ബെംഗളൂരു: കുടചൂടി ബസോടിക്കുന്നതിന്റെ വീഡിയോ ചിത്രീകരിച്ച് റീൽസാക്കി പ്രചരിപ്പിച്ച കർണാടക ആർടിസി ഡ്രൈവർക്കും കണ്ടക്ടർക്കും സസ്പെൻഷൻ. നോർത്ത് വെസ്റ്റ് കെആർടിസി ജീവനക്കാരെയാണ് സസ്പെൻഡ് ചെയ്തത്. ധർവാഡ് ഡിപ്പോയിലെ ജീവനക്കാരായ ഹനുമന്ത കിലേഡാറ, എച്ച്. അനിത എന്നിവരെയാണ് സസ്പെൻഡ് ചെയ്ത്. വകുപ്പുതല അന്വേഷണത്തിന് പിന്നാലെയാണ് നടപടി.
കഴിഞ്ഞ ദിവസമാണ് ധർവാഡ്- ബേട്ടഗേരി റൂട്ടിൽ കുടചൂടി ഹനുമന്ത ബസോടിച്ചത്. ഇതിന്റെ ദൃശ്യങ്ങൾ ചിത്രീകരിച്ച് റീൽസാക്കി പ്രചരിപ്പിച്ചത് അനിതയായിരുന്നു. സംഭവം വിവാദമായതോടെ മഴക്കാലത്തെ കുറിച്ച് ജനങ്ങളെ അവബോധരാക്കുന്നതിനും മുന്നറിയിപ്പ് നൽകുന്നതിനുമായി ചിത്രീകരിച്ചതാണെന്നാണ് ഇരുവരുടെയും വിചിത്ര വാദം.
ബസിൽ യാത്രക്കാരില്ലാത്ത സമയത്തായിരുന്നു ഇത് ചിത്രീകരിച്ചതെന്നും ജീവനക്കാർ പറഞ്ഞു. എന്നാൽ യാത്രികരില്ലെങ്കിലും കുടചൂടി ബസോടിച്ചത് അപകടമുണ്ടാക്കാൻ സാധ്യതയുള്ളതാണെന്ന് മുൻ നിർത്തി ഇവരെ മാനേജ്മെന്റ് സസ്പെൻഡ് ചെയ്യുകയായിരുന്നു.
