ചുറ്റമ്പലത്തിന് നവസൗന്ദര്യം പകർന്ന വഴിപാട്; ഗോവിന്ദ് ഗ്രൂപ്പിന്റെ നേതൃത്വത്തിൽ നവീകരണ പ്രവർത്തനങ്ങൾ പൂർത്തിയായി
ഗുരുവായൂർ: ഭക്തരുടെ ആത്മീയാനുഭവങ്ങൾക്ക് കൂടുതൽ ദിവ്യത പകരുന്ന രീതിയിൽ ഗുരുവായൂർ ശ്രീകൃഷ്ണക്ഷേത്രത്തിലെ ചുറ്റമ്പലത്തിലെ നാല് ദീപസ്തംഭങ്ങൾ നവീകരിച്ച് ദേവസ്വത്തിന് സമർപ്പിച്ചു. കൊടിമരത്തിന്റെ ഇരുവശങ്ങളിലും, ശ്രീഅയ്യപ്പനടയിലും, പടിഞ്ഞാറെ നടയിലുമായി സ്ഥാപിച്ചിരുന്ന ദീപസ്തംഭങ്ങളാണ് സമഗ്രമായി നവീകരിച്ച് പുതുമോടിയോടെ ഭക്തർക്കായി സമർപ്പിച്ചത്.
ദീപാരാധനയ്ക്ക് മുന്നോടിയായി നടന്ന തിരി തെളിയിക്കുന്ന ചടങ്ങ് ഭക്തിസാന്ദ്രമായ അന്തരീക്ഷത്തിലാണ് സംഘടിപ്പിച്ചത്. ചടങ്ങിൽ ഗുരുവായൂർ ദേവസ്വം ചെയർമാൻ എ. വി. ഗോപിനാഥ് എം.എൽ.എ, ക്ഷേത്രം ഡെപ്യൂട്ടി അഡ്മിനിസ്ട്രേറ്റർ എം. രാധ, അസിസ്റ്റന്റ് മാനേജർ ലെജുമോൾ, സി.എസ്.ഒ. മോഹൻകുമാർ, ഓതിക്കൻ കക്കാട് വാസുദേവൻ നമ്പൂതിരി എന്നിവർ പങ്കെടുത്തു.
അടുത്തിടെ കിഴക്കെ നടയിലെ ദീപസ്തംഭങ്ങൾ നവീകരിച്ചതിന്റെ തുടർച്ചയായാണ് ചുറ്റമ്പലത്തിലെ ഈ നാല് ദീപസ്തംഭങ്ങളും നവീകരിച്ചത്. ക്ഷേത്രത്തിന്റെ പാരമ്പര്യ ഭംഗിയും ആത്മീയ പ്രൗഢിയും കൂടുതൽ ഉയർത്തിക്കാട്ടുന്ന രീതിയിലാണ് നവീകരണ പ്രവർത്തനങ്ങൾ പൂർത്തിയാക്കിയത്. സന്ധ്യാ ദീപാരാധന വേളയിൽ തെളിയുന്ന ഈ ദീപസ്തംഭങ്ങൾ ഇനി മുതൽ ഭക്തർക്കും സന്ദർശകർക്കും കൂടുതൽ മനോഹരമായ ദൃശ്യാനുഭവം സമ്മാനിക്കും.
ദീപസ്തംഭങ്ങൾ സമർപ്പിച്ച ഗുരുവായൂർ ഗോവിന്ദ് ഗ്രൂപ്പിലെ കുടുംബാംഗങ്ങൾ തന്നെയാണ് നവീകരണ പ്രവർത്തനങ്ങളുടെ മുഴുവൻ ചെലവും വഴിപാടായി ഏറ്റെടുത്തത്. ഭക്തിപൂർവമായ ഈ സമർപ്പണം ക്ഷേത്രത്തോടുള്ള അവരുടെ ആത്മസമർപ്പണത്തിന്റെയും സേവന മനോഭാവത്തിന്റെയും ഉദാത്ത മാതൃകയായി മാറുകയാണ്. നവീകരണ പ്രവർത്തനങ്ങൾക്ക് മേൽനോട്ടം വഹിച്ച നടവരമ്പ് ഉണ്ണികൃഷ്ണ മേനോനെയും, പ്രവർത്തനങ്ങൾ നിർവഹിച്ച ശില്പികളെയും ചടങ്ങിൽ ആദരിച്ചു. അശ്വനി, ഗോവിന്ദ് ഗ്രൂപ്പുകളുടെ ചെയർമാനായ അച്യുതൻകുട്ടി ഉപഹാരങ്ങൾ നൽകി അവരുടെ സേവനത്തെ അനുമോദിച്ചു.
ക്ഷേത്രത്തിലെ പൈതൃക സൗന്ദര്യവും വിശുദ്ധിയും സംരക്ഷിക്കുന്നതോടൊപ്പം ഭക്തർക്കായി കൂടുതൽ മനോഹരമായ ദർശനാന്തരീക്ഷം ഒരുക്കുന്ന ഇത്തരം നവീകരണ പ്രവർത്തനങ്ങൾ ഗുരുവായൂർ ക്ഷേത്രത്തിന്റെ ആത്മീയ പൈതൃക സംരക്ഷണത്തിന് പുതിയ കരുത്ത് പകരുന്നതായി ഭക്തർ അഭിപ്രായപ്പെട്ടു.