ആഭ്യന്തര വകുപ്പ് ആവശ്യപ്പെട്ട് കടുത്ത നിലപാട്; രണ്ട് എംഎൽഎമാർക്ക് മന്ത്രിസ്ഥാനം, ബോർഡ്-കോർപ്പറേഷനുകളിൽ പ്രാതിനിധ്യം, ജോസഫ് വാഴയ്ക്കന് കെപിസിസി അധ്യക്ഷ സ്ഥാനം എന്നിവയും ആവശ്യമായി ഉയർത്തുന്നു
തിരുവനന്തപുരം: പുതിയ യുഡിഎഫ് സർക്കാരിന്റെ മന്ത്രിസഭാ രൂപീകരണ ചർച്ചകൾ നിർണായക ഘട്ടത്തിലെത്തിയിരിക്കെ, ആഭ്യന്തര വകുപ്പ് ലഭിക്കാത്ത പക്ഷം മന്ത്രിസഭയിൽ ചേരില്ലെന്ന കടുത്ത നിലപാട് സ്വീകരിച്ച് മുൻ പ്രതിപക്ഷ നേതാവ് Ramesh Chennithala. ആഭ്യന്തര വകുപ്പ് ലഭിച്ചാൽ മാത്രമേ മന്ത്രിസഭയിലേക്ക് പ്രവേശിക്കൂ എന്നതാണ് ചെന്നിത്തലയുടെ വ്യക്തമായ നിലപാട് എന്നാണ് അടുത്ത വൃത്തങ്ങൾ സൂചിപ്പിക്കുന്നത്.
മന്ത്രിസഭയിൽ അംഗമാകുന്നതിനൊപ്പം, തനിക്കൊപ്പമുണ്ടായിരുന്ന രണ്ട് എംഎൽഎമാർക്കും മന്ത്രിസ്ഥാനം നൽകണമെന്ന ആവശ്യവും ചെന്നിത്തല ഉയർത്തുന്നുണ്ട്. കൂടാതെ വിവിധ ബോർഡുകളിലും കോർപ്പറേഷനുകളിലും തന്റെ വിഭാഗത്തിന് മതിയായ പ്രാതിനിധ്യം ഉറപ്പാക്കണമെന്നും അദ്ദേഹം ആവശ്യപ്പെടും.
ഇന്ന് വൈകിട്ട് കേരളത്തിലെത്തുന്ന കെ.സി.വേണുഗോപാലുമായി നടക്കുന്ന കൂടിക്കാഴ്ചയിലാണ് ചെന്നിത്തല തന്റെ ആവശ്യങ്ങൾ ഔദ്യോഗികമായി മുന്നോട്ടുവയ്ക്കുന്നത്. കോൺഗ്രസ് ഹൈക്കമാൻഡിന്റെ നിലപാട് അറിയുന്നതിനും സമവായ സാധ്യതകൾ പരിശോധിക്കുന്നതിനും ഈ കൂടിക്കാഴ്ച നിർണായകമാകും. കെപിസിസി അധ്യക്ഷ സ്ഥാനത്തേക്ക് ജോസഫ് വാഴക്കനെ പരിഗണിക്കണമെന്ന ആവശ്യവും ചെന്നിത്തല ഉന്നയിക്കുമെന്ന് റിപ്പോർട്ടുകളുണ്ട്. സംഘടനാ തലത്തിലും ഭരണ തലത്തിലും തുല്യ സ്വാധീനം ഉറപ്പാക്കുക എന്നതാണ് ഇതിന് പിന്നിലെ രാഷ്ട്രീയ കണക്ക്.
അതേസമയം നിയുക്ത മുഖ്യമന്ത്രി വി. ഡി. സതീശൻ ആഭ്യന്തര വകുപ്പ് വിട്ടുനൽകുന്നതിൽ ആശങ്ക പ്രകടിപ്പിക്കുന്നുവെന്നാണ് സൂചന. ആഭ്യന്തര വകുപ്പ് മറ്റൊരാൾക്ക് കൈമാറിയാൽ സർക്കാരിനുള്ളിൽ പല അധികാര കേന്ദ്രങ്ങൾ രൂപപ്പെടാൻ സാധ്യതയുണ്ടെന്ന വിലയിരുത്തലാണ് സതീശൻ പങ്കുവയ്ക്കുന്നതെന്നാണ് വിവരം. മുഖ്യമന്ത്രിയുടെ രാഷ്ട്രീയവും ഭരണപരവുമായ നിയന്ത്രണം ഉറപ്പാക്കുന്നതിനായി ആഭ്യന്തര വകുപ്പ് സ്വന്തമായി കൈവശം വയ്ക്കണമെന്ന നിലപാടാണ് സതീശനുള്ളതെന്ന് കോൺഗ്രസ് വൃത്തങ്ങൾ വ്യക്തമാക്കുന്നു.
ചെന്നിത്തല മന്ത്രിസഭയിൽ നിർബന്ധമായും ഉൾപ്പെടണമെന്ന ആവശ്യം യുഡിഎഫിലെ മറ്റ് നേതാക്കളും ശക്തമായി ഉന്നയിച്ചിട്ടുണ്ട്. പി. ജെ. ജോസഫ്, പി. ജെ. കുര്യൻ എന്നിവർ ഇതിനായി തുറന്ന പിന്തുണ പ്രഖ്യാപിച്ചു. .ഡി. സതീശനുമായുള്ള കൂടിക്കാഴ്ചയിൽ പി.ജെ. ജോസഫ് ഈ ആവശ്യം മുന്നോട്ടുവച്ചതായും, ചെന്നിത്തലയുടെ ഭരണപരിചയവും സംഘടനാ സ്വാധീനവും സർക്കാരിന് ഗുണകരമാകുമെന്ന് അദ്ദേഹം ചൂണ്ടിക്കാട്ടിയതായും അറിയുന്നു. പി.ജെ. കുര്യനും മാധ്യമങ്ങളോട് സംസാരിക്കവെ ചെന്നിത്തല മന്ത്രിസഭയിൽ ഉണ്ടാകേണ്ടത് അനിവാര്യമാണെന്ന് അഭിപ്രായപ്പെട്ടു.
മന്ത്രിസഭാ രൂപീകരണ ചർച്ചകൾ പുരോഗമിക്കുന്ന സാഹചര്യത്തിൽ രമേശ് ചെന്നിത്തലയുടെ നിലപാട് കോൺഗ്രസിനുള്ളിലെ ശക്തിസമവാക്യങ്ങളെ കൂടുതൽ സങ്കീർണമാക്കുകയാണ്. ആഭ്യന്തര വകുപ്പ്, മന്ത്രിസ്ഥാനങ്ങൾ, പാർട്ടി സംഘടനയിലെ പ്രധാന പദവികൾ എന്നിവ ചർച്ചകളിലെ കേന്ദ്ര വിഷയങ്ങളായി മാറിയിരിക്കുകയാണ്.
ഹൈക്കമാൻഡിന്റെ ഇടപെടലും കോൺഗ്രസ് നേതൃത്വത്തിന്റെ സമവായ നീക്കങ്ങളും അടുത്ത ദിവസങ്ങളിൽ നിർണായകമാകുമെന്ന് രാഷ്ട്രീയ നിരീക്ഷകർ വിലയിരുത്തുന്നു. ആഭ്യന്തര വകുപ്പ് സംബന്ധിച്ച തീരുമാനമാണ് പുതിയ മന്ത്രിസഭയുടെ രൂപരേഖയും കോൺഗ്രസിനുള്ളിലെ അധികാര സന്തുലിതാവസ്ഥയും നിർണയിക്കാനിടയാക്കുന്നത്.