വിദ്വേഷത്തിനും ലഹരിക്കും അക്രമങ്ങൾക്കുമെതിരെ ഐക്യപ്രതിജ്ഞ; കിഴക്കേ നട മഞ്ജുളാൽ പരിസരത്ത് ചിരാതുകൾ തെളിച്ച് സമാധാനത്തിന്റെയും സാഹോദര്യത്തിന്റെയും സന്ദേശമുയർത്തി
ഗുരുവായൂർ: തിന്മയുടെ അന്ധകാരത്തിൽനിന്ന് നന്മയുടെ പ്രകാശത്തിലേക്കും വിദ്വേഷത്തിൽനിന്ന് സ്നേഹത്തിലേക്കും മനുഷ്യരെ നയിക്കുന്ന ദീപാവലി ആഘോഷത്തെ വരവേറ്റ് ഗുരുവായൂരിൽ ഐക്യത്തിന്റെയും സാഹോദര്യത്തിന്റെയും സന്ദേശവുമായി ദീപപ്രകാശ പരിപാടി സംഘടിപ്പിച്ചു. ഗുരുവായൂർ ക്ഷേത്ര പാരമ്പര്യ നായർ തറവാട്ടുകൂട്ടായ്മയുടെ ആഭിമുഖ്യത്തിൽ കിഴക്കേ നട മഞ്ജുളാൽ പരിസരത്തായിരുന്നു പരിപാടി. ദീപാവലി ആഘോഷത്തിന്റെ ഭാഗമായി അഖണ്ഡഭാരത ശിൽപം ഒരുക്കി അതിനു ചുറ്റും ചിരാതുകളിൽ തിരി തെളിയിച്ച് പ്രകാശം പരത്തിയായിരുന്നു ചടങ്ങുകൾക്ക് തുടക്കമായത്. രാജ്യത്തിന്റെ ഐക്യവും അഖണ്ഡതയും ഉയർത്തിപ്പിടിക്കുന്നതിനൊപ്പം സമൂഹത്തിൽ സമാധാനവും സാഹോദര്യവും ഊട്ടിയുറപ്പിക്കണമെന്ന സന്ദേശവും പരിപാടിയിലൂടെ മുന്നോട്ടുവച്ചു. വിദ്വേഷങ്ങൾക്കും വിപത്തുകൾക്കും ലഹരിക്കുമെതിരെയും അക്രമങ്ങൾ അവസാനിപ്പിച്ച് സമാധാനപൂർണമായ സമൂഹം കെട്ടിപ്പടുക്കുന്നതിനായും എല്ലാവരും ഒരുമിച്ച് പ്രവർത്തിക്കണമെന്ന ആഹ്വാനത്തോടെയാണ് ഐക്യ അഖണ്ഡഭാരത പ്രതിജ്ഞ എടുത്തത്. “വിദ്വേഷങ്ങൾക്കും വിപത്തുകൾക്കും ലഹരിക്കും അക്രമങ്ങൾക്കുമെതിരെ നമുക്ക് ഒരുമിക്കാം; സമാധാനത്തിനായി കൈകോർക്കാം; നല്ലൊരു നാളെ സൃഷ്ടിക്കാം” എന്ന പ്രതിജ്ഞാവാചകം ചടങ്ങിൽ പങ്കെടുത്തവർ ഒന്നിച്ച് ഏറ്റുചൊല്ലി.
ദീപാവലി കേവലം ദീപങ്ങൾ തെളിയിക്കുന്ന ആഘോഷമല്ലെന്നും വ്യക്തിയിലും സമൂഹത്തിലും നന്മയുടെയും സ്നേഹത്തിന്റെയും ഐക്യത്തിന്റെയും വെളിച്ചം പകരാനുള്ള ഓർമപ്പെടുത്തൽ കൂടിയാണെന്നുമുള്ള സന്ദേശമാണ് ചടങ്ങിലൂടെ ഉയർന്നത്. തുടർന്ന് മധുരവിതരണവും നടന്നു. കൂട്ടായ്മ പ്രസിഡന്റ് കെ.ടി. ശിവരാമൻ നായർ സദസ്സ് ഉദ്ഘാടനം ചെയ്തു. ജയറാം ആലക്കൽ അധ്യക്ഷത വഹിച്ചു. അനിൽ കല്ലാറ്റ് സ്വാഗതം ആശംസിച്ചു. ബാലൻ വാറണാട്ട് ഐക്യപ്രതിജ്ഞ ചൊല്ലിക്കൊടുത്തു. മുരളി അകമ്പടി, ടി. ദാക്ഷായണി, നിർമ്മല നായ്ക്കത്ത്, ശശി കേനാടത്ത്, രവീന്ദ്രൻ വട്ടരങ്ങത്ത് എന്നിവർ സംസാരിച്ചു. കോമളം നേശ്യാർ, രാധാമണി ചാത്തനാത്ത്, അഡ്വ. സരസ്വതി, വി. ബാലകൃഷ്ണൻ നായർ, എം. ശ്രീനാരായണൻ, അംബിക പുല്ലാട്ട്, രാധാമണി മുരളി, മുരളി മണ്ണൂങ്ങൽ, എം. ശാന്ത, അനിത മാണിക്കത്ത്, ഷീല കിടുവത്ത്, സുകുമാരൻ കണ്ണത്ത് എന്നിവർ ചടങ്ങുകൾക്ക് നേതൃത്വം നൽകി.
അന്ധകാരത്തെ അകറ്റുന്ന ഓരോ ദീപവും നന്മയുടെ പുതിയൊരു പ്രതീക്ഷയാണെന്ന സന്ദേശം പകർന്നായിരുന്നു ഗുരുവായൂരിലെ ഈ ദീപാവലി ആഘോഷം. ചിരാതുകളുടെ പ്രകാശത്തിനൊപ്പം ഹൃദയങ്ങളിൽ ഐക്യത്തിന്റെയും സാഹോദര്യത്തിന്റെയും തിരിനാളം തെളിയിച്ച ചടങ്ങ്, വിദ്വേഷവും ലഹരിയും അക്രമവും വെടിഞ്ഞ് സ്നേഹവും സമാധാനവും നിറഞ്ഞൊരു സമൂഹത്തെ വാർത്തെടുക്കാനുള്ള കൂട്ടായ്മയുടെ പ്രതിജ്ഞയായി മാറി. നാടിന്റെ നന്മയ്ക്കും രാജ്യത്തിന്റെ ഐക്യത്തിനും ഒരുമിച്ച് കൈകോർക്കണമെന്ന ഓർമപ്പെടുത്തലോടെ ഗുരുവായൂരിൽ തെളിഞ്ഞ ദീപങ്ങൾ പകർന്നത് ഒരു വലിയ സന്ദേശം തന്നെയാണ് — നന്മയുടെ വെളിച്ചം ഓരോ മനസ്സിലും നിറയട്ടെ; ഐക്യത്തിന്റെ പ്രകാശത്തിൽ നല്ലൊരു നാളെ പുലരട്ടെ!