ഉത്രാടം മുതൽ ചതയം വരെ ദർശന നിയന്ത്രണം; തിരുവോണദിനത്തിൽ പുലർച്ചെ 4.30ന് ഓണപ്പുടവ സമർപ്പണം — ക്ഷേത്രത്തിൽ വിപുലമായ ഒരുക്കങ്ങൾ

ഗുരുവായൂർ: ഉത്രാട ദിനമായ ഇന്ന് (ഓഗസ്റ്റ് 25, ചൊവ്വാഴ്ച) ഗുരുവായൂർ ക്ഷേത്രത്തിൽ ഭക്തിനിർഭരമായ ഉത്രാട കാഴ്ചക്കുല സമർപ്പണ ചടങ്ങ് നടക്കും. രാവിലെ ശീവേലിക്ക് ശേഷമാണ് ശ്രീഗുരുവായൂരപ്പന് കാഴ്ചക്കുല സമർപ്പിക്കുന്നത്. ഉത്രാട കാഴ്ചക്കുല സമർപ്പിക്കാനെത്തുന്ന ഭക്തർക്കായി മുതിർന്ന പൗരന്മാർക്കുള്ള ദർശനവരിയുടെ ഭാഗത്ത് പ്രത്യേക സൗകര്യം ഒരുക്കിയിട്ടുണ്ട്.

സ്വർണക്കൊടിമരച്ചുവട്ടിലാണ് കാഴ്ചക്കുല സമർപ്പണ ചടങ്ങ് നടക്കുക. ക്ഷേത്രം മേൽശാന്തി, തന്ത്രി, ദേവസ്വം ചെയർമാൻ, ഭരണസമിതി അംഗങ്ങൾ തുടങ്ങിയവർ ചടങ്ങിൽ പങ്കെടുക്കും. കാഴ്ചക്കുലയുമായി ഭക്തർക്ക് നാലമ്പലത്തിനുള്ളിലേക്ക് പ്രവേശനം അനുവദിക്കില്ല. കൊടിമരച്ചുവട്ടിൽ നിശ്ചയിച്ചിട്ടുള്ള സ്ഥലത്താണ് കാഴ്ചക്കുല സമർപ്പിക്കേണ്ടത്.

ഉത്രാട ദിനത്തിൽ ദർശന നിയന്ത്രണം

കാഴ്ചക്കുല സമർപ്പണ ചടങ്ങിന്റെ സുഗമമായ നടത്തിപ്പിനായി ഇന്ന് രാവിലെ 5.30 മുതൽ സീനിയർ സിറ്റിസൺ, പ്രാദേശിക ദർശന വരികൾ അവസാനിപ്പിക്കും. ചടങ്ങുമായി ബന്ധപ്പെട്ട തിരക്ക് നിയന്ത്രിക്കുന്നതിനും ഭക്തരുടെ സുരക്ഷയും സൗകര്യവും ഉറപ്പാക്കുന്നതിനുമാണ് നിയന്ത്രണം ഏർപ്പെടുത്തുന്നത്. അതേസമയം, ഓണനാളുകളിൽ ഗുരുവായൂരപ്പന്റെ ദർശനത്തിന് എത്തുന്ന മുഴുവൻ ഭക്തർക്കും ദർശന സൗകര്യം ഒരുക്കുമെന്ന് ദേവസ്വം അറിയിച്ചു. പൊതുവരി നിൽക്കുന്ന ഭക്തർക്കായിരിക്കും ദർശനത്തിൽ മുൻഗണന. ഉത്രാടം മുതൽ ചതയം വരെ, അതായത് ഓഗസ്റ്റ് 25 മുതൽ 28 വരെ, രാവിലെ 6 മുതൽ ഉച്ചയ്ക്ക് 2 മണിവരെ സ്പെഷ്യൽ, വി.ഐ.പി. ദർശനങ്ങൾക്ക് നിയന്ത്രണമുണ്ടാകും. സാധാരണ ദർശനത്തിനെത്തുന്ന ഭക്തർക്ക് കൂടുതൽ സൗകര്യം ലഭ്യമാക്കുന്നതിനാണ് ഈ ക്രമീകരണം.

തിരുവോണത്തിന് പുലർച്ചെ 4.30ന് ഓണപ്പുടവ സമർപ്പണം

തിരുവോണ ദിനമായ ഓഗസ്റ്റ് 26 ബുധനാഴ്ച ഗുരുവായൂർ ക്ഷേത്രത്തിൽ പതിവ് ചടങ്ങുകൾക്ക് പുറമെ വിവിധ വിശേഷാൽ ചടങ്ങുകളും നടക്കും. പുലർച്ചെ 4.30നാണ് ശ്രീഗുരുവായൂരപ്പന് ഓണപ്പുടവ സമർപ്പണം. ക്ഷേത്രം ഊരാളൻ ബ്രഹ്മശ്രീ മല്ലിശേരി പരമേശ്വരൻ നമ്പൂതിരിപ്പാട് ആദ്യം ഓണപ്പുടവ സമർപ്പിക്കും. തുടർന്ന് ദേവസ്വം ചെയർമാൻ, ഭരണസമിതി അംഗങ്ങൾ, ഭക്തർ എന്നിവർക്ക് ഓണപ്പുടവ സമർപ്പിക്കാം. ഉഷഃപൂജ വരെ ഭഗവാന് ഓണപ്പുടവ സമർപ്പിക്കുന്നതിനുള്ള സൗകര്യമുണ്ടാകും.

തിരുവോണത്തിന് 10,000 പേർക്ക് വിശേഷാൽ പ്രസാദ ഊട്ട്

തിരുവോണദിനത്തിലെ പ്രധാന ആകർഷണങ്ങളിലൊന്നായ വിശേഷാൽ പ്രസാദ ഊട്ട് രാവിലെ 9 മണിക്ക് ആരംഭിക്കും. ഏകദേശം 10,000 പേർക്ക് പ്രസാദ ഊട്ട് ഒരുക്കിയിട്ടുണ്ട്.പ്രസാദ ഊട്ടിനുള്ള ക്യൂ ഉച്ചയ്ക്ക് 2 മണിക്ക് അവസാനിപ്പിക്കും. തുടർന്ന് ഉച്ചയ്ക്ക് 2 മണി മുതൽ ബുഫേ സംവിധാനം ആരംഭിക്കും. കാളൻ, ഓലൻ, എരിശ്ശേരി, അവിയൽ, പഴംപ്രഥമൻ, മോര്, കായവറവ്, പപ്പടം, അച്ചാർ തുടങ്ങിയ വിഭവങ്ങൾ ഉൾപ്പെടുന്ന സമൃദ്ധമായ ഓണസദ്യയാണ് ഒരുക്കുന്നത്.അന്നലക്ഷ്മി ഹാളിലും അതിനോട് ചേർന്നുള്ള പന്തലിലുമാണ് പ്രസാദ ഊട്ട് നടക്കുക. അന്നലക്ഷ്മി ഹാളിലേക്കുള്ള ക്യൂ സംവിധാനം ക്ഷേത്രക്കുളത്തിന് വടക്കുഭാഗത്ത് ഒരുക്കും.

തിരുവോണത്തിന് മൂന്ന് ശീവേലികൾക്കും ഗജവീരന്മാർ

തിരുവോണദിനത്തിൽ പ്രത്യേക കാഴ്ചശീവേലിയും മേളവും ഉണ്ടാകും. രാവിലെ നടക്കുന്ന കാഴ്ചശീവേലിക്ക് ഗജവീരൻ ബൽറാം, ബാലകൃഷ്ണൻ, ജൂനിയർ വിഷ്ണു എന്നിവർ കോലമേറും.ഉച്ചതിരിഞ്ഞുള്ള ശീവേലിക്ക് ഇന്ദ്രസെൻ, വിനായകൻ, ചെന്താമരാക്ഷൻ എന്നീ ദേവസ്വം കൊമ്പന്മാരും രാത്രി ശീവേലിക്ക് രാജശേഖരൻ, ഗോപാലകൃഷ്ണൻ, ശങ്കരനാരായണൻ എന്നീ ആനകളും കോലമേറും. രാവിലെ ശീവേലിക്ക് കോട്ടപ്പടി സന്തോഷ് മാരാരും സംഘവും മേളം ഒരുക്കും. ഉച്ചകഴിഞ്ഞുള്ള ശീവേലിക്ക് ഗുരുവായൂർ ശശിമാരാരും സംഘവും മേളത്തിന് നേതൃത്വം നൽകും.

തിരുവോണാഘോഷത്തിന് 19.10 ലക്ഷം രൂപ

2026ലെ തിരുവോണാഘോഷ പരിപാടികൾക്കായി 19,10,000 രൂപയുടെ എസ്റ്റിമേറ്റിന് ഗുരുവായൂർ ദേവസ്വം ഭരണസമിതി അംഗീകാരം നൽകി. തിരുവോണാഘോഷവുമായി ബന്ധപ്പെട്ട വിവിധ ചടങ്ങുകൾക്കും സൗകര്യങ്ങൾ ഒരുക്കുന്നതിനുമാണ് തുക വിനിയോഗിക്കുക.

ഓഗസ്റ്റ് 30നും പ്രത്യേക ക്രമീകരണം

ഗുരുവായൂർ ക്ഷേത്രത്തിൽ റെക്കോർഡ് വിവാഹങ്ങൾ നടന്ന ഓഗസ്റ്റ് 23 ഞായറാഴ്ച നടപ്പാക്കിയ ക്രമീകരണങ്ങൾ ഓഗസ്റ്റ് 30 ഞായറാഴ്ചയും തുടരും. ദർശനവും വിവാഹചടങ്ങുകളും സുഗമമായി നടത്തുന്നതിനായി ദേവസ്വം വിപുലമായ സംവിധാനങ്ങളാണ് ഒരുക്കുന്നത്. ഭക്തജനങ്ങളെ സഹായിക്കുന്നതിനായി കൂടുതൽ പൊലീസിനെയും ദേവസ്വം ജീവനക്കാരെയും സേവനസജ്ജരാക്കും. സ്കൂൾ അവധിക്കാലം കൂടി ആയതിനാൽ ഗുരുവായൂരിൽ വൻ ഭക്തജനത്തിരക്ക് പ്രതീക്ഷിക്കുന്നുണ്ട്. ദർശനവും വിവാഹചടങ്ങുകളും ഭംഗിയായി നടത്തുന്നതിനായി ഭക്തജനങ്ങളുടെ അകമഴിഞ്ഞ സഹകരണം ദേവസ്വം ചെയർമാൻ എ.വി. ഗോപിനാഥ് അഭ്യർത്ഥിച്ചു.

ഓണാഘോഷത്തിന്റെ ഭാഗമായി ഗുരുവായൂരിൽ തുടർച്ചയായി എത്തുന്ന വലിയ ഭക്തജനത്തിരക്ക് കണക്കിലെടുത്താണ് ദേവസ്വം വിവിധ നിയന്ത്രണങ്ങളും സൗകര്യങ്ങളും ഏർപ്പെടുത്തിയിരിക്കുന്നത്. പൊതുവരി വഴി എത്തുന്ന ഭക്തർക്ക് പരമാവധി സൗകര്യം ഉറപ്പാക്കുന്നതിനൊപ്പം പ്രധാന ക്ഷേത്രചടങ്ങുകൾ തടസ്സമില്ലാതെ നടത്തുന്നതിനാണ് ഇത്തവണത്തെ ക്രമീകരണങ്ങളുടെ പ്രധാന ലക്ഷ്യം.

1968-ൽ 40 നേന്ത്രക്കുലകൾ; കാലം പിന്നിട്ടപ്പോൾ നൂറുകണക്കിന് കാഴ്ചക്കുലകളുമായി ഭക്തജനങ്ങൾ — ഗുരുവായൂരിലെ ഉത്രാട ആചാരത്തിന് ഇന്നും അതേ ഭക്തിസാന്ദ്രത

ഗുരുവായൂർ: പാരമ്പര്യത്തിന്റെയും ഭക്തിയുടെയും നിറവിൽ ഗുരുവായൂർ ക്ഷേത്രത്തിൽ വീണ്ടും ഉത്രാടം സുദിനം. 2026 ആഗസ്റ്റ് 25 ചൊവ്വാഴ്ച ഗുരുവായൂരപ്പന്റെ സന്നിധിയിൽ നടക്കുന്ന ഉത്രാടം കാഴ്ചക്കുല സമർപ്പണം പഴമയുടെ ഓർമ്മകളും ആചാരപ്പെരുമയും പുതുതലമുറയ്ക്ക് പകർന്നുനൽകുന്ന അപൂർവ ചടങ്ങായി മാറും.

ഗുരുവായൂർ ക്ഷേത്രചരിത്രവുമായി ആഴത്തിൽ ബന്ധപ്പെട്ടു കിടക്കുന്ന പാട്ടക്കുല സമർപ്പണമാണ് കാലക്രമത്തിൽ കാഴ്ചക്കുല സമർപ്പണമായി മാറിയത്. പൗരാണിക കാലഘട്ടത്തിൽ ഗുരുവായൂർ ദേവസ്വത്തിന്റെ ഭൂമികൾ പാട്ടത്തിന് നൽകുന്ന പതിവുണ്ടായിരുന്നു. അന്ന് ക്ഷേത്രത്തിലെ സോപാനവരവുകൾ മേശ്ശാന്തിക്കായിരുന്നു ലഭിച്ചിരുന്നത്. അതിൽനിന്ന് ക്ഷേത്രത്തിന്റെ വിവിധ ചെലവുകൾ മേശ്ശാന്തി തന്നെ നിർവഹിക്കേണ്ടിയിരുന്ന കാലവുമുണ്ടായിരുന്നു.

ഉത്രാടദിവസത്തെ പാട്ടക്കുല സമർപ്പണവും നവമി ദിവസത്തെ ഏകാദശി വിളക്കുമായി ബന്ധപ്പെട്ട ചിലവുകളും മേശ്ശാന്തിയുടെ വകയായിരുന്നു. വൈകുണ്ഠനാഥനായ ഗുരുവായൂരപ്പൻ ജന്മിയായും ഭക്തർ പാട്ടക്കാരായും നിലനിന്നിരുന്ന പഴയ സാമൂഹിക സാഹചര്യത്തിൽ, പാട്ടക്കരം നൽകുന്നവർ തിരുവോണത്തിന് തലേദിവസം കൊടിമരത്തറയിൽ നേന്ത്രക്കുല സമർപ്പിച്ച് ഗുരുവായൂരപ്പനോട് പ്രാർത്ഥിച്ചശേഷം തിരുവോണാഘോഷങ്ങളിൽ പങ്കെടുത്തിരുന്നു.

ഗുരുവായൂർ ക്ഷേത്രത്തിൽ നിലനിന്നിരുന്ന ഈ പൗരാണിക ആചാരം പിന്നീട് കേരളത്തിലെ ഒട്ടേറെ ക്ഷേത്രങ്ങളിലും പ്രധാനപ്പെട്ട ചടങ്ങായി മാറി. ക്ഷേത്രാചാരങ്ങളുടെയും ചടങ്ങുകളുടെയും കാര്യത്തിൽ ഗുരുവായൂർ മാതൃകയായതിന്റെ മറ്റൊരു ഉദാഹരണമായാണ് ഈ പാരമ്പര്യത്തെയും കാണുന്നത്.

പാട്ടക്കുലയിൽ നിന്ന് കാഴ്ചക്കുലയിലേക്ക്

കാലം മാറി. പഴയ ജന്മി–കുടിയാൻ ബന്ധം ഇല്ലാതായി. കോർട്ട് ഓഫ് വാർഡ്സ് ഭരണകാലത്ത് ഗുരുവായൂർ ക്ഷേത്രത്തിലെ മേശ്ശാന്തിക്ക് തോറൻസായ്വ് എന്ന ബ്രിട്ടീഷ് ഭരണാധികാരി പ്രതിമാസം 150 രൂപ ശമ്പളം നിശ്ചയിച്ചതായും രേഖകൾ സൂചിപ്പിക്കുന്നു. ക്ഷേത്രത്തിന്റെ മുഴുവൻ ചെലവുകളും ദേവസ്വം നേരിട്ട് വഹിക്കുന്നതിനുള്ള ക്രമീകരണങ്ങളും പിന്നീട് നിലവിൽ വന്നു.ഇതോടെയാണ് പാട്ടക്കുല എന്ന പഴയ പേരിന് പകരം ‘കാഴ്ചക്കുല’ എന്ന പേര് പ്രചാരത്തിലായത്. കാലക്രമേണ അത് ഭക്തജനങ്ങൾ ഓരോ വർഷവും ഗുരുവായൂരപ്പന് സമർപ്പിക്കുന്ന പവിത്രമായ വഴിപാടായി വളർന്നു.

1968-ൽ 40; പിന്നീട് നൂറുകണക്കിന് കുലകൾ

ഉത്രാടം കാഴ്ചക്കുല സമർപ്പണത്തിന്റെ വളർച്ച വ്യക്തമാക്കുന്ന ചരിത്രസ്മരണകളും ശ്രദ്ധേയമാണ്. 58 വർഷം മുമ്പ്, 1968-ൽ ഉത്രാടം ദിവസം ഭക്തജനങ്ങളുടെ വകയായി 40 നേന്ത്രക്കുലകളാണ് പാട്ടക്കുലയായി സമർപ്പിക്കപ്പെട്ടത്. 1980 ആഗസ്റ്റ് 23-ന് നടന്ന ഉത്രാടം കാഴ്ചക്കുല സമർപ്പണത്തിൽ എണ്ണം 96 ആയി ഉയർന്നു.1971-ൽ ഗുരുവായൂർ ക്ഷേത്രഭരണത്തിൽ ജനാധിപത്യ സ്വഭാവത്തിലുള്ള ഭരണസാരഥ്യം നിലവിൽ വന്നതോടെ കാഴ്ചക്കുല സമർപ്പണത്തിൽ ദേവസ്വം ഭരണസമിതിയുടെ സാന്നിധ്യവും കൂടുതൽ ശ്രദ്ധേയമായി.

1981-ലെ ഉത്രാടം സുദിനത്തിൽ ജഗദ്ഗുരു കാഞ്ചികാമകോടിപീഠം ജയേന്ദ്ര സരസ്വതി സ്വാമികൾ ഗുരുവായൂരപ്പന് കാഴ്ചക്കുല സമർപ്പിച്ചതും ചടങ്ങിന്റെ ചരിത്രത്തിലെ പ്രധാനപ്പെട്ട സംഭവമായി. ഇതോടെ വിശിഷ്ട വ്യക്തികളും ഉത്രാടം ദിവസം ഗുരുവായൂരപ്പന് കാഴ്ചക്കുല സമർപ്പിക്കാൻ എത്തുന്ന പതിവ് കൂടുതൽ ശക്തമായി.

കേരളത്തിന്റെ മുൻ മുഖ്യമന്ത്രി കെ. കരുണാകരൻ ഉൾപ്പെടെയുള്ള പ്രമുഖർ ഉത്രാടം കാഴ്ചക്കുല സമർപ്പിക്കാൻ ഗുരുവായൂരിലെത്തിയിരുന്ന കാലവും ഈ പാരമ്പര്യത്തിന്റെ പ്രാധാന്യം വ്യക്തമാക്കുന്നതാണ്. വിശിഷ്ട വ്യക്തികളും സാധാരണ ഭക്തജനങ്ങളും ഒരുപോലെ കാഴ്ചക്കുല സമർപ്പിക്കാൻ എത്തിത്തുടങ്ങിയതോടെ വർഷംതോറും കാഴ്ചക്കുലകളുടെ എണ്ണത്തിലും വലുപ്പത്തിലും വർധനയുണ്ടായി. പിന്നീട് എണ്ണം നൂറും അതിലധികവുമായി.

ഉത്രാടപ്പുലരിയിലെ ആനകളുടെ ശീവേലി — മറക്കാനാവാത്ത പഴയ കാഴ്ച

ഉത്രാടദിവസത്തെ ഗുരുവായൂർ ക്ഷേത്രത്തിലെ മറ്റൊരു അപൂർവ പാരമ്പര്യവും പഴയ തലമുറയുടെ ഓർമകളിൽ ഇന്നും നിറഞ്ഞുനിൽക്കുന്നു. ഗുരുവായൂരപ്പന്റെ ആനകളെല്ലാം ഉത്രാടം ദിവസം രാവിലെ ശീവേലിക്ക് കൊണ്ടുവരുന്ന പതിവുണ്ടായിരുന്നു. നെറ്റിപ്പട്ടം അണിഞ്ഞ് എല്ലാ ആനകളും ഗുരുവായൂരപ്പന് പ്രദക്ഷിണം വയ്ക്കുന്ന ആ കാഴ്ച അത്യപൂർവമായിരുന്നു. ഇന്നത്തെ സാഹചര്യത്തിൽ അത്തരമൊരു കാഴ്ചയെക്കുറിച്ച് ചിന്തിക്കാൻ പോലും കഴിയാത്തവിധം കാലം മാറിയെങ്കിലും, ആനകളുമായി ബന്ധപ്പെട്ട ആ പഴയ ഉത്രാടസ്മരണകൾ ഗുരുവായൂരിന്റെ ആചാരചരിത്രത്തിലെ വേറിട്ട അധ്യായമാണ്. ശീവേലിക്ക് ശേഷം കാഴ്ചക്കുല സമർപ്പണം പൂർത്തിയായാൽ ആനകൾക്ക് നേന്ത്രപ്പഴം നൽകുന്നതും പതിവായിരുന്നു.

തിരുവോണസദ്യയിലേക്കും പാരമ്പര്യം നീണ്ടു

കാഴ്ചക്കുല സമർപ്പണത്തിന്റെ പാരമ്പര്യവുമായി ബന്ധപ്പെട്ട മറ്റൊരു പ്രധാന അധ്യായമാണ് തിരുവോണസദ്യ. കാഴ്ചക്കുലകളിൽനിന്ന് ആനകൾക്ക് നേന്ത്രപ്പഴം നൽകിയശേഷം, 1992 മുതൽ തിരുവോണം സുദിനത്തിൽ ഭക്തജനങ്ങൾക്കായി പഴപ്രഥമനോടുകൂടിയ വിഭവസമൃദ്ധമായ ഓണസദ്യയും ആരംഭിച്ചു.ഭക്തജനത്തിരക്ക് വർഷംതോറും വർധിച്ചതോടെ കാഴ്ചക്കുല സമർപ്പണത്തിനും ദേവസ്വം ക്യൂ സംവിധാനം ഏർപ്പെടുത്തി. ഇതോടെ വലിയ തോതിൽ എത്തുന്ന ഭക്തജനങ്ങൾക്ക് കൂടുതൽ ക്രമബദ്ധമായി വഴിപാട് നടത്താനുള്ള സൗകര്യവും ലഭിച്ചു.

വീണ്ടും ഉത്രാടം; പഴയ ഓർമ്മകളുമായി ആയിരങ്ങൾ

ഇതാ, വീണ്ടും ഒരു ഉത്രാടം കൂടി. 2026 ആഗസ്റ്റ് 25-ന് ഗുരുവായൂരപ്പന് കാഴ്ചക്കുല സമർപ്പിക്കാൻ ഏറ്റവും മുന്തിയ ഇനം നേന്ത്രക്കുലകളുമായി ഭക്തജനങ്ങൾ ഗുരുപവനപുരിയിൽ എത്തിക്കൊണ്ടിരിക്കുന്നു.ഉത്രാടദിവസം രാവിലെ ശീവേലിക്ക് ശേഷം ഗുരുവായൂരപ്പന്റെ മേശ്ശാന്തി കാഴ്ചക്കുല സമർപ്പിച്ചതോടെ കൊടിമരത്തറയിൽ നേന്ത്രക്കുലകൾ നിറയുന്ന ദൃശ്യമാണ് ഇന്ന് കാണാൻ കഴിഞ്ഞത്. . കാലത്തിന്റെ മാറ്റങ്ങൾക്കിടയിലും പഴമയുടെ പെരുമയും ഭക്തിയുടെ നിറവും ഒത്തുചേരുന്ന അപൂർവ നിമിഷം.ഒരുകാലത്ത് 40 നേന്ത്രക്കുലകളിൽ ആരംഭിച്ച ഈ പാരമ്പര്യം പിന്നീട് 96-ലേക്കും തുടർന്ന് നൂറുകണക്കിന് കാഴ്ചക്കുലകളിലേക്കും വളർന്നു. എണ്ണം കൂടിയെങ്കിലും ആചാരത്തിന്റെ ആത്മാവ് മാറിയിട്ടില്ല — ഗുരുവായൂരപ്പന്റെ തിരുമുമ്പിൽ ഭക്തിപൂർവം സമർപ്പിക്കുന്ന ഒരു നേന്ത്രക്കുല, അതിന്റെ പിന്നിലെ വിശ്വാസം, സമർപ്പണത്തിന്റെ പവിത്രത.

ഉത്രാടം ദിവസം ഗുരുവായൂരിലെ കൊടിമരത്തറയിൽ കാഴ്ചക്കുലകളാൽ നിറയുന്ന കാഴ്ച, പഴമയും വിശ്വാസവും പാരമ്പര്യവും ഒരുമിക്കുന്ന ഗുരുപവനപുരിയുടെ സ്വന്തം ദൃശ്യമാണ്.
ഹന്ത! ഭാഗ്യം ജനാനാം!!

കടപ്പാട് ✍️ : രാമയ്യർ പരമേശ്വരൻ

പലിശ കൊണ്ട് വർഷംതോറും അപ്പം വഴിപാട് നടത്തി സാധുക്കൾക്ക് നൽകണമെന്ന വഴിപാടുകാരിയുടെ അപേക്ഷയ്ക്ക് 1950 മാർച്ച് 31-ന് സാമൂതിരിയുടെ അനുമതി — പഴമയുടെ പെരുമ വിളിച്ചോതി ഗുരുവായൂർ ക്ഷേത്രത്തിലെ ചരിത്രരേഖ

ഗുരുവായൂർ: അഷ്ടമിരോഹിണി ദിനത്തിൽ ഗുരുവായൂരപ്പന് അപ്പം വഴിപാട് നടത്തുന്നത് പൗരാണികകാലം മുതൽ തുടരുന്ന പ്രധാന വഴിപാടുകളിലൊന്നാണ്. അഷ്ടമിരോഹിണിക്ക് പ്രത്യേക ചടങ്ങുകൾ ഇല്ലെങ്കിലും അത്താഴപ്പൂജയിലെ അപ്പം നിവേദ്യത്തിന് വലിയ പ്രാധാന്യമുണ്ട്. പാൽപ്പായസവും അപ്പം നിവേദ്യവും ഉൾപ്പെടെയുള്ള വിവിധ വഴിപാടുകൾ പണ്ടുകാലം മുതലേ ഗുരുവായൂർ ക്ഷേത്രത്തിലെ പ്രധാന ആചാരങ്ങളായി നിലനിന്നിരുന്നു.

കാലം മാറി. ഗുരുവായൂർ ദേശീയ തീർത്ഥാടന കേന്ദ്രമായി വളർന്നു. ഭക്തജനത്തിരക്കും വഴിപാടുകളുടെ എണ്ണവും വർധിച്ചതോടെ അഷ്ടമിരോഹിണി ദിനത്തിലെ അപ്പം വഴിപാടിനും ദേവസ്വം വിപുലമായ സൗകര്യങ്ങൾ ഒരുക്കുന്നുണ്ട്. എന്നാൽ, ഇന്നത്തെ സൗകര്യങ്ങളൊന്നും ലഭ്യമല്ലാതിരുന്ന ഏഴര പതിറ്റാണ്ട് മുമ്പ്, ഗുരുവായൂരപ്പന് അപ്പം വഴിപാട് നടത്താൻ ഭക്തർ സ്വീകരിച്ചിരുന്ന രീതികൾ പഴമയുടെ ഭക്തിസാന്ദ്രമായൊരു ചരിത്രം തന്നെയാണ്.അത്തരമൊരു ചരിത്രസാക്ഷ്യമാണ് നങ്ങാക്കിൽ കുടുംബം 1950-ൽ നടത്തിയ 67 ക. (ക. — അന്നത്തെ നാണയമൂല്യത്തിലുള്ള തുക) സ്ഥിരനിക്ഷേപവും അതിന്റെ പലിശ ഉപയോഗിച്ച് അഷ്ടമിരോഹിണിക്ക് അപ്പം വഴിപാട് നടത്താനുള്ള ക്രമീകരണവും.

ഒരു രൂപയ്ക്ക് 32 അപ്പം ലഭിച്ചിരുന്ന കാലം

പഴയകാലത്ത് അപ്പം വഴിപാടിന്റെ ചെലവും ഇന്നത്തേതിൽ നിന്ന് തികച്ചും വ്യത്യസ്തമായിരുന്നു. ഒരു രൂപയ്ക്ക് 32 അപ്പം വരെ ലഭിച്ചിരുന്ന കാലമുണ്ടായിരുന്നുവെന്ന് പഴമക്കാർ ഓർക്കുന്നു. ഇന്നാകട്ടെ 35 രൂപയ്ക്ക് രണ്ട് അപ്പം എന്ന നിലയിലേക്കാണ് വഴിപാടിന്റെ നിരക്ക് മാറിയിരിക്കുന്നത്. അന്നത്തെ ഗുരുവായൂരിന്റെ സാമൂഹികവും ക്ഷേത്രപരവുമായ അന്തരീക്ഷവും ഇന്നത്തേതിൽ നിന്ന് ഏറെ വ്യത്യസ്തമായിരുന്നു. ക്ഷേത്രത്തിലെ ആവശ്യത്തിന് അപ്പക്കാരെ ലഭിക്കാത്ത അവസരങ്ങളിൽ സമീപത്തെ ബ്രാഹ്മണ കുടുംബങ്ങളിൽ നിന്നുപോലും ആളുകളെ എത്തിച്ചാണ് അപ്പം തയ്യാറാക്കിയിരുന്നത്.

ക്ഷേത്രത്തിലെ പത്തു കാർവാര്യർമാർ ഉരലിലും ഉലക്കയിലും അരിയിടിച്ച് അരിപ്പൊടി തയ്യാറാക്കി, നാലമ്പലത്തിനകത്ത് വ്രതശുദ്ധിയോടെ അപ്പം തയ്യാറാക്കിയിരുന്ന രംഗങ്ങൾ ഗുരുവായൂർ ക്ഷേത്രത്തിന്റെ പഴയകാല ചരിത്രത്തിലെ മറക്കാനാകാത്ത ഏടുകളാണ്. അപ്പം തയ്യാറാക്കുന്നതിന് കൃത്യമായ ആചാരങ്ങളും നടപടിക്രമങ്ങളും പാലിച്ചിരുന്നു.ഇന്നത്തെപ്പോലെ വലിയ ആഘോഷങ്ങളും പതിനായിരക്കണക്കിന് ഭക്തരുടെ തിരക്കും ഇല്ലാതിരുന്ന ആ കാലഘട്ടത്തിൽ, ഗുരുവായൂർ ദേശവാസികൾ അഷ്ടമിരോഹിണി ദിനത്തിൽ ഗുരുവായൂരപ്പന് അപ്പം വഴിപാട് നടത്തുന്നതിൽ പ്രത്യേക ശ്രദ്ധയും ഭക്തിയും പുലർത്തിയിരുന്നു.

പലിശകൊണ്ട് വർഷംതോറും അപ്പം വഴിപാട്

ഇതുമായി ബന്ധപ്പെട്ട് 1950-ലെ സാമൂതിരി രേഖയിൽ കാണുന്ന ഒരു നടപടിയാണ് ഏറെ കൗതുകകരം. നങ്ങാക്കിൽ കെ.പി. തങ്കം എന്ന സ്ത്രീയുടെ പേരിലാണ് 67 ക. ക്ഷേത്രത്തിൽ സ്ഥിരനിക്ഷേപമായി ഏർപ്പെടുത്തിയത്. വഴിപാടുകാരിയുടെ നിർദേശപ്രകാരം, ആ തുകയിൽനിന്നുള്ള പലിശ ഉപയോഗിച്ച് ഓരോ വർഷവും അഷ്ടമിരോഹിണി ദിനത്തിൽ ഗുരുവായൂരപ്പന് അപ്പം വഴിപാട് നടത്തുകയും അത് സാധുക്കൾക്ക് വിതരണം ചെയ്യുകയും ചെയ്യണമെന്നായിരുന്നു നിർദേശം.ഇതിനായി എൻ. കുട്ടിക്കൃഷ്ണൻ 1950 മാർച്ച് 16-ന് ക്ഷേത്രത്തിൽ നടത്തിയ 67 ക. നിക്ഷേപവുമായി ബന്ധപ്പെട്ട് ഗുരുവായൂർ ദേവസ്വം മാനേജർ മാർച്ച് 18-ന് സമർപ്പിച്ച റിപ്പോർട്ടും സാമൂതിരി രാജാവ് പരിഗണിച്ചു.

സാമൂതിരിയുടെ തിട്ടൂരത്തിൽ അനുമതി

റിപ്പോർട്ട് വായിച്ചശേഷം, മേൽപ്പറഞ്ഞ തുക ഡിസ്ട്രിക്ട് കോ-ഓപ്പറേറ്റീവ് ബാങ്കിൽ മൂന്നു വർഷത്തെ സ്ഥിരനിക്ഷേപമായി സൂക്ഷിക്കാനും അതിൽനിന്ന് വർഷംതോറും ലഭിക്കുന്ന പലിശ ഉപയോഗിച്ച് വഴിപാടുകാരിയുടെ അപേക്ഷപ്രകാരമുള്ള വഴിപാട് ക്ഷേത്രത്തിൽ നടത്താനും സാമൂതിരി രാജാവ് അനുമതി നൽകി.കൊല്ലവർഷം 1125 മീനം 12 എന്ന തീയതിയിലുള്ള രേഖയിലാണ് ഈ അനുമതി രേഖപ്പെടുത്തിയിരിക്കുന്നത്. അതായത് ക്രിസ്തുവർഷം 1950 മാർച്ച് 31-നോട് ചേർന്ന കാലഘട്ടത്തിലെ ഈ രേഖ, ഗുരുവായൂർ ക്ഷേത്രത്തിലെ വഴിപാടുകളുടെയും ഭക്തരുടെ സമർപ്പണ മനോഭാവത്തിന്റെയും ചരിത്രപരമായൊരു തെളിവാണ്.

വഴിപാടിനായി ഒരു തുക നേരിട്ട് ചെലവഴിക്കുന്നതിനുപകരം അത് സ്ഥിരനിക്ഷേപമാക്കി, അതിൽനിന്നുള്ള പലിശ ഉപയോഗിച്ച് വർഷംതോറും അപ്പം വഴിപാട് നടത്തുകയും സാധുക്കൾക്ക് വിതരണം ചെയ്യുകയും ചെയ്യണമെന്ന ആശയം തന്നെ അന്നത്തെ ഭക്തരുടെ ദീർഘവീക്ഷണത്തിന്റെയും സാമൂഹിക പ്രതിബദ്ധതയുടെയും ഉദാഹരണമായി കാണാം.

പഴമയുടെ പെരുമയിൽ ഒരു അപൂർവ ക്ഷേത്രരേഖ

ഗുരുവായൂർ ക്ഷേത്രത്തിന്റെ ചരിത്രം പരിശോധിക്കുമ്പോൾ ഇത്തരത്തിലുള്ള പഴയ രേഖകൾക്ക് വലിയ പ്രാധാന്യമുണ്ട്. ക്ഷേത്രത്തിലെ ആചാരങ്ങൾ, വഴിപാടുകൾ, സാമ്പത്തിക ക്രമീകരണങ്ങൾ, ഭക്തരുടെ സമർപ്പണരീതി, ദേവസ്വം ഭരണസംവിധാനം എന്നിവയെക്കുറിച്ചുള്ള നിരവധി വിവരങ്ങൾ ഇത്തരം രേഖകളിലൂടെ അറിയാൻ കഴിയും. അഷ്ടമിരോഹിണി ദിനത്തിൽ ഗുരുവായൂരപ്പന് അപ്പം സമർപ്പിക്കുന്ന പാരമ്പര്യത്തിന് പിന്നിലെ ഭക്തിസാന്ദ്രമായ ചരിത്രവും നങ്ങാക്കിൽ കുടുംബത്തിന്റെ 75 വർഷം പഴക്കമുള്ള ഈ സ്ഥിരനിക്ഷേപവും അതുകൊണ്ടുതന്നെ ഏറെ ശ്രദ്ധേയമാണ്.

ഇന്ന് സൗകര്യങ്ങളും സാങ്കേതിക സംവിധാനങ്ങളും വിപുലമായിരിക്കുമ്പോഴും, ഒരു കുടുംബം ഭക്തിപൂർവം മാറ്റിവെച്ച 67 ക.യുടെ സ്ഥിരനിക്ഷേപം അതിന്റെ പലിശയിലൂടെ വർഷംതോറും ഗുരുവായൂരപ്പന്റെ അപ്പം വഴിപാടായി മാറണമെന്ന ആഗ്രഹം ഗുരുവായൂരിന്റെ പഴമയുടെയും ഭക്തിപാരമ്പര്യത്തിന്റെയും മനോഹരമായൊരു ഓർമപ്പെടുത്തലായി നിലനിൽക്കുന്നു.

കടപ്പാട് ✍️ : രാമയ്യർ പരമേശ്വരൻ

വിവാഹ തിരക്കിൽ ഗുരുവായൂർ ക്ഷേത്രനഗരി; പുലർച്ചെ 4.10ന് ആദ്യ വിവാഹം — ദേവസ്വം ചെയർമാൻ എ.വി. ഗോപിനാഥ് ഭദ്രദീപം തെളിച്ച് ചടങ്ങുകൾക്ക് തുടക്കമിട്ടു

ഗുരുവായൂർ: ഗുരുവായൂർ ക്ഷേത്രത്തിൽ റെക്കോർഡ് വിവാഹങ്ങൾക്ക് മംഗളതുടക്കമായി. പുലർച്ചെ 4.10ന് ക്ഷേത്രത്തിന്റെ കിഴക്കേ നടയിലെ ഒന്നാം നമ്പർ വിവാഹമണ്ഡപത്തിൽ ദേവസ്വം ചെയർമാൻ ശ്രീ. എ.വി. ഗോപിനാഥ് ഭദ്രദീപം തെളിച്ചതോടെയാണ് ഇന്നത്തെ വിവാഹച്ചടങ്ങുകൾക്ക് ഔദ്യോഗിക തുടക്കമായത്.

മംഗളവാദ്യങ്ങളുടെ അകമ്പടിയിൽ നടന്ന ആദ്യ വിവാഹത്തിൽ കണ്ണൂർ–തലശ്ശേരി സ്വദേശി ആർണവ് മോഹൻകുമാർ പഴയങ്ങാടി സ്വദേശിനി വിദ്യാ ആനന്ദ് രാജിന് താലിചാർത്തി. ബന്ധുക്കളുടെയും സുഹൃത്തുക്കളുടെയും സാന്നിധ്യത്തിൽ ക്ഷേത്രസന്നിധിയിൽ നടന്ന വിവാഹച്ചടങ്ങ് ഭക്തിനിർഭരമായ അന്തരീക്ഷത്തിനാണ് സാക്ഷ്യം വഹിച്ചത്.

ഒന്നാം നമ്പർ മണ്ഡപത്തിലെ ആദ്യ വിവാഹച്ചടങ്ങിന് പിന്നാലെ ക്ഷേത്രത്തിലെ മറ്റ് അഞ്ച് വിവാഹമണ്ഡപങ്ങളിലും വിവാഹച്ചടങ്ങുകൾ ആരംഭിച്ചു. പുലർച്ചെ തന്നെ നിരവധി വധൂവരന്മാരും ബന്ധുക്കളും ഗുരുവായൂരിലെത്തിയതോടെ ക്ഷേത്രപരിസരം വിവാഹത്തിരക്കിലായി. തുടർച്ചയായി നടക്കുന്ന വിവാഹച്ചടങ്ങുകൾക്ക് ആവശ്യമായ ക്രമീകരണങ്ങളും സൗകര്യങ്ങളും ദേവസ്വം അധികൃതരുടെ നേതൃത്വത്തിൽ ഒരുക്കിയിട്ടുണ്ട്.

വിവാഹത്തോടനുബന്ധിച്ച് ക്ഷേത്രപരിസരത്ത് ഭക്തജനങ്ങളുടെയും വിവാഹസംഘങ്ങളുടെയും തിരക്ക് വർധിക്കാനുള്ള സാധ്യത കണക്കിലെടുത്ത് ദേവസ്വം ജീവനക്കാരെയും വിവിധ വിഭാഗങ്ങളിലെ ഉദ്യോഗസ്ഥരെയും സേവനത്തിനായി സജ്ജരാക്കിയിരുന്നു. ചടങ്ങുകൾ സുഗമമായി നടത്തുന്നതിനും ഭക്തജനങ്ങൾക്ക് ആവശ്യമായ സൗകര്യങ്ങൾ ഉറപ്പാക്കുന്നതിനുമുള്ള ക്രമീകരണങ്ങളും ഏർപ്പെടുത്തിയിട്ടുണ്ട്.

ദേവസ്വം ഭരണസമിതി അംഗങ്ങളായ ശ്രീ. സി. മനോജ്, ശ്രീ. മനോജ് ബി. നായർ, ശ്രീമതി എം.യു. ഷിനിജ, ഡെപ്യൂട്ടി അഡ്മിനിസ്ട്രേറ്റർമാരായ പ്രമോദ് കളരിക്കൽ, എം. രാധ, പബ്ലിക് റിലേഷൻസ് ഓഫീസർ വിമൽ ജി. നാഥ്, അസിസ്റ്റന്റ് മാനേജർ എ.വി. പ്രശാന്ത്, ഹെൽത്ത് സൂപ്പർവൈസർ എം.എൻ. രാജീവ് തുടങ്ങിയവരും ദേവസ്വം ജീവനക്കാരും ചടങ്ങുകളുടെ നടത്തിപ്പിനായി സന്നിഹിതരായിരുന്നു.

ഗുരുവായൂരപ്പന്റെ സന്നിധിയിൽ വിവാഹിതരാകുന്നതിനായി സംസ്ഥാനത്തിന്റെ വിവിധ ഭാഗങ്ങളിൽനിന്നും പുറത്തുനിന്നും നിരവധി കുടുംബങ്ങളാണ് ഇന്ന് ഗുരുവായൂരിലെത്തിയത്. റെക്കോർഡ് എണ്ണം വിവാഹങ്ങൾ നടക്കുന്ന ദിനമായതിനാൽ ക്ഷേത്രനഗരിയിൽ പുലർച്ചെ മുതൽ തന്നെ പ്രത്യേക ഉണർവാണ് അനുഭവപ്പെട്ടത്.

ഗുരുവായൂരപ്പന്റെ അനുഗ്രഹത്തോടെ പുതിയ ജീവിതത്തിലേക്ക് കടക്കുന്ന വധൂവരന്മാർക്ക് ആശംസകൾ നേർന്ന് ക്ഷേത്രനഗരിയും ഇന്ന് മംഗളനിമിഷങ്ങൾക്ക് സാക്ഷിയാകുകയാണ്.