ഗാന്ധിയൻ ആശയങ്ങൾ പുതുതലമുറയിലേക്ക് പകരേണ്ടത് കാലഘട്ടത്തിന്റെ ഉത്തരവാദിത്വമെന്ന് ചടങ്ങിൽ ആഹ്വാനം
ഗുരുവായൂർ: രാഷ്ട്രപിതാവ് മഹാത്മാഗാന്ധിയുടെ ജന്മദിനമായ ഗാന്ധിജയന്തി ഗുരുവായൂരിൽ വിവിധ പരിപാടികളോടെ ആചരിച്ചു. ഗുരുവായൂർ ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ ഗാന്ധിജിയുടെ സ്മരണയ്ക്കായി പുഷ്പാർച്ചനയും അനുസ്മരണ സദസ്സും സംഘടിപ്പിച്ചു.ബ്ലോക്ക് കോൺഗ്രസ് വൈസ് പ്രസിഡന്റ് പി.വി. ബദറുദ്ദീന്റെ അധ്യക്ഷതയിൽ നടന്ന ജന്മദിനാഘോഷ ചടങ്ങ് ബ്ലോക്ക് കോൺഗ്രസ് പ്രസിഡന്റ് അരവിന്ദൻ പല്ലത്ത് ഉദ്ഘാടനം ചെയ്തു. മഹാത്മാഗാന്ധിയുടെ ജീവിതവും പ്രവർത്തനങ്ങളും രാജ്യത്തിന്റെ സ്വാതന്ത്ര്യസമര ചരിത്രത്തിലെ നിർണായക അധ്യായമാണെന്നും, ഗാന്ധിജി ഉയർത്തിപ്പിടിച്ച സത്യം, അഹിംസ, സഹിഷ്ണുത തുടങ്ങിയ മൂല്യങ്ങൾ ഇന്നത്തെ സമൂഹത്തിലും പ്രസക്തമാണെന്നും ഉദ്ഘാടന പ്രസംഗത്തിൽ ചൂണ്ടിക്കാട്ടി.
പ്രമുഖ ഗാന്ധിയനും ആചാര്യനുമായ സി.പി. നായർ മുഖ്യപ്രഭാഷണം നടത്തി. ഗാന്ധിജിയുടെ ജീവിതദർശനവും സാമൂഹിക ഇടപെടലുകളും പുതുതലമുറയ്ക്ക് പരിചയപ്പെടുത്തേണ്ടതിന്റെ ആവശ്യകത അദ്ദേഹം വിശദീകരിച്ചു. ഗാന്ധിയൻ ആശയങ്ങൾ കേവലം അനുസ്മരണങ്ങളിൽ ഒതുങ്ങാതെ സാമൂഹിക ജീവിതത്തിൽ പ്രാവർത്തികമാക്കണമെന്നും അദ്ദേഹം പറഞ്ഞു.ചടങ്ങിൽ യു.ഡി.എഫ്. കൺവീനർ കെ.വി. ഷാനവാസ്, ബാലൻ വാറണാട്ട്, കെ.എച്ച്. ഷാഹുൽ ഹമീദ്, കെ.വി. സത്താർ, സി.കെ. ബാലകൃഷ്ണൻ, വി.കെ. ജയരാജ്, എം.എസ്. ശിവദാസ് എന്നിവർ സംസാരിച്ചു.
ഗാന്ധിജിയുടെ സ്മരണയ്ക്ക് മുന്നിൽ പുഷ്പാർച്ചന നടത്തിയ ശേഷമാണ് അനുസ്മരണ സദസ്സ് സംഘടിപ്പിച്ചത്. കോൺഗ്രസ് പ്രവർത്തകരും നേതാക്കളും ചടങ്ങിൽ പങ്കെടുത്തു.