18 പി.എസ്.സി റാങ്ക് ലിസ്റ്റുകൾക്ക് കാലാവധി നീട്ടി; പാലക്കാട്, മഞ്ചേരി, തൃശൂർ ജില്ലകളിൽ പുതിയ എൻഡിപിഎസ് പ്രത്യേക കോടതികൾ — സർക്കാർ ശക്തമായ നടപടികളുമായി മുന്നോട്ട്
തിരുവനന്തപുരം: സംസ്ഥാനത്തെ പൊതുവിദ്യാഭ്യാസ വകുപ്പിന് കീഴിലുള്ള അധ്യാപക നിയമനത്തിനായുള്ള 18 പി.എസ്.സി റാങ്ക് ലിസ്റ്റുകളുടെ കാലാവധി ആറുമാസത്തേക്ക് നീട്ടാൻ മന്ത്രിസഭാ യോഗം തീരുമാനിച്ചു. 2026 സെപ്റ്റംബർ, ഒക്ടോബർ, നവംബർ മാസങ്ങളിൽ കാലാവധി അവസാനിക്കുന്ന പ്രൈമറി തലം മുതൽ ഹയർ സെക്കൻഡറി സ്കൂൾ ടീച്ചർ (HSST) വരെയുള്ള വിവിധ തസ്തികകളുടെ റാങ്ക് ലിസ്റ്റുകൾക്കാണ് കാലാവധി നീട്ടിയത്. അധ്യാപക ഒഴിവുകൾ യഥാസമയം റിപ്പോർട്ട് ചെയ്യുന്നതിലുണ്ടായ കാലതാമസം പരിഹരിക്കുന്നതിനാണ് തീരുമാനം. സെൻസസ് ഡ്യൂട്ടി, ബൂത്ത് ലെവൽ ഓഫീസർ (BLO) ചുമതലകൾ, സ്ഥലംമാറ്റ നടപടികളിലെ കാലതാമസം, സ്റ്റാഫ് ഫിക്സേഷൻ നടപടികൾ വൈകിയത് തുടങ്ങിയ കാരണങ്ങളാണ് ഒഴിവുകൾ റിപ്പോർട്ട് ചെയ്യുന്നതിൽ താമസമുണ്ടാക്കിയതെന്ന് മുഖ്യമന്ത്രി വാർത്താസമ്മേളനത്തിൽ വ്യക്തമാക്കി.
കാലാവധി നീട്ടിയ 18 പി.എസ്.സി റാങ്ക് ലിസ്റ്റുകൾ
- പ്രീ-പ്രൈമറി ടീച്ചർ – കാറ്റഗറി നമ്പർ 519/2019HST സോഷ്യൽ സയൻസ് – കാറ്റഗറി നമ്പർ 203/2021HST മലയാളം – കാറ്റഗറി നമ്പർ 255/2021HST ഹിന്ദി – കാറ്റഗറി നമ്പർ 562/2021HST ഇംഗ്ലീഷ് – കാറ്റഗറി നമ്പർ 254/2021HST മാത്തമാറ്റിക്സ് – കാറ്റഗറി നമ്പർ 383/2020HST നാച്വറൽ സയൻസ് – കാറ്റഗറി നമ്പർ 384/2020ഫുൾടൈം ജൂനിയർ ടീച്ചർ അറബിക് – കാറ്റഗറി നമ്പർ 520/2019പാർട്ട് ടൈം HST ഹിന്ദി – കാറ്റഗറി നമ്പർ 422/2019HST ഡ്രോയിംഗ് – കാറ്റഗറി നമ്പർ 524/2019പാർട്ട് ടൈം ജൂനിയർ അറബിക് UPS – കാറ്റഗറി നമ്പർ 402/2020ഫിസിക്കൽ എജ്യുക്കേഷൻ ടീച്ചർ UPS – കാറ്റഗറി നമ്പർ 525/2019HSST ഇംഗ്ലീഷ് – കാറ്റഗറി നമ്പർ 728/2021HSST ജൂനിയർ ഇംഗ്ലീഷ് – കാറ്റഗറി നമ്പർ 730/2021HSST ഹിസ്റ്ററി – കാറ്റഗറി നമ്പർ 486/2019HSST ജൂനിയർ സുവോളജി – കാറ്റഗറി നമ്പർ 738/2021HSST ജൂനിയർ ജിയോഗ്രഫി – കാറ്റഗറി നമ്പർ 736/2021HSST ജൂനിയർ ബോട്ടണി – കാറ്റഗറി നമ്പർ 737/2021
ലഹരി കേസുകളുടെ വിചാരണ വേഗത്തിലാക്കാൻ മൂന്ന് പുതിയ NDPS കോടതികൾ
സംസ്ഥാനത്ത് ലഹരിമരുന്ന് കേസുകളുടെ വിചാരണ നടപടികൾ വേഗത്തിലാക്കുന്നതിനായി പാലക്കാട്, മഞ്ചേരി, തൃശൂർ ജുഡീഷ്യൽ ജില്ലകളിൽ മൂന്ന് പുതിയ NDPS പ്രത്യേക കോടതികൾ സ്ഥാപിക്കാനും മന്ത്രിസഭ തീരുമാനിച്ചു.പുതിയ മൂന്ന് കോടതികളിലായി 33 പുതിയ തസ്തികകൾ സൃഷ്ടിക്കും. നിലവിൽ തിരുവനന്തപുരം, എറണാകുളം എന്നിവിടങ്ങളിലുള്ള NDPS കോടതികളിലെ സ്ഥിരം തസ്തികകളുടെ എണ്ണം എട്ടിൽ നിന്ന് പതിനൊന്നായി ഉയർത്താനും തീരുമാനിച്ചിട്ടുണ്ട്.പുതിയ കോടതികളും ജീവനക്കാരുടെ നിയമനവും സർക്കാരിന് അധിക സാമ്പത്തിക ബാധ്യത ഉണ്ടാക്കുമെങ്കിലും, ലഹരിമരുന്നിനെതിരായ ശക്തമായ നടപടികളുടെ ഭാഗമായാണ് തീരുമാനമെന്ന് മുഖ്യമന്ത്രി വ്യക്തമാക്കി.
‘തൂഫാൻ’ ശക്തമായി മുന്നോട്ട്
സംസ്ഥാനത്ത് മയക്കുമരുന്ന് മാഫിയക്കെതിരെ സർക്കാർ നടപ്പാക്കുന്ന ‘തൂഫാൻ’ ലഹരിവിരുദ്ധ പദ്ധതി ശക്തമായി മുന്നോട്ടുപോകുകയാണെന്ന് മുഖ്യമന്ത്രി പറഞ്ഞു. മയക്കുമരുന്ന് പരിശോധന നടത്തുന്ന ഉദ്യോഗസ്ഥരെയോ അവരെ സഹായിക്കുന്ന പൊതുപ്രവർത്തകരെയോ ആക്രമിക്കുന്നവർക്കെതിരെ കർശന നടപടി സ്വീകരിക്കും.യുവതലമുറയെ ലഹരിയുടെ പിടിയിൽനിന്ന് രക്ഷിക്കുക എന്ന ലക്ഷ്യത്തോടെയാണ് പദ്ധതി നടപ്പാക്കുന്നത്. സമൂഹത്തിലെ എല്ലാ വിഭാഗങ്ങളുടെയും പിന്തുണ പദ്ധതിക്കുണ്ടെന്നും മുഖ്യമന്ത്രി പറഞ്ഞു.കേരളത്തിന് പുറത്തേക്കും അന്വേഷണം വ്യാപിപ്പിച്ചിട്ടുണ്ടെന്നും വിവിധ സംസ്ഥാനങ്ങളിൽ പോലീസ് പരിശോധനകൾ നടത്തി കേസുകൾ രജിസ്റ്റർ ചെയ്യുന്നുണ്ടെന്നും അദ്ദേഹം പറഞ്ഞു. കോയമ്പത്തൂരിൽ നിന്ന് 10 കോടി രൂപയുടെ മയക്കുമരുന്ന് കേരള പോലീസ് പിടിച്ചെടുത്തതായും മുഖ്യമന്ത്രി വ്യക്തമാക്കി.
വെള്ളപ്പൊക്ക ദുരിതാശ്വാസം: ഈ ആഴ്ച തന്നെ വിതരണം ആരംഭിക്കും
വെള്ളപ്പൊക്ക ദുരിതാശ്വാസവുമായി ബന്ധപ്പെട്ട അപേക്ഷകളുടെ പരിശോധന വേഗത്തിൽ പൂർത്തിയാക്കി ഈ ആഴ്ച തന്നെ ധനസഹായ വിതരണം ആരംഭിക്കുമെന്ന് മുഖ്യമന്ത്രി അറിയിച്ചു.വയനാട് തുരങ്കപാതയുമായി ബന്ധപ്പെട്ട മണ്ണിടിച്ചിൽ പഠിക്കാൻ നിയോഗിച്ച അഞ്ചംഗ സമിതിയുടെ റിപ്പോർട്ട് ഉടൻ സർക്കാരിന് ലഭിക്കുമെന്നും അദ്ദേഹം പറഞ്ഞു.
മെസിയുടെ സന്ദർശനവുമായി ബന്ധപ്പെട്ട പരാതി ആഭ്യന്തര വകുപ്പിന്
ലയണൽ മെസിയുടെ സന്ദർശനവുമായി ബന്ധപ്പെട്ട് കായിക വകുപ്പ് നൽകിയ പരാതി തുടർനടപടികൾക്കായി ആഭ്യന്തര വകുപ്പിന് കൈമാറിയതായി മുഖ്യമന്ത്രി അറിയിച്ചു. ജിഎസ്ടി ക്രമക്കേടുകൾ സംബന്ധിച്ച റിപ്പോർട്ടുകളിൽ പ്രത്യേക അന്വേഷണ സംഘം പരിശോധന തുടരുകയാണെന്നും അദ്ദേഹം പറഞ്ഞു.
ESA വിഷയത്തിൽ ആശങ്ക വേണ്ടെന്ന് മുഖ്യമന്ത്രി
പരിസ്ഥിതി ലോല പ്രദേശം (ESA) പരിധി സംബന്ധിച്ച് ആശങ്കപ്പെടേണ്ട സാഹചര്യമില്ലെന്ന് മുഖ്യമന്ത്രി വ്യക്തമാക്കി. വിദഗ്ധ സമിതി തയ്യാറാക്കിയിരിക്കുന്നത് നിലവിൽ കരട് റിപ്പോർട്ട് മാത്രമാണെന്നും, അന്തിമ തീരുമാനം ഉണ്ടായിട്ടില്ലെന്നും അദ്ദേഹം പറഞ്ഞു.കസ്തൂരിരംഗൻ റിപ്പോർട്ട് പ്രകാരം നേരത്തെ 13,108 ചതുരശ്ര കിലോമീറ്ററായിരുന്നു പരിധി. പിന്നീട് ഉമ്മൻ വി. ഉമ്മൻ കമ്മിറ്റിയുടെ ശുപാർശ പ്രകാരം ഇത് 9,993.7 ചതുരശ്ര കിലോമീറ്ററായി കുറച്ചിരുന്നു. നിലവിലെ കരട് നിർദേശവും 10,000 ചതുരശ്ര കിലോമീറ്ററിൽ താഴെയാണെന്ന് മുഖ്യമന്ത്രി പറഞ്ഞു.ജനവാസ മേഖലകളെ ESA പരിധിയിൽ നിന്ന് ഒഴിവാക്കണമെന്ന സംസ്ഥാനത്തിന്റെ ആവശ്യം വിദഗ്ധ സമിതിക്ക് മുന്നിൽ അവതരിപ്പിച്ചിട്ടുണ്ടെന്നും അദ്ദേഹം വ്യക്തമാക്കി. ഒരു വില്ലേജ് മുഴുവനായി ESA ആയി പ്രഖ്യാപിക്കുന്നതിന് പകരം വനപ്രദേശങ്ങൾ മാത്രം ഉൾപ്പെടുത്തണമെന്ന സംസ്ഥാന നിലപാടും സമിതിയെ അറിയിച്ചിട്ടുണ്ട്.ഇക്കാര്യത്തിൽ സർക്കാർ ശക്തമായ നിലപാട് തുടരുമെന്നും മുഖ്യമന്ത്രി പറഞ്ഞു.
റെയിൽവേ വിഭജനത്തിനെതിരെ കേന്ദ്രത്തെ നേരിട്ട് സമീപിക്കും
റെയിൽവേ വിഭജനത്തിനെതിരായ സംസ്ഥാനത്തിന്റെ ശക്തമായ എതിർപ്പ് പ്രധാനമന്ത്രിയെയും റെയിൽവേ മന്ത്രിയെയും നേരിൽ കണ്ട് അറിയിക്കുമെന്ന് മുഖ്യമന്ത്രി അറിയിച്ചു.
സ്ത്രീകളുടെ പൊതുപങ്കാളിത്തം: കാന്തപുരത്തിന്റെ നിലപാടിനോട് യോജിപ്പില്ല
സ്ത്രീകൾ പൊതുവേദികളിൽ ഇറങ്ങരുതെന്നും വീടുകളിൽ ഒതുങ്ങി ജീവിക്കണമെന്നുമുള്ള കാന്തപുരത്തിന്റെ പ്രസ്താവനയോട് സർക്കാരിനും പാർട്ടിക്കും യോജിപ്പില്ലെന്ന് മുഖ്യമന്ത്രി വ്യക്തമാക്കി.ഇത് പുരോഗമന കേരളത്തിന് യോജിച്ച നിലപാടല്ലെന്നും സ്ത്രീകൾ ജീവിതത്തിന്റെ എല്ലാ മേഖലകളിലും സജീവമായി പങ്കെടുക്കേണ്ടവരാണെന്നുമാണ് സർക്കാരിന്റെ നിലപാടെന്നും അദ്ദേഹം പറഞ്ഞു.ഇസ്ലാമിക ചരിത്രത്തിൽ തന്നെ പൊതുജീവിതത്തിൽ സജീവമായ നിരവധി സ്ത്രീകളുടെ ഉദാഹരണങ്ങളുണ്ടെന്നും ഖദീജ, ആയിഷ, ബിൽക്കീസ് രാജ്ഞി തുടങ്ങിയവരെ പരാമർശിച്ചുകൊണ്ട് മുഖ്യമന്ത്രി വിശദീകരിച്ചു. പ്രസ്താവന ഇസ്ലാമിനെ തെറ്റായി വ്യാഖ്യാനിക്കുന്നതാണെന്നും അദ്ദേഹം അഭിപ്രായപ്പെട്ടു.
വന്ദേമാതരം: കേന്ദ്ര പ്രോട്ടോക്കോൾ പാലിക്കുമെന്ന് മുഖ്യമന്ത്രി
വന്ദേമാതരം ആലാപനവുമായി ബന്ധപ്പെട്ട സംസ്ഥാന സർക്കാരിന്റെ നിലപാട് നേരത്തെ തന്നെ വ്യക്തമാക്കിയിട്ടുണ്ടെന്ന് മുഖ്യമന്ത്രി പറഞ്ഞു. ആഗസ്റ്റ് 15ന് സംസ്ഥാന സർക്കാരിന്റെ പരിപാടികളിൽ ഇത് ആലപിച്ചിട്ടില്ലെന്നും അദ്ദേഹം വ്യക്തമാക്കി.എന്നാൽ രാഷ്ട്രപതി, ഉപരാഷ്ട്രപതി, പ്രധാനമന്ത്രി എന്നിവർ പങ്കെടുക്കുന്ന പരിപാടികളിൽ കേന്ദ്ര പ്രോട്ടോക്കോൾ അനുസരിച്ചാണ് നടപടികൾ സ്വീകരിക്കേണ്ടതെന്നും അതിൽനിന്ന് സംസ്ഥാന സർക്കാരിന് മാറിനിൽക്കാൻ കഴിയില്ലെന്നും മുഖ്യമന്ത്രി പറഞ്ഞു.കോൺഗ്രസ് പാർട്ടിയുടെയും സർക്കാരിന്റെയും നിലപാട് ആദ്യ രണ്ട് സ്റ്റാൻസകൾ മാത്രം ആലപിക്കണമെന്നതാണെന്നും അദ്ദേഹം വ്യക്തമാക്കി.
പ്രിയദർശിനി പദ്ധതി: സ്വകാര്യ ബസ് മേഖലയെയും സംരക്ഷിക്കും
പ്രിയദർശിനി പദ്ധതി സംബന്ധിച്ച വിദഗ്ധ സമിതി റിപ്പോർട്ട് സർക്കാരിന് സമർപ്പിച്ചതായി മുഖ്യമന്ത്രി അറിയിച്ചു. സ്വകാര്യ ബസ് മേഖലയെ കൂടി സംരക്ഷിക്കുന്നതിനുള്ള നിർദേശങ്ങൾ റിപ്പോർട്ടിലുണ്ടെന്നും ഗതാഗത മന്ത്രി ഇത് വിശദീകരിക്കുമെന്നും അദ്ദേഹം പറഞ്ഞു.റിപ്പോർട്ട് പരിശോധിച്ച ശേഷം സ്വകാര്യ ബസ് മേഖലയെയും സംരക്ഷിക്കുന്നതിനുള്ള നടപടികൾ സ്വീകരിക്കുമെന്നും മുഖ്യമന്ത്രി വ്യക്തമാക്കി.
KSRTCയെ സ്വയം നിലനിൽക്കാൻ കഴിയുന്ന സ്ഥാപനമാക്കുകയാണ് ലക്ഷ്യം
സൗജന്യ യാത്ര ഉൾപ്പെടെയുള്ള നടപടികൾക്കെതിരെ നേരത്തെ വിമർശനങ്ങൾ ഉണ്ടായിരുന്നെങ്കിലും KSRTCക്ക് റെക്കോർഡ് കളക്ഷൻ ലഭിച്ചുവെന്ന് മുഖ്യമന്ത്രി പറഞ്ഞു.സർക്കാർ ഗ്രാന്റിനെ ആശ്രയിക്കാതെ സ്വതന്ത്രമായി നിലനിൽക്കാൻ കഴിയുന്ന നിലയിലേക്ക് KSRTCയെ എത്തിക്കുകയാണ് സർക്കാരിന്റെ ലക്ഷ്യമെന്നും അദ്ദേഹം വ്യക്തമാക്കി.
ഓണക്കാലത്ത് റെക്കോർഡ് വ്യാപാരം; വിപണിയെ കൂടുതൽ ഉത്തേജിപ്പിക്കും
ഓണക്കാലത്ത് സിവിൽ സപ്ലൈസ് കോർപ്പറേഷൻ മികച്ച രീതിയിൽ പ്രവർത്തിച്ചതായി മന്ത്രിസഭാ യോഗം വിലയിരുത്തിയെന്നും വകുപ്പിനെ പ്രത്യേകമായി അഭിനന്ദിച്ചെന്നും മുഖ്യമന്ത്രി പറഞ്ഞു.കേരളത്തിന്റെ മുക്കിലും മൂലയിലും 13 ഇനം അവശ്യസാധനങ്ങൾ എത്തിക്കാൻ കഴിഞ്ഞത് സർവകാല റെക്കോർഡാണെന്നും അദ്ദേഹം പറഞ്ഞു. ഓണാഘോഷം മികച്ച രീതിയിൽ സംഘടിപ്പിച്ചതിന് ടൂറിസം വകുപ്പിനെയും മന്ത്രിസഭ അഭിനന്ദിച്ചു.ജനങ്ങളുടെ കൈകളിലേക്ക് പണം എത്തിക്കുകയും അതുവഴി വിപണിയിൽ വലിയ ചലനം സൃഷ്ടിക്കുകയും ചെയ്തുവെന്നാണ് മുഖ്യമന്ത്രിയുടെ വിലയിരുത്തൽ. വിപണിയെ ഉത്തേജിപ്പിച്ച് സമ്പദ്വ്യവസ്ഥ ശക്തിപ്പെടുത്തുകയും നികുതി വരുമാനം വർധിപ്പിക്കുകയും ചെയ്യുക എന്നതാണ് സർക്കാരിന്റെ സാമ്പത്തിക സമീപനമെന്നും അദ്ദേഹം പറഞ്ഞു.
നികുതി വരുമാനം ഉയർന്നു; ഇനിയും വർധിപ്പിക്കണം
കഴിഞ്ഞ മൂന്ന് മാസക്കാലത്ത് സംസ്ഥാനത്തിന്റെ നികുതി വരുമാനത്തിൽ വർധനയുണ്ടായെങ്കിലും അതിൽ സർക്കാർ തൃപ്തരല്ലെന്ന് മുഖ്യമന്ത്രി പറഞ്ഞു. ഇനിയും വരുമാനം വർധിപ്പിച്ച് ഖജനാവ് ശക്തിപ്പെടുത്തുകയാണ് ലക്ഷ്യമെന്നും അദ്ദേഹം വ്യക്തമാക്കി.നികുതി നിരക്ക് കൂട്ടിയിട്ടില്ലെന്നും ചില വിഭാഗങ്ങളിൽ നികുതി കുറച്ചിട്ടുണ്ടെന്നും അദ്ദേഹം പറഞ്ഞു. 20 ലക്ഷം രൂപയിൽ താഴെയും 10 ലക്ഷം രൂപയിൽ താഴെയുമുള്ള ഇലക്ട്രിക് വാഹനങ്ങളുടെ നികുതി കുറച്ചതിനെ തുടർന്ന് സംസ്ഥാനത്തെ ഇലക്ട്രിക് വാഹന വിൽപ്പനയിൽ വലിയ വർധനയുണ്ടായതായും മുഖ്യമന്ത്രി ചൂണ്ടിക്കാട്ടി.
കടമെടുപ്പ് പരിധി ലംഘിച്ചിട്ടില്ല
സംസ്ഥാനം കടമെടുപ്പ് പരിധി ലംഘിച്ച് വായ്പ എടുത്തിട്ടില്ലെന്ന് മുഖ്യമന്ത്രി വ്യക്തമാക്കി. കഴിഞ്ഞ സർക്കാരിന്റെ കാലത്ത് ബജറ്റിന് പുറത്തെടുത്ത വായ്പകളുടെ ബാധ്യതയും നിലവിലെ സർക്കാരിന് ഏറ്റെടുക്കേണ്ടിവന്നിട്ടുണ്ടെന്നും അദ്ദേഹം പറഞ്ഞു.കിഫ്ബി വഴി ഉണ്ടായ ഏകദേശം 38,000 കോടി രൂപയുടെ കടബാധ്യത ഉൾപ്പെടെയുള്ള ബാധ്യതകൾ നിലവിലെ സർക്കാരിന്റെ തലയിൽ വന്നിട്ടുണ്ടെന്നും മുഖ്യമന്ത്രി ആരോപിച്ചു.പതിനഞ്ചാം ധനകാര്യ കമ്മീഷൻ കാലത്ത് ലഭിച്ചിരുന്ന റവന്യൂ ഡെഫിസിറ്റ് ഗ്രാന്റ് ഇപ്പോഴത്തെ സർക്കാരിന് ലഭിക്കുന്നില്ലെന്നും പതിനാറാം ധനകാര്യ കമ്മീഷനിൽ ഈ ഗ്രാന്റ് ഇല്ലെന്നും അദ്ദേഹം പറഞ്ഞു. കേന്ദ്ര നികുതി വിഹിതത്തിലും ഗണ്യമായ കുറവുണ്ടായതായും കടമെടുപ്പ് പരിധി 3.5 ശതമാനത്തിൽ നിന്ന് 3 ശതമാനമായി കുറഞ്ഞതായും മുഖ്യമന്ത്രി വ്യക്തമാക്കി.
ചെന്തിയിലെ സംഭവത്തിൽ പോലീസ് അന്വേഷണം തുടരുന്നു
ചേന്തിയില് പ്രശ്നമുണ്ടാക്കിയ ആളിനെ വ്യക്തിപരമായി അറിയില്ല. ആ വ്യക്തി മോശമായി പെരുമാറി. ക്രിമിനല് പശ്ചാത്തലമുള്ള ആള് ഡി.സി.സി അംഗമായത് എങ്ങനെയെന്ന് അറിയില്ല. ചേന്തിയിലെ പരിപാടിക്ക് എന്നെ ക്ഷണിച്ചിരുന്നു. പക്ഷേ അവിടുത്തെ പാര്ട്ടി പ്രവര്ത്തകരെ ബന്ധപ്പെട്ടപ്പോള് അറിഞ്ഞത്് ക്രമിനല് പശ്ചാത്തലമുള്ള ആളാണ് ആ പരിപാടി നടത്തുന്നത് എന്നാണ്. സമാനമായ പോലീസ് റിപ്പോര്ട്ടും ഉണ്ടായിരുന്നു. തുടര്ന്ന് രണ്ടാഴ്ച മുമ്പ് തന്നെ ആ പരിപാടി വേണ്ടെന്നു വച്ചതായി സംഘാടകരെ അറിയിച്ചിരുന്നതാണ്. ചെമ്പഴന്തിയിലെ പരിപാടിക്ക് പോകുന്ന വഴിയ്ക്ക് കുറെ പാര്ട്ടി പ്രവര്ത്തകരും നേതാക്കളും നില്ക്കുന്നത് കണ്ടിട്ട് അവിടെ ഇറങ്ങിയതാണ്. അവരാരും എന്നെ തടഞ്ഞിട്ടില്ല. അവിടെ പുഷ്പാര്ച്ചന നടത്തണമെന്ന് പറഞ്ഞതുകൊണ്ടാണ് അവിടെ ഇറങ്ങിയത്. ഒരു വ്യക്തി വളരെ മോശമായി സംസാരിക്കുകയും അവിടേയ്ക്ക് പോകുന്നത് തടയുകയും ചെയ്തു. സംഘര്ഷം ഉണ്ടാക്കാതിരിക്കുന്നതിനുവേണ്ടി തിരികെ വണ്ടിയില് കയറി. പോലീസ് സ്വമേധയാ കേസ് എടുക്കുകയായായിരുന്നു. പ്രശ്നമുണ്ടാക്കിയ ആളെ വ്യക്തിപരമായി അറിയില്ല. അദ്ദേഹത്തിന്റെ ഭാര്യ കൗണ്സിലറായിരുന്നു. അവരെ അറിയാം. അവര് മരിച്ചപ്പോള് ആ വീട് സന്ദര്ശിച്ചിട്ടുണ്ട്. പോലീസ് അന്വേഷിച്ചുകൊണ്ടിരിക്കുന്നകേസിനെപ്പറ്റി കൂടുതലൊന്നും പറയാനില്ല.
ജനങ്ങൾക്ക് ആശ്വാസം നൽകുന്ന ക്ഷേമനടപടികൾക്കൊപ്പം സംസ്ഥാനത്തിന്റെ സാമ്പത്തിക അടിത്തറ ശക്തിപ്പെടുത്തുകയും, ലഹരിമാഫിയ ഉൾപ്പെടെയുള്ള സാമൂഹിക ഭീഷണികൾക്കെതിരെ വിട്ടുവീഴ്ചയില്ലാത്ത നടപടി സ്വീകരിക്കുകയും ചെയ്യുക എന്ന ലക്ഷ്യത്തോടെയാണ് സർക്കാർ മുന്നോട്ടുപോകുന്നതെന്ന സന്ദേശമാണ് മന്ത്രിസഭാ യോഗത്തിന് ശേഷമുള്ള മുഖ്യമന്ത്രിയുടെ വാർത്താസമ്മേളനം നൽകുന്നത്.