കേരള നല്ലജീവൻ പ്രസ്ഥാനത്തിന്റെ സൈക്കിളോട്ട ഉത്സവം 2026: ആവേശകരമായ മത്സരങ്ങൾക്ക് തുടക്കം
ഗുരുവായൂർ: കേരള നല്ലജീവൻ പ്രസ്ഥാനത്തിന്റെ സൈക്കിൾ വാരാഘോഷത്തിന്റെ ഭാഗമായി, ജീവ ഗുരുവായൂർ വർഷംതോറും ജനുവരി ആദ്യ ഞായറാഴ്ച സംഘടിപ്പിച്ചു വരുന്ന സൈക്കിളോട്ട ഉത്സവം – 2026 ഈ വർഷം ജനുവരി 4-ന് രാവിലെ 7.30ന് ആവേശകരമായി നടന്നു. ബഹുമാനപ്പെട്ട ഗുരുവായൂർ അസിസ്റ്റന്റ് കമ്മിഷണർ ഓഫ് പോലീസ് ശ്രീ സി. പ്രേമാനന്ദ കൃഷ്ണൻ ഫ്ലാഗ് ഓഫ് ചെയ്ത് പരിപാടി ഉദ്ഘാടനം ചെയ്തു.
ചടങ്ങിൽ ഗുരുവായൂർ നഗരസഭ 35-ാം വാർഡ് കൗൺസിലർ ശ്രീ കെ. മഹേഷ്, ചാവക്കാട് നഗരസഭ 8-ാം വാർഡ് കൗൺസിലർ ശ്രീ കെ.സി. സുനിൽ എന്നിവർ സാന്നിധ്യം വഹിച്ചു. ജീവയുടെ രക്ഷാധികാരി ഡോ. പി.എ. രാധാകൃഷ്ണൻ അധ്യക്ഷനായി. അഡ്വ. രവി ചങ്കത്ത് ആമുഖ പ്രഭാഷണം നടത്തി. സെക്രട്ടറി ശിവദാസൻ പി. സ്വാഗതവും ട്രഷറർ പി.എ. പീതാംബരൻ നന്ദിയും പറഞ്ഞു. ജീവയുടെ മുതിർന്ന അംഗം പി.ഐ. സൈമൺ മാസ്റ്റർ പരിപാടികൾക്ക് നേതൃത്വം നൽകി.
നിശ്ചിത സമയത്തിനകം രജിസ്ട്രേഷൻ പൂർത്തിയായിരുന്നുവെങ്കിലും, ഉദ്ഘാടകൻ എത്തുന്നതിൽ ഉണ്ടായ വൈകല്യം കാരണം മത്സരം 7.30ന് മാത്രമാണ് ആരംഭിച്ചത്. 27 പേർ രജിസ്റ്റർ ചെയ്തിരുന്നെങ്കിലും 20 പേരാണ് മത്സരത്തിൽ പങ്കെടുത്തത്.
മത്സരഫലങ്ങൾ:
? ജോയൽ ജോസഫ് ടി. (ബ്രഹ്മകുളം) – 22 മിനിറ്റ് 56 സെക്കന്റ്
? സി.പി. പ്രസാദ് (കണ്ടാണിശ്ശേരി) – 22 മിനിറ്റ് 57 സെക്കന്റ്
? ശ്രാവൺ എം. (കപ്പിയൂർ) – 22 മിനിറ്റ് 59 സെക്കന്റ്
മൈനർ ആയ ധീരജ് 22 മിനിറ്റ് 48 സെക്കന്റിൽ ഏറ്റവും കുറഞ്ഞ സമയം രേഖപ്പെടുത്തിയെങ്കിലും, 18 വയസ്സ് തികയാത്തതിനാൽ വിജയിയായി പ്രഖ്യാപിക്കാനായില്ല. മത്സരത്തിൽ മുഴുവൻ സമയവും പങ്കെടുത്ത 65 വയസ്സുകാരനായ കെ.കെ. പവിത്രൻ (മമ്മിയൂർ) 33.06 മിനിറ്റിൽ ഫിനിഷ് ചെയ്ത് ശ്രദ്ധേയ പ്രകടനം കാഴ്ചവച്ചു.
സൈക്കിളോട്ട ഉത്സവത്തിന് NRI പ്രതിനിധി വത്സൻ പയ്യപ്പാട്ട്, പാലിയേറ്റ് യൂണിറ്റ് പ്രതിനിധി അനിൽ കല്ലാട്ട്, മാധ്യമ പ്രവർത്തകർ തുടങ്ങിയവരുടെ സഹകരണം വിലപ്പെട്ടതായിരുന്നു. ഫലപ്രഖ്യാപനത്തിന് ശേഷം രാവിലെ 9.30ഓടെ പരിപാടികൾ സമാപിച്ചു.
ട്രാഫിക് തിരക്ക് പരിഗണിച്ച്, അടുത്ത വർഷം മുതൽ കൃത്യസമയത്ത് മത്സരം ആരംഭിച്ച് 8.30നകം ഫലപ്രഖ്യാപനം പൂർത്തിയാക്കുന്നതിനും, മത്സരാർത്ഥികൾക്ക് മത്സരശേഷം ഉടൻ സർട്ടിഫിക്കറ്റുകൾ നൽകുന്നതിനും ശ്രമിക്കണമെന്ന് സംഘാടകർ വിലയിരുത്തി. ഈ അനുഭവങ്ങൾ ഉൾക്കൊണ്ട് അടുത്ത വർഷത്തെ സൈക്കിളോട്ട ഉത്സവം കൂടുതൽ കുറ്റമറ്റതാകട്ടെ എന്ന പ്രതീക്ഷയും പങ്കുവെച്ചു.
