എറണാകുളം : എയർ ഇന്ത്യ വിമാനം അപ്രതക്ഷീതമായി റദ്ദാക്കി. കൊച്ചി നെടുമ്പാശേരി വിമാനത്താവളത്തിൽ നിന്നും ഡൽഹിയിലേക്ക് പോകുന്ന വിമാനമാണ് റദ്ദാക്കിയത്. ഉച്ചയ്‌ക്ക് ശേഷം പുറപ്പെടാനിരുന്ന എ.ഐ. 419 വിമാനമാണ് അപ്രതീക്ഷിതമായി റദ്ദാക്കിയത്.
യാതൊരു മുന്നറിയിപ്പുമില്ലാതെ വിമാനം റദ്ദാക്കിയതോടെ യാത്രക്കാർ വിമാനത്താവളത്തിൽ പ്രതിഷേധിച്ചു. യാത്രക്കാരും ജീവനക്കാരും തമ്മിൽ വാക്കേറ്റമുണ്ടാവുകയും ചെയ്തു. ഉച്ചയ്‌ക്ക് 12.25-ന് പോകേണ്ടിയിരുന്ന എയർ ഇന്ത്യയുടെ കൊച്ചി-ലണ്ടൻ വിമാനം തകരാറായതാണ് പ്രതിസന്ധിയ്‌ക്ക് ഇടയാക്കിയത്. ഇതോടെ ഡൽഹിയിലേക്ക് പോകേണ്ടിയിരുന്ന വിമാനം ലണ്ടനിലേക്ക് സർവീസ് നടത്തുകയായിരുന്നു.
കൊച്ചി-ഡൽഹി വിമാനത്തിൽ 139 യാത്രക്കാരാണ് പോകാനായി എത്തിയത്. വൈകിട്ട് ആറ് മണിയ്‌ക്ക് പുറപ്പെടുമെന്ന് അറിയിച്ചെങ്കിലും പിന്നീട് സർവീസ് റദ്ദാക്കി.യാത്ര മുടങ്ങിയതോടെ യാത്രക്കാർ വിമാനത്താവളത്തിൽ ബഹളം വയ്‌ക്കുകയായിരുന്നു.
