി സെന്ററിൽ ഉദ്ഘാടനം ചെയ്യുകയായിരുന്നു അദ്ദേഹം..

യോഗത്തിൽ നഗരസഭ പ്രതിപക്ഷ നേതാവ് കെ. പി. ഉദയൻ അദ്ധ്യക്ഷത വഹിച്ചു. മുനിസിപ്പൽ കമ്മറ്റി കോ-ഓർഡിനേറ്റർ ആർ. രവികുമാർ, ഡി.സി.സി സെക്രട്ടറി പി. കെ. രാജൻ, യു.ഡി.എഫ് നിയോജകമണ്ഡലം കൺവീനർ കെ.വി. ഷാനവാസ്, പ്രതിപക്ഷ ഉപനേതാവ് കെ. പി. എ. റഷീദ്, നേതാക്കളായ സി. ജെ. സ്റ്റാൻലി, അരവിന്ദൻ പല്ലത്ത്, എ. ടി. സ്റ്റീഫൻ മാസ്റ്റർ, ബി.വി. ജോയ്, ഓ.കെ.ആർ. മണികണ്ഠൻ, ആൻ്റോ തോമസ്, സി. ജോയ് ചെറിയാൻ എന്നിവർ പ്രസംഗിച്ചു.

തൈക്കാട് മേഖലയിലെ സ്വീകരണ കേന്ദ്രങ്ങളിൽ എൻ. എ. നൗഷാദ്, പി. ഐ. ലാസർ മാസ്റ്റർ, ബാലൻ വാനാട്, ശശി വാറനാട്ട്, ബാബു പി. ആളൂർ, ലത പ്രേമൻ, ബി. മോഹൻ കുമാർ, പി. എസ്. രാജൻ, എം. വി. ബിജു, എ. എൽ. അരുൺ, അജിത അജിത്, ഷിൽവ ജോഷി എന്നിവർ പ്രസംഗിച്ചു.

?ജനങ്ങൾ ഭീതിയിൽ; ചെവി കടിച്ചെടുത്ത് ആക്രമണം, മാവിൻചുവടിൽ തെരുവ് നായയുടെ അതിക്രമം

ഗുരുവായൂർ: നഗരസഭയുടെ 25, 26-ാം വാർഡുകളിലായി മാവിൻചുവട് മേഖലയിൽ വെള്ളിയാഴ്ച വൈകീട്ടുണ്ടായ തെരുവ് നായയുടെ ആക്രമണത്തിൽ ആറ് പേർക്ക് പരിക്കേറ്റു. പ്രദേശത്ത് ജനങ്ങളിൽ ഭീതിയാണ്.

പുല്ല് പറിക്കുകയായിരുന്ന ഇല്ലിക്കോട്ട് വാഹിദ (53)യുടെ ചെവിയുടെ ഒരു ഭാഗം നായ കടിച്ചെടുത്തുവെന്നാണ് വിവരം. ബൈക്കിൽ സഞ്ചരിച്ച സഹദ് അബൂബക്കർ (25) നായ പിന്തുടർന്ന് കടിച്ചു. കൂടാതെ സോന ജോൺസൺ (21), പാൽവിൽപ്പനക്കാരൻ ഹരിദാസ് (55), പുലിക്കോട്ടിൽ റെജി ആന്റോ (37), കറുപ്പംവീട്ടിൽ അഷ്‌റഫ് (53) എന്നിവർക്കും പരിക്കേറ്റിട്ടുണ്ട്.

തെരുവ് നായയുടെ കടിയേറ്റവർക്ക് ചികിത്സാചെലവടക്കം സാമ്പത്തിക സഹായം നൽകണമെന്ന് നഗരസഭ പ്രതിപക്ഷ നേതാവ് കെ.പി. ഉദയൻ ആവശ്യപ്പെട്ടു. അതോടൊപ്പം, ജനങ്ങളുടെ സുരക്ഷ ഉറപ്പാക്കാൻ നഗരസഭ അടിയന്തിരമായി ഇടപെടണമെന്ന് മുസ്ലിം ലീഗ് ജില്ലാ പ്രവർത്തക സമിതി അംഗം ആർ.എ. അബൂബക്കർ ആവശ്യപ്പെട്ടു.

കഴിഞ്ഞ ആഴ്ചകളിലായി തെരുവ് നായകളുടെ എണ്ണം വർധിച്ചതായി, രാത്രി സമയത്ത് സഞ്ചരിക്കുന്നവർക്ക് അപകട ഭീഷണിയാണെന്നും പ്രദേശവാസികൾ പറയുന്നു.