ശ്രീഗുരുവായൂരപ്പൻ ആഡിറ്റോറിയത്തിൽ അഷ്ടമിരോഹിണി പ്രസാദ ഊട്ട് • തൂശനിലയിൽ വിഭവസമൃദ്ധമായ സദ്യ • രാവിലെ തന്നെ ഭക്തരുടെ വൻ തിരക്ക്

ഗുരുവായൂർ: ഉണ്ണിക്കണ്ണന്റെ പിറന്നാൾ ദിനമായ അഷ്ടമിരോഹിണിയോടനുബന്ധിച്ച് ഗുരുവായൂർ ക്ഷേത്രത്തിൽ ഒരുക്കിയ വിശേഷാൽ പ്രസാദ ഊട്ടിൽ പങ്കെടുത്തത് ആയിരങ്ങൾ. ഭക്തിസാന്ദ്രമായ അന്തരീക്ഷത്തിൽ രാവിലെ ഒമ്പത് മണിയോടെയാണ് ശ്രീഗുരുവായൂരപ്പൻ ആഡിറ്റോറിയത്തിൽ പ്രസാദ ഊട്ട് ആരംഭിച്ചത്. കണ്ണന്റെ പിറന്നാൾ ആഘോഷത്തിന്റെ ഭാഗമായി ഒരുക്കിയ പ്രസാദ ഊട്ടിൽ പങ്കെടുക്കാൻ രാവിലെ തന്നെ നൂറുകണക്കിന് ഭക്തർ എത്തിച്ചേർന്നു. പിന്നീട് ഭക്തരുടെ എണ്ണം വർധിച്ച് വലിയ തിരക്കായി.ശ്രീഗുരുവായൂരപ്പന്റെ ചിത്രത്തിന് മുന്നിൽ അഞ്ച് തിരിയിട്ട നിലവിളക്കിൽ ക്ഷേത്രം തന്ത്രി ബ്രഹ്മശ്രീ പി.സി. ദിനേശൻ നമ്പൂതിരിപ്പാട് ദീപം തെളിച്ചതോടെയാണ് വിശേഷാൽ പ്രസാദ ഊട്ടിന് തുടക്കമായത്. ആചാരാനുഷ്ഠാനങ്ങളുടെ പവിത്രത നിലനിർത്തിയായിരുന്നു ചടങ്ങുകൾ. തുടർന്ന് തൂശനിലയിൽ ശ്രീഗുരുവായൂരപ്പനായി ദേവസ്വം ചെയർമാൻ ശ്രീ എ.വി. ഗോപിനാഥ് വിശേഷാൽ പ്രസാദ ഊട്ട് വിഭവങ്ങൾ വിളമ്പി. അഷ്ടമിരോഹിണി ദിനത്തിന്റെ പ്രത്യേകത നിറഞ്ഞുനിൽക്കുന്ന തരത്തിൽ വൈവിധ്യമാർന്ന വിഭവങ്ങളാണ് പ്രസാദ ഊട്ടിനായി ഒരുക്കിയിരുന്നത്.

വിഭവസമൃദ്ധമായ സദ്യ

ശർക്കരവരട്ടി, കായവറവ്, അച്ചാർ, പച്ചടി, മെഴുക്കുപുരട്ടി, പുളിയിഞ്ചി, പപ്പടം എന്നിവയ്ക്കൊപ്പം ചോറ്, ഓലൻ, എരിശ്ശേരി തുടങ്ങിയ പരമ്പരാഗത കേരളീയ വിഭവങ്ങളും പ്രസാദ ഊട്ടിൽ ഉൾപ്പെടുത്തി.ഗുരുവായൂരപ്പന് നേദിച്ച പാൽപ്പായസം പിറന്നാൾ പ്രസാദ ഊട്ടിന്റെ പ്രധാന ആകർഷണമായി. സദ്യയ്ക്ക് ശേഷം മോരും വിളമ്പി. ആദ്യം ഗുരുവായൂരപ്പന് സമർപ്പിച്ച വിഭവങ്ങൾ പിന്നീട് ഭക്തർക്കും തൂശനിലയിൽ വിളമ്പുകയായിരുന്നു.കണ്ണന്റെ പിറന്നാൾ ദിനത്തിൽ ഗുരുവായൂരിലെത്തിയ ഭക്തർക്ക് ഒരുമിച്ച് ഇരുന്ന് പ്രസാദ ഊട്ടിൽ പങ്കെടുത്ത് അനുഗ്രഹം സ്വീകരിക്കാനുള്ള അവസരമായി ഇത് മാറി. പ്രായഭേദമന്യേ നിരവധി ഭക്തരാണ് പ്രസാദ ഊട്ടിൽ പങ്കെടുത്തത്.

ദേവസ്വം നേതൃത്വത്തിൽ വിപുലമായ ഒരുക്കങ്ങൾ

വിശേഷാൽ പ്രസാദ ഊട്ടിന്റെ നടത്തിപ്പിന് ദേവസ്വം ഭരണസമിതി അംഗം ശ്രീമതി എം.യു. ഷിനിജ, അഡ്മിനിസ്ട്രേറ്റർ ശ്രീ എസ്. ഹരിഗോപാൽ എന്നിവർ നേതൃത്വം നൽകി. ദേവസ്വം ജീവനക്കാരുടെയും ബന്ധപ്പെട്ട പ്രവർത്തകരുടെയും ഏകോപനത്തോടെയാണ് പ്രസാദ ഊട്ട് സുഗമമായി മുന്നോട്ടുപോയത്.അഷ്ടമിരോഹിണി ദിനത്തിൽ ഗുരുവായൂരിലെത്തിയ ഭക്തർക്ക് ക്ഷേത്രദർശനത്തോടൊപ്പം കണ്ണന്റെ പിറന്നാൾ പ്രസാദ ഊട്ടിലും പങ്കെടുക്കാനായത് ആഘോഷത്തിന് കൂടുതൽ ഭക്തിസാന്ദ്രത പകർന്നു.

കണ്ണന്റെ പിറന്നാൾ ദിനത്തിൽ ഗുരുവായൂരപ്പന്റെ പ്രസാദം ഒരുമിച്ച് സ്വീകരിച്ച ആയിരക്കണക്കിന് ഭക്തർക്ക് ഈ വിശേഷാൽ പ്രസാദ ഊട്ട് മറക്കാനാകാത്ത ആത്മീയ അനുഭവമായി മാറി.

അർധരാത്രിയിൽ കൃഷ്ണാവതാരവും വിശ്വരൂപദർശനവും; ഭക്തിസാന്ദ്രമാകും ഗുരുവായൂർ ദേവസ്വത്തിന്റെ അഷ്ടമിരോഹിണി ആഘോഷം

ഗുരുവായൂർ: അഷ്ടമിരോഹിണി ദിനത്തിൽ ശ്രീഗുരുവായൂരപ്പന്റെ ഇഷ്ടകലയായ കൃഷ്ണനാട്ടത്തിന്റെ അവതാരം കഥ മേൽപുത്തൂർ ആഡിറ്റോറിയത്തിൽ അരങ്ങേറും. ശ്രീകൃഷ്ണ ഭഗവാന്റെ ജനനസ്മരണ പുതുക്കുന്ന തരത്തിൽ, അർധരാത്രി 12 മണിയോടെ ഭഗവാന്റെ അവതാരം അരങ്ങിൽ ദർശിക്കാവുന്ന വിധത്തിലാണ് ഗുരുവായൂർ ദേവസ്വം ക്ഷേത്ര കലാനിലയം കൃഷ്ണനാട്ടം അവതരണത്തിന് പ്രത്യേകമായി രംഗാവിഷ്കാരം ചിട്ടപ്പെടുത്തിയിരിക്കുന്നത്.

ചിങ്ങമാസത്തിലെ കൃഷ്ണപക്ഷ അഷ്ടമി തിഥിയും രോഹിണി നക്ഷത്രവും ചേർന്ന ദിവസമാണ് ശ്രീകൃഷ്ണ ഭഗവാന്റെ ജന്മദിനമായി ആചരിക്കുന്നത്. വിശ്വാസപ്രകാരം അർധരാത്രിയിലാണ് ഭഗവാൻ ശ്രീകൃഷ്ണൻ അവതരിച്ചത്. ഈ ദിവ്യസങ്കൽപ്പത്തെ കലാരൂപത്തിലൂടെ ഭക്തർക്ക് അനുഭവവേദ്യമാക്കുന്നതാണ് അഷ്ടമിരോഹിണി നാളിലെ പ്രത്യേക കൃഷ്ണനാട്ടം അവതരണം. പതിവുപോലെ രാത്രി 10 മണിക്ക് കൃഷ്ണനാട്ടം ‘അവതാരം’ കഥയുടെ കളി ആരംഭിക്കും. കഥയുടെ പുരോഗതിക്കൊപ്പം അർധരാത്രിയിലേക്ക് എത്തുമ്പോൾ ശ്രീകൃഷ്ണ ഭഗവാന്റെ ജനനരംഗം അരങ്ങിൽ അവതരിപ്പിക്കും. കൃഷ്ണാവതാരത്തിന്റെ ദർശനത്തിനായി നിരവധി ഭക്തരാണ് ഈ അവസരത്തിൽ മേൽപുത്തൂർ ആഡിറ്റോറിയത്തിലെത്തുക.

അർധരാത്രി 12 മണിക്ക് കൃഷ്ണാവതാരവും തുടർന്ന് വിശ്വരൂപദർശനവും അരങ്ങിൽ ദർശിക്കാനാകുന്ന തരത്തിലാണ് അവതരണം ക്രമീകരിച്ചിരിക്കുന്നത്. ഭഗവാന്റെ അവതാരരംഗം നേരിൽ കണ്ട് ഭക്തിസാന്ദ്രമായ അന്തരീക്ഷത്തിൽ സായൂജ്യ നിർവൃതിയോടെ ഭക്തർ മടങ്ങുന്നതോടെയാണ് ദേവസ്വത്തിന്റെ അഷ്ടമിരോഹിണി ആഘോഷങ്ങൾക്ക് പൂർണത കൈവരിക്കുക.

ഗുരുവായൂർ ക്ഷേത്രത്തിലെ ആചാരാനുഷ്ഠാനങ്ങളോടൊപ്പം ക്ഷേത്രകലകൾക്കും പ്രത്യേക പ്രാധാന്യം നൽകുന്ന ദേവസ്വത്തിന്റെ അഷ്ടമിരോഹിണി ആഘോഷങ്ങളിൽ കൃഷ്ണനാട്ടം അവതാരത്തിന് എന്നും ശ്രദ്ധേയമായ സ്ഥാനമാണുള്ളത്. ഭഗവാന്റെ ജന്മസ്മരണയും കേരളത്തിന്റെ തനത് ക്ഷേത്രകലാപാരമ്പര്യവും ഒരേ വേദിയിൽ സംഗമിക്കുന്ന അപൂർവ അവസരമായിരിക്കും ഇത്തവണത്തെ കൃഷ്ണനാട്ടം അവതാരവും.

മൂന്നു മാസത്തെ ഇടവേളയ്ക്കുശേഷം കളിവിളക്ക് തെളിഞ്ഞു; ആദ്യ കളിയായ ‘അവതാരം’ കാണാൻ നിറഞ്ഞ ഭക്തസദസ്സ് — 364 പേർ വഴിപാട് ശീട്ടാക്കി

ഗുരുവായൂർ: മൂന്നു മാസത്തെ ഇടവേളയ്ക്കുശേഷം ഗുരുവായൂർ ക്ഷേത്രത്തിൽ കൃഷ്ണനാട്ടംകളിക്ക് വീണ്ടും അരങ്ങുണർന്നു. ബുധനാഴ്ച രാത്രി അത്താഴപൂജയും തൃപ്പുകയും പൂർത്തിയാക്കി ശ്രീലകവാതിൽ അടച്ചശേഷം വടക്കേ പ്രദക്ഷിണവരിയിൽ കളിവിളക്ക് തെളിഞ്ഞതോടെയാണ് കൃഷ്ണനാട്ടത്തിന്റെ പുതിയ അരങ്ങിന് തുടക്കമായത്.നിറഞ്ഞ ഭക്തസദസ്സിന് മുന്നിൽ ‘അവതാരം’ കഥയാണ് ആദ്യമായി അരങ്ങേറിയത്. അവതാര കൃഷ്ണനായി നിവേദ് കൃഷ്ണനും, ബലരാമനായി ഹരിശങ്കറും വേഷമിട്ടു. കംസനായി കളിയോഗം ആശാൻ എം.വി. ഉണ്ണികൃഷ്ണൻ വേഷമിട്ടപ്പോൾ ഗോകുലിന്റെ വേഷത്തിൽ ഗോകുൽ (ബ്രഹ്മാവ്), പൂതനയായി വേണുഗോപാൽ, ദേവകിയായി വി.സി. വിഷ്ണു, ഭൂമിദേവിയായി എം.പി. വിഷ്ണുപ്രസാദ്, വസുദേവരായി എം. പ്രമോദ് എന്നിവർ അരങ്ങിലെത്തി. ഗോപസ്ത്രീകളായി നന്ദകിഷോർ കെ., കൃഷ്ണപ്രസാദ് ജെ., ആദിത്യഹരി, ആദർശ് പി. നായർ എന്നിവർ വേഷമിട്ടു. കൃഷ്ണനാട്ടത്തിന്റെ ആദ്യത്തെ വഴിപാടുകളിയായ ‘അവതാരം’ കാണുന്നതിനായി 364 പേർ ശീട്ടാക്കിയിരുന്നു.

581 പേരുടെ വഴിപാടുമായി ‘സ്വയംവരം’

സെപ്റ്റംബർ 3 വ്യാഴാഴ്ച രാത്രി കൃഷ്ണനാട്ടത്തിൽ ‘സ്വയംവരം’ കഥ അരങ്ങേറും. ഈ കളിക്കായി 581 പേർ വഴിപാട് ശീട്ടാക്കിയിട്ടുണ്ട്.‘സ്വയംവരം’ കഥയിൽ ശ്രീകൃഷ്ണനായി ആശാൻ എസ്. മാധവൻകുട്ടിയും, ബലരാമനായി കെ. പ്രശാന്തും വേഷമിടും. സാന്ദീപനിയുടെ വേഷത്തിൽ എ. ഗോകുൽ, ധർമ്മരാജാവായി എൻ. കൃഷ്ണകുമാർ, ശിശുപാലനായി ഒ. രതീഷ്, യവനനായി ആശാൻ എ. മുരളീധരൻ, ദന്തവക്ത്രനായി പി. കൃഷ്ണപ്രകാശ്, രുഗ്മണിയായി എ. ഗോകുൽ, ജാംബവാനായി എ.പി. സത്യനാഥൻ എന്നിവർ അരങ്ങിലെത്തും.ഗോപസ്ത്രീകളായി കൃഷ്ണപ്രസാദ് ജെ., ആദർശ് പി. നായർ, കൈലാസ്നാഥ് ടി.കെ., നിവേദ് കൃഷ്ണ ഇ.എം. എന്നിവർ വേഷമിടും.

അഷ്ടമിരോഹിണിയിൽ പ്രത്യേക അവതരണം

അഷ്ടമിരോഹിണി ദിനത്തോടനുബന്ധിച്ച് കൃഷ്ണനാട്ടത്തിന് പ്രത്യേക സമയക്രമവും ഒരുക്കിയിട്ടുണ്ട്. അന്ന് രാത്രി 10 മണിക്ക് മേൽപ്പുത്തൂർ ഓഡിറ്റോറിയത്തിൽ കൃഷ്ണനാട്ടം ആരംഭിക്കും.പതിവുപോലെ രാത്രി 12 മണിയോടെ കൃഷ്ണാതാരവും വിശ്വരൂപദർശനവും രംഗത്ത് ഭക്തജനങ്ങൾക്ക് ദർശിക്കാനാകുന്ന രീതിയിലാണ് അഷ്ടമിരോഹിണി ദിവസത്തെ കൃഷ്ണനാട്ടം ക്രമീകരിച്ചിരിക്കുന്നത്. കൃഷ്ണലീലകളുടെ ദൃശ്യാവിഷ്കാരവും സംഗീതവും വാദ്യവും ചമയവും സമന്വയിക്കുന്ന ഈ അവതരണം ഭക്തർക്ക് വേറിട്ട അനുഭവമാകും.

അരങ്ങിലും അണിയറയിലും ആശാന്മാരുടെ നേതൃത്വത്തിൽ

കൃഷ്ണനാട്ടത്തിന്റെ പുനരാരംഭത്തിന് അരങ്ങിലും അണിയറയിലും പരിചയസമ്പന്നരായ കലാകാരന്മാരാണ് നേതൃത്വം നൽകുന്നത്. കലാനിലയം സൂപ്രണ്ട് ഡോ. മുരളി പുറനാട്ടുകര, കളിയോഗം ആശാനും തൊപ്പി മദ്ദളം ആശാനുമായ രമേശൻ കരുമത്തിൽ എന്നിവരുടെ നേതൃത്വത്തിലാണ് പ്രവർത്തനങ്ങൾ ഏകോപിപ്പിക്കുന്നത്.വേഷം വിഭാഗത്തിൽ ആശാന്മാരായ എസ്. മാധവൻകുട്ടി, എ. മുരളീധരൻ, എം.വി. ഉണ്ണികൃഷ്ണൻ, പി. അരവിന്ദാക്ഷൻ എന്നിവർ നേതൃത്വം നൽകുന്നു. പാട്ട് വിഭാഗത്തിൽ എം.കെ. ദിൽക്കുഷ്, സി.പി. സത്യനാരായണൻ ഇളയത് എന്നിവർ നേതൃത്വം വഹിക്കുന്നു.ശുദ്ധ മദ്ദളം ആശാൻ പി. രാധാകൃഷ്ണൻ, ചുട്ടി ആശാൻ പി.ആർ. ശിവകുമാർ, ചമയം പി. മുരളീകൃഷ്ണൻ എന്നിവരും കൃഷ്ണനാട്ടത്തിന്റെ അരങ്ങും അണിയറയും സജീവമാക്കുന്നതിൽ നിർണായക പങ്കുവഹിക്കുന്നു.

മൂന്നു മാസത്തെ ഇടവേളയ്ക്കുശേഷം കളിവിളക്ക് വീണ്ടും തെളിഞ്ഞതോടെ ഗുരുവായൂരിലെ രാത്രികൾക്ക് കൃഷ്ണനാട്ടത്തിന്റെ ചാരുതയും ഭക്തിസാന്ദ്രമായ കലാനുഭവവും തിരിച്ചെത്തിയിരിക്കുകയാണ്.

ഭക്തർക്ക് സുഗമ ദർശനത്തിന് വിപുലമായ ക്രമീകരണങ്ങൾ | വിശേഷാൽ പ്രസാദ ഊട്ട് രാവിലെ 9 മുതൽ | വി.ഐ.പി–സ്പെഷ്യൽ ദർശനങ്ങൾക്ക് നിയന്ത്രണം | പിറന്നാൾ ദിനത്തിൽ ഇന്ദ്രസെൻ സ്വർണ്ണക്കോലമേറും

ഗുരുവായൂർ: ഉണ്ണിക്കണ്ണന്റെ പിറന്നാൾ ദിനമായ അഷ്ടമിരോഹിണി മഹോത്സവത്തെ വരവേൽക്കാൻ ഗുരുവായൂർ ശ്രീകൃഷ്ണ ക്ഷേത്രത്തിൽ ഒരുക്കങ്ങൾ പൂർത്തിയായി. വെള്ളിയാഴ്ചയാണ് ഭഗവാൻ ശ്രീകൃഷ്ണന്റെ ജന്മദിനമായ അഷ്ടമിരോഹിണി ആഘോഷിക്കുന്നത്. പിറന്നാൾ ദിനത്തിൽ ക്ഷേത്രത്തിലെത്തുന്ന പതിനായിരക്കണക്കിന് ഭക്തർക്ക് സുഗമമായ ദർശനവും പ്രസാദ ഊട്ടും ഒരുക്കുന്നതിനായി ഗുരുവായൂർ ദേവസ്വം വിപുലമായ ക്രമീകരണങ്ങളാണ് ഏർപ്പെടുത്തിയിരിക്കുന്നത്.

അഭൂതപൂർവമായ ഭക്തജനത്തിരക്ക് പ്രതീക്ഷിക്കുന്നതിനാൽ ദർശന സംവിധാനം, പ്രസാദ ഊട്ട്, എഴുന്നള്ളിപ്പ്, വഴിപാടുകൾ, സുരക്ഷ, ഗതാഗത നിയന്ത്രണം തുടങ്ങിയ മേഖലകളിൽ പ്രത്യേക സംവിധാനങ്ങൾ ഒരുക്കിയിട്ടുണ്ട്. തിരക്ക് നിയന്ത്രിക്കുന്നതിന്റെ ഭാഗമായി വി.ഐ.പി., സ്പെഷ്യൽ ദർശനങ്ങൾക്ക് നിയന്ത്രണം ഏർപ്പെടുത്തും.

അഷ്ടമിരോഹിണി ആഘോഷത്തിന് 36.82 ലക്ഷം രൂപയുടെ എസ്റ്റിമേറ്റ്

അഷ്ടമിരോഹിണി ആഘോഷങ്ങളുടെ നടത്തിപ്പിനായി 36,82,000 രൂപയുടെ എസ്റ്റിമേറ്റിന് ദേവസ്വം ഭരണസമിതി അനുമതി നൽകി. ഭഗവാന്റെ പിറന്നാൾ ദിനത്തിൽ ക്ഷേത്രദർശനത്തിനെത്തുന്ന എല്ലാ ഭക്തർക്കും വിശേഷാൽ പ്രസാദ ഊട്ട് നൽകും.പ്രസാദ ഊട്ടിനായി മാത്രം 24 ലക്ഷം രൂപയുടെ എസ്റ്റിമേറ്റാണ് ഭരണസമിതി അംഗീകരിച്ചിരിക്കുന്നത്. എസ്റ്റിമേറ്റ് തികയാത്ത സാഹചര്യമുണ്ടായാൽ ഭക്തരുടെ ആവശ്യാനുസരണം അധികമായി ഭക്ഷണം തയ്യാറാക്കി വിതരണം ചെയ്യുന്നതിനും അനുമതി നൽകിയിട്ടുണ്ട്.

ഇന്ദ്രസെൻ സ്വർണ്ണക്കോലമേറും; വിശേഷാൽ കാഴ്ചശീവേലി

അഷ്ടമിരോഹിണി ദിനത്തിൽ രാവിലെയും ഉച്ചയ്ക്കും രാത്രിയിലും നടക്കുന്ന വിശേഷാൽ എഴുന്നള്ളിപ്പുകൾക്ക് ദേവസ്വം ഗജവീരൻ ഇന്ദ്രസെൻ സ്വർണ്ണക്കോലമേറും. ദേവസ്വം കൊമ്പന്മാരായ ഗോപാലകൃഷ്ണനും വിനായകനും പറ്റാനകളാകും.രാവിലെ നടക്കുന്ന കാഴ്ചശീവേലിക്ക് ശ്രീ തിരുവല്ല രാധാകൃഷ്ണനും ഗുരുവായൂർ സന്തോഷ് മാരാരും സംഘവും മേളം ഒരുക്കും.ഉച്ചയ്ക്കും രാത്രി വിളക്കിനും നടക്കുന്ന പഞ്ചവാദ്യത്തിൽ പ്രമുഖ കലാകാരന്മാർ അണിനിരക്കും. തിമിലയിൽ ചോറ്റാനിക്കര നന്ദപ്പൻ മാരാരും സംഘവും, മദ്ദളത്തിൽ കലാമണ്ഡലം കുട്ടി നാരായണനും സംഘവും, ഇടയ്ക്കയിൽ പല്ലശ്ശന സുധാകരനും സംഘവും, കൊമ്പിൽ പേരാമംഗലം വിജയനും സംഘവും, ഇലത്താളത്തിൽ പാഞ്ഞാൾ വേലുക്കുട്ടിയും സംഘവും പങ്കെടുക്കും.സന്ധ്യയ്ക്ക് ഗുരുവായൂർ ശശി മാരാരും സംഘവും തായമ്പക അവതരിപ്പിക്കും. രാത്രി വിളക്കിന് വിശേഷാൽ ഇടയ്ക്കയിൽ ഗുരുവായൂർ ശശി മാരാരും, നാദസ്വരപ്രദക്ഷിണത്തിൽ നെന്മാറ കണ്ണനും നേതൃത്വം നൽകും.

പാൽപായസമുൾപ്പെടെ വിഭവസമൃദ്ധമായ പ്രസാദ ഊട്ട്

അഷ്ടമിരോഹിണി ദിനത്തിലെ പ്രധാന പ്രത്യേകതകളിലൊന്നാണ് ശ്രീ ഗുരുവായൂരപ്പന് നേദിച്ച പാൽപായസമുൾപ്പെടെയുള്ള വിശേഷാൽ പ്രസാദ ഊട്ട്.രസകാളൻ, ഓലൻ, അവിയൽ, എരിശ്ശേരി, പച്ചടി, മെഴുക്കുപുരട്ടി, ശർക്കരവരട്ടി, കായ വറവ്, അച്ചാർ, പുളിയിഞ്ചി, പപ്പടം, മോര്, പാൽപായസം തുടങ്ങിയ വിഭവങ്ങളാണ് പ്രസാദ ഊട്ടിൽ ഉൾപ്പെടുത്തുക.

രാവിലെ 9 മുതൽ പ്രസാദ ഊട്ട്

അഷ്ടമിരോഹിണി ദിനത്തിലെ വിശേഷാൽ പ്രസാദ ഊട്ട് രാവിലെ 9 മണിക്ക് ആരംഭിക്കും. ഉച്ചയ്ക്ക് 2 മണിക്ക് പ്രസാദ ഊട്ടിനുള്ള വരിനിൽപ്പ് അവസാനിപ്പിക്കും.അന്നലക്ഷ്മി ഹാളിലും അതിനോട് ചേർന്നുള്ള താൽക്കാലിക പന്തലിലും ശ്രീ ഗുരുവായൂരപ്പൻ ഓഡിറ്റോറിയത്തിലും അതിനോട് ചേർന്ന് ഒരുക്കുന്ന പന്തലിലുമാണ് പ്രസാദ ഊട്ട് വിതരണം ചെയ്യുക.അന്നലക്ഷ്മി ഹാളിലേക്കുള്ള ക്യൂ സംവിധാനം ക്ഷേത്രക്കുളത്തിന്റെ വടക്കുഭാഗത്തും തെക്കേ നടയിലെ ശ്രീ ഗുരുവായൂരപ്പൻ ഓഡിറ്റോറിയത്തിലേക്കുള്ള ക്യൂ പട്ടര്കുളത്തിന്റെ വടക്കുഭാഗത്തുമായി ഒരുക്കും.പ്രസാദ ഊട്ട് സുഗമമായി വിതരണം ചെയ്യുന്നതിനായി ദേവസ്വം ജീവനക്കാർക്ക് പുറമെ 150 പ്രൊഫഷണൽ വിളമ്പുകാരെയും നിയോഗിച്ചിട്ടുണ്ട്.

ശയനപ്രദക്ഷിണമില്ല; സ്പെഷ്യൽ ദർശനത്തിന് നിയന്ത്രണം

അഷ്ടമിരോഹിണി ദിനത്തിലെ വൻ ഭക്തജനത്തിരക്ക് കണക്കിലെടുത്ത് രാവിലെ 6 മണി മുതൽ വി.ഐ.പി., സ്പെഷ്യൽ ദർശനങ്ങൾക്ക് നിയന്ത്രണമുണ്ടാകും. കൂടുതൽ ഭക്തർക്ക് സുഗമമായി ദർശനം ലഭ്യമാക്കുന്നതിനാണ് നടപടി.സീനിയർ സിറ്റിസൺ ദർശനം രാവിലെ 4.30 മുതൽ 5.30 വരെയും വൈകിട്ട് 5 മുതൽ 6 വരെയും അനുവദിക്കും. തദ്ദേശീയർക്ക് ക്ഷേത്രത്തിലെ നിലവിലുള്ള സമയക്രമമനുസരിച്ച് ദർശനം അനുവദിക്കും. മറ്റു സമയങ്ങളിൽ പൊതുവരിസംവിധാനം മാത്രമായിരിക്കും.ക്ഷേത്രത്തിൽ വിശേഷാൽ കാഴ്ചശീവേലി നടക്കുന്നതിനാൽ ശയനപ്രദക്ഷിണത്തിനും ദർശനത്തിനും നിയന്ത്രണം ഉണ്ടായിരിക്കും.

ദർശനം പൂർത്തിയാക്കിയ ഭക്തർ പടിഞ്ഞാറേ ഗോപുരം വഴിയോ ഭഗവതി ക്ഷേത്രം നടവഴിയോ ക്ഷേത്രത്തിന് പുറത്തേക്ക് പോകണമെന്ന് ദേവസ്വം നിർദേശിച്ചിട്ടുണ്ട്. ദർശനം കാത്തുനിൽക്കുന്ന ഭക്തർക്ക് സുഗമമായ ദർശനം ഉറപ്പാക്കുന്നതിനാണ് ഈ ക്രമീകരണം.നിലവിലുള്ള ക്യൂ സംവിധാനം അപര്യാപ്തമാകുന്ന പക്ഷം കിഴക്കേ നടപ്പുരയിലേക്കോ പൂന്താനം ഹാളിലേക്കോ ഭക്തരെ വരിനിർത്തുന്നതിനുള്ള അധിക സൗകര്യവും ഒരുക്കും.ചോറൂൺ വഴിപാട് കഴിഞ്ഞ കുട്ടികൾക്ക് സ്പെഷ്യൽ ദർശനം അനുവദിക്കും. നിർമ്മാല്യം മുതൽ ദർശനത്തിനുള്ള ക്യൂ പതിവുപോലെ ഫ്ലൈഓവർ വഴി ക്ഷേത്രത്തിലേക്ക് പ്രവേശിപ്പിക്കും. സീനിയർ സിറ്റിസൺമാരെയും ഭിന്നശേഷിക്കാരെയും കൊടിമരം വഴി ദർശനത്തിന് അനുവദിക്കും.

അഷ്ടമിരോഹിണി അപ്പം വഴിപാട്; 35 രൂപ നിരക്ക്

അപ്പവും പാൽപായസവുമാണ് അഷ്ടമിരോഹിണി ദിനത്തിലെ പ്രധാന വഴിപാടുകൾ. അപ്പം വഴിപാടിനായി 7.25 ലക്ഷം രൂപയുടെ എസ്റ്റിമേറ്റിന് ഭരണസമിതി അംഗീകാരം നൽകി.ഒരു ശീട്ടിന് 35 രൂപയാണ് നിരക്ക്. ഒരാൾക്ക് പരമാവധി 20 ശീട്ട്, അതായത് 700 രൂപയുടെ അപ്പം ശീട്ടാക്കാം. എന്നാൽ ഒരാൾക്ക് അപ്പം വഴിപാട് 10 ശീട്ടായി, 350 രൂപയായി പരിമിതപ്പെടുത്തിയിട്ടുണ്ട്.ക്ഷേത്രത്തിലെ കൗണ്ടറുകളിലൂടെ മാത്രമായിരിക്കും അപ്പം ശീട്ടാക്കലും വിതരണവും. ചെക്കോ ഡിമാൻഡ് ഡ്രാഫ്റ്റോ സ്വീകരിക്കില്ല.സെപ്റ്റംബർ 3ന് ഉച്ചതിരിഞ്ഞ് 3.30 മുതൽ ക്ഷേത്രത്തിനകത്തും പുറത്തുമുള്ള കൗണ്ടറുകളിൽ അപ്പം വഴിപാട് ശീട്ടാക്കുന്നതിനുള്ള സൗകര്യം ഏർപ്പെടുത്തും.പാൽപായസം വഴിപാടിനായി 10.8 ലക്ഷം രൂപയുടെ എസ്റ്റിമേറ്റിനും ഭരണസമിതി അംഗീകാരം നൽകിയിട്ടുണ്ട്.

കലാപരിപാടികളാൽ സമ്പന്നമാകും അഷ്ടമിരോഹിണി

അഷ്ടമിരോഹിണി ദിനത്തിൽ ഗുരുവായൂരിൽ വിവിധ കലാപരിപാടികളും അരങ്ങേറും.മേൽപ്പത്തൂർ ഓഡിറ്റോറിയത്തിൽ രാവിലെ 6 മുതൽ കൃഷ്ണഗാഥാ പാരായണം നടക്കും. ഡോ. മുരളി പുറനാട്ടുകരയാണ് പാരായണം നടത്തുന്നത്.രാവിലെ 8 മുതൽ ‘ഭക്തിലഹരി’ എന്ന പേരിൽ ഫ്യൂഷൻ മ്യൂസിക് അവതരണം നടക്കും. ശ്രീ ഭവനേഷ്, ശ്രീ രമേഷ്, ശ്രീ കൃഷ്ണകുമാർ എന്നിവർ പങ്കെടുക്കും.രാവിലെ 10.30 മുതൽ കിഴക്കേ നടയിൽ ദേവസഹോദര സംഗമം നടക്കും.ഉച്ചതിരിഞ്ഞ് 2 മുതൽ പ്രശസ്ത സംഗീതജ്ഞരായ ആനയടി പ്രസാദ്, ആറ്റുവാശ്ശേരി മോഹനൻ പിള്ള, എൻ. ഹരി എന്നിവർ നയിക്കുന്ന ‘ശ്രീകൃഷ്ണായനം – കൃഷ്ണഭക്തിഗാനങ്ങളിലൂടെ ഒരു യാത്ര’ അരങ്ങേറും.വൈകിട്ട് 3.30 മുതൽ ‘രാധേശ്യാം’ നൃത്തശിൽപം, വൈകിട്ട് 5 മുതൽ കലാമണ്ഡലം ഗിരിജാദേവിയുടെ നങ്ങ്യാർക്കൂത്ത് എന്നിവ നടക്കും.വൈകിട്ട് 6.30 മുതൽ പത്മശ്രീ ഡോ. കലാമണ്ഡലം ഗോപിയാശാൻ നയിക്കുന്ന കഥകളി അരങ്ങേറും. ‘കുചേലവൃത്തം’ ആണ് കഥ. ഇരിഞ്ഞാലക്കുടയിലെ പാർവ്വതി കലാകേന്ദ്രം കഥകളിയോഗം അവതരണത്തിൽ പങ്കെടുക്കും.

രാത്രി 8.30ന് ക്ഷേത്ര കലാ പുരസ്കാര സമർപ്പണം

രാത്രി 8.30ന് നടക്കുന്ന സാംസ്കാരിക സമ്മേളനത്തിൽ ശ്രീ ഗുരുവായൂരപ്പൻ ക്ഷേത്ര കലാ പുരസ്കാരം സമർപ്പിക്കും. ദേവസ്വം മന്ത്രി കെ. മുരളീധരൻ പുരസ്കാര സമർപ്പണം നിർവഹിക്കും.രാത്രി 10 മുതൽ ക്ഷേത്ര കലാനിലയത്തിന്റെ കൃഷ്ണനാട്ടം – ‘അവതാരം’ അരങ്ങേറും.

ഭക്തരുടെ സഹകരണം അഭ്യർത്ഥിച്ച് ദേവസ്വം

അഷ്ടമിരോഹിണി ആഘോഷവും ക്ഷേത്രദർശനവും സുഗമമായി നടത്തുന്നതിനായി ഭക്തജനങ്ങളുടെ അകമഴിഞ്ഞ സഹകരണവും പിന്തുണയും ഗുരുവായൂർ ദേവസ്വം ഭരണസമിതി അഭ്യർത്ഥിച്ചു.ഭക്തജനത്തിരക്ക് പരമാവധി സുഗമമായി നിയന്ത്രിച്ച് എല്ലാവർക്കും ദർശനസൗകര്യം ഉറപ്പാക്കുന്നതിനാണ് ദേവസ്വം വിവിധ നിയന്ത്രണങ്ങളും ക്രമീകരണങ്ങളും ഏർപ്പെടുത്തിയിരിക്കുന്നത്. ഭക്തർ ദേവസ്വം നിർദേശങ്ങൾ പാലിച്ച് സഹകരിക്കണമെന്ന് ദേവസ്വം ഭരണസമിതി ചെയർമാൻ എ.വി. ഗോപിനാഥും അഡ്മിനിസ്ട്രേറ്റർ എസ്. ഹരിഗോപാലും അഭ്യർത്ഥിച്ചു.

ഗുരുവായൂർ: ഗുരുവായൂർ ക്ഷേത്രത്തിൽ പുണ്യാഹ ചടങ്ങുകൾ നടക്കുന്നതിനാൽ നാളെ (വ്യാഴാഴ്ച) ക്ഷേത്രത്തിൽ ദർശനത്തിന് പ്രത്യേക നിയന്ത്രണം ഏർപ്പെടുത്തി. പുലർച്ചെ 4 മണി മുതൽ രാവിലെ 10 മണി വരെയാണ് ദർശന നിയന്ത്രണം ഉണ്ടായിരിക്കുക.ക്ഷേത്രത്തിലെ പുണ്യാഹ ചടങ്ങുകളുമായി ബന്ധപ്പെട്ട ആചാരാനുഷ്ഠാനങ്ങൾ ക്രമപ്രകാരം നടത്തുന്നതിനായാണ് ഈ സമയത്ത് ഭക്തരുടെ ദർശനത്തിന് നിയന്ത്രണം ഏർപ്പെടുത്തിയിരിക്കുന്നത്. പുലർച്ചെ ദർശനത്തിനായി ക്ഷേത്രത്തിലെത്തുന്ന ഭക്തർ നിയന്ത്രണ സമയം പ്രത്യേകം ശ്രദ്ധിക്കണമെന്ന് ബന്ധപ്പെട്ടവർ അറിയിച്ചു. പുണ്യാഹ ചടങ്ങുകൾ പൂർത്തിയാകുന്നതനുസരിച്ച് രാവിലെ 10 മണിക്ക് ശേഷം ദർശനം സാധാരണ നിലയിലേക്ക് എത്തുമെന്നാണ് പ്രതീക്ഷിക്കുന്നത്.

നാളെ ഗുരുവായൂരിൽ ദർശനത്തിനെത്തുന്ന ഭക്തർ അനാവശ്യ തിരക്ക് ഒഴിവാക്കുകയും ക്ഷേത്ര അധികൃതരുടെ നിർദേശങ്ങൾ പാലിക്കുകയും ചെയ്യുന്നത് ഉചിതമാണ്. ക്ഷേത്രത്തിലെ പ്രധാന ചടങ്ങുകൾക്കും ആചാരങ്ങൾക്കും തടസ്സമുണ്ടാകാത്തവിധം ഭക്തജനങ്ങൾ സഹകരിക്കണമെന്നും അധികൃതർ അഭ്യർഥിച്ചു.