നെഹ്റുവിന്റെ ചരിത്രപൈതൃകം തമസ്കരിക്കാനുള്ള നീക്കങ്ങൾക്കെതിരെ വിമർശനം; നവഭാരത ശില്പിയുടെ ഓർമകൾ പുതുക്കി നേതാക്കളും പ്രവർത്തകരും.
ഗുരുവായൂർ: സ്വതന്ത്ര ഇന്ത്യയുടെ പ്രഥമ പ്രധാനമന്ത്രിയും നവഭാരത ശില്പിയും മതേതര ഇന്ത്യയുടെ സ്രഷ്ടാവുമായ പണ്ഡിറ്റ് ജവഹർലാൽ നെഹ്റുവിന്റെ ജന്മദിനം കോൺഗ്രസ് മണ്ഡലം കമ്മിറ്റിയുടെ നേതൃത്വത്തിൽ സ്മരണാ സദസ്സോടെ ആചരിച്ചു. രാജ്യത്തിന്റെ ജനാധിപത്യ അടിത്തറ ശക്തിപ്പെടുത്തുന്നതിലും മതേതര മൂല്യങ്ങൾ ഉയർത്തിപ്പിടിക്കുന്നതിലും ആധുനിക ഇന്ത്യയുടെ വികസനത്തിന് ദിശാബോധം നൽകുന്നതിലും നിർണായക പങ്കുവഹിച്ച നെഹ്റുവിന്റെ സംഭാവനകൾ സദസ്സ് അനുസ്മരിച്ചു. ബാല്യത്തിന്റെയും കൗമാരത്തിന്റെയും ക്ഷേമത്തിനും ഉന്നമനത്തിനും പ്രത്യേക പരിഗണന നൽകുകയും കുട്ടികളെ രാജ്യത്തിന്റെ ഭാവി വാഗ്ദാനങ്ങളായി കാണുകയും ചെയ്ത ഭരണാധികാരിയായിരുന്നു നെഹ്റുവെന്ന് യോഗം വിലയിരുത്തി. കുട്ടികളോടുള്ള അദ്ദേഹത്തിന്റെ സ്നേഹവും കരുതലും ഓർമിപ്പിക്കുന്ന ശിശുദിനാചരണവും നെഹ്റുവിന്റെ ജീവിതദർശനത്തിന്റെ ഭാഗമാണെന്ന് പ്രസംഗകർ ചൂണ്ടിക്കാട്ടി.
നെഹ്റുവിന്റെ പേരിലുള്ള അഖിലേന്ത്യാ സഹകരണവാരം പോലും ഒഴിവാക്കാൻ ഭരണകർത്താക്കൾ തയ്യാറായെന്ന വിമർശനവും സ്മരണാ സദസ്സിൽ ഉയർന്നു. നെഹ്റുവിന്റെ ചരിത്രപരമായ സംഭാവനകളെയും ഭരണനേട്ടങ്ങളെയും തമസ്കരിക്കാനുള്ള ഇത്തരം നീക്കങ്ങൾ അദ്ദേഹത്തിന്റെ ധീരമായ ഭരണനേതൃത്വത്തിന്റെയും ദീർഘവീക്ഷണത്തിന്റെയും മഹത്വത്തെക്കുറിച്ചുള്ള ഭയത്തിൽ നിന്നുള്ള ഒളിച്ചോട്ടമാണെന്ന് യോഗം അഭിപ്രായപ്പെട്ടു. മണ്ഡലം കോൺഗ്രസ് കമ്മിറ്റി ഓഫീസിൽ നെഹ്റുവിന്റെ ഛായാചിത്രം അലങ്കരിച്ച് പുഷ്പാർച്ചന നടത്തിയ ശേഷമാണ് പരിപാടികൾക്ക് തുടക്കമായത്. തുടർന്ന് ദേശരക്ഷാ പ്രതിജ്ഞയെടുത്തു. മുൻ നഗരസഭാ പ്രതിപക്ഷ നേതാവ് കെ.പി. ഉദയൻ സ്മരണാ സദസ്സ് ഉദ്ഘാടനം ചെയ്തു. മണ്ഡലം കോൺഗ്രസ് പ്രസിഡന്റ് സി.എസ്. സൂരജ് അധ്യക്ഷത വഹിച്ചു. ബാലൻ വാറണാട്ട് വിഷയാവതരണം നടത്തി. കെ.പി.എ. റഷീദ്, ശശി വാറണാട്ട്, സ്റ്റീഫൻ ജോസ്, എസ്.കെ. സന്തോഷ്, മേഴ്സി ജോയ്, സുഷാ ബാബു, അനിൽകുമാർ ചിറക്കൽ, ബഷീർ കുന്നിക്കൽ എന്നിവർ സംസാരിച്ചു. ശശികുമാർ പട്ടത്താക്കിൽ, ജോയ് തോമസ്, പി.എം. മുഹമ്മദുണ്ണി, കൃഷ്ണകുമാർ പി., രാകേഷ് നെന്മിനി എന്നിവർ പരിപാടികൾക്ക് നേതൃത്വം നൽകി.
നെഹ്റുവിന്റെ ജനാധിപത്യബോധവും മതേതര കാഴ്ചപ്പാടുകളും ശാസ്ത്രാഭിമുഖ്യവും ദേശീയ ഐക്യത്തെക്കുറിച്ചുള്ള ദർശനവും പുതുതലമുറയ്ക്ക് പകർന്നുനൽകേണ്ടതിന്റെ പ്രാധാന്യം ഓർമിപ്പിച്ചുകൊണ്ടാണ് സ്മരണാ സദസ്സ് സമാപിച്ചത്.