“ഗുരുവായൂർ സത്യാഗ്രഹ പോരാളിയുടെ സ്മരണയിൽ ഭക്തിയും ആദരവും”: “ആധ്യാത്മികതയും സാമൂഹിക നവോത്ഥാനവും കൈകോർത്ത മഹാജീവിതത്തിന് ആദരാഞ്ജലി”
ഗുരുവായൂർ: ആധ്യാത്മിക ആചാര്യനായും സാമൂഹിക നവോത്ഥാന നായകനായും സാഹിത്യകാരനായും കേരളത്തിന്റെ ചരിത്രത്തിൽ വ്യക്തിമുദ്ര പതിപ്പിച്ച ടി. സുബ്രഹ്മണ്യൻ തിരുമുമ്പിന്റെ 120-ാം ജയന്തി വിവിധ പരിപാടികളോടെ ആഘോഷിച്ചു. ഗുരുവായൂർ ക്ഷേത്രപ്രവേശന സത്യാഗ്രഹ സമരത്തിലെ ധീര പോരാളികളിലൊരാളായിരുന്ന അദ്ദേഹം സാമ്രാജ്യത്വത്തിനും ജന്മിത്വത്തിനും ജാതിവ്യവസ്ഥയ്ക്കുമെതിരായ പോരാട്ടങ്ങളിലൂടെ സമൂഹമനസാക്ഷിയെ ഉണർത്തിയ വ്യക്തിത്വമായിരുന്നു.
അഖിലഭാരത ശ്രീ ഗുരുവായൂരപ്പ ഭക്തസമിതിയും മമ്മിയൂർ ദിവ്യാശ്രീ വിജ്ഞാന ആദ്ധ്യാത്മിക കേന്ദ്രവും സംയുക്തമായി സംഘടിപ്പിച്ച ജയന്തി ആഘോഷ പരിപാടി ഭാഗവതാചാര്യൻ ഉണ്ണികൃഷ്ണൻ തൃപ്പാളൂർ ഉദ്ഘാടനം ചെയ്തു. സമൂഹ നവോത്ഥാനത്തിനും ആത്മീയ മൂല്യങ്ങൾക്കും വേണ്ടി ടി. സുബ്രഹ്മണ്യൻ തിരുമുമ്പ് നടത്തിയ പ്രവർത്തനങ്ങൾ ഇന്നും മാതൃകാപരമാണെന്നും അദ്ദേഹത്തിന്റെ ആശയങ്ങൾ പുതിയ തലമുറയ്ക്ക് പ്രചോദനമാകണമെന്നും അദ്ദേഹം അഭിപ്രായപ്പെട്ടു.
ചടങ്ങിൽ ആചാര്യ സി.പി. നായർ അധ്യക്ഷത വഹിച്ചു. ഭക്തസമിതി ജനറൽ സെക്രട്ടറി സജീവൻ നമ്പിയത്ത് സ്വാഗതം പറഞ്ഞു. ഗുരുവായൂർ ദേവസ്വം മുൻ ഡെപ്യൂട്ടി അഡ്മിനിസ്ട്രേറ്റർ ആർ. നാരായണൻ, ഗുരുവായൂർ ദേവസ്വം മുൻ മാനേജർ കെ. പ്രദീപ് കുമാർ, മമ്മിയൂർ വിജയലക്ഷ്മി ടീച്ചർ, തിരുമുമ്പിന്റെ മരുമകൻ മുരളീധരൻ തിരുമുമ്പ്, പി. വിനോദ് നായർ, പി.എസ്. മാധവവർമ്മ, ബി. വിജയകുമാരി, ധനേഷ് നെന്മിനി, ഗീത വി. നായർ, വർഷ ഉണ്ണികൃഷ്ണൻ എന്നിവർ സംസാരിച്ചു.
ആറു പതിറ്റാണ്ടിലേറെ നീണ്ട പൊതുജീവിതത്തിൽ ആധ്യാത്മികത, സാമൂഹിക പരിഷ്കരണം, സാഹിത്യരംഗം, ദേശീയ പ്രസ്ഥാനങ്ങൾ എന്നിവയിൽ സജീവ സാന്നിധ്യമായിരുന്ന ടി. സുബ്രഹ്മണ്യൻ തിരുമുമ്പിന്റെ സംഭാവനകൾ അനുസ്മരിച്ചുകൊണ്ടാണ് ചടങ്ങ് നടന്നത്. അദ്ദേഹത്തിന്റെ ജീവിതദർശനവും സമത്വസന്ദേശവും ഇന്നത്തെ സമൂഹത്തിനും ഏറെ പ്രസക്തമാണെന്ന് പ്രഭാഷകർ ചൂണ്ടിക്കാട്ടി.
ജയന്തി ആഘോഷത്തിന്റെ ഭാഗമായി ഭക്തിഗാനാലാപനവും നാരായണീയ പാരായണവും സംഘടിപ്പിച്ചു. ഭക്തജനങ്ങളുടെ സാന്നിധ്യത്തിൽ നടന്ന പരിപാടി ആത്മീയവും സാംസ്കാരികവുമായ അന്തരീക്ഷം സൃഷ്ടിച്ചു.