തുടർഭരണത്തിന് തിരിച്ചടി സൂചന: എൽഡിഎഫിന് ഭൂരിപക്ഷം നഷ്ടമാകുമെന്ന് പ്രവചനം, എൻഡിഎക്കും സീറ്റുസാധ്യത
കേരള നിയമസഭാ തിരഞ്ഞെടുപ്പിൽ ഭരണതുടർച്ച ഉണ്ടാകില്ലെന്ന സൂചന നൽകി വിവിധ എക്സിറ്റ് പോൾ ഫലങ്ങൾ പുറത്തുവന്നു. യുഡിഎഫ് വീണ്ടും അധികാരത്തിലെത്തുമെന്ന് പ്രവചിച്ച് വന്ന കണക്കുകൾ സംസ്ഥാന രാഷ്ട്രീയത്തിൽ വലിയ ചർച്ചകൾക്ക് വഴിയൊരുക്കിയിരിക്കുകയാണ്. വിവിധ ദേശീയ-സ്വകാര്യ ഏജൻസികൾ പുറത്തുവിട്ട എക്സിറ്റ് പോൾ ഫലങ്ങൾ യുഡിഎഫിന് വ്യക്തമായ മുൻതൂക്കം നൽകുന്നു.
AXIS MY INDIA പുറത്തുവിട്ട കണക്കുകൾ പ്രകാരം യുഡിഎഫ് 78 മുതൽ 90 വരെ സീറ്റുകൾ നേടി ഭരണം പിടിക്കുമെന്നാണ് പ്രവചനം. എൽഡിഎഫിന് 49 മുതൽ 62 വരെ സീറ്റുകൾ ലഭിക്കുമെന്നും എൻഡിഎയ്ക്ക് 0 മുതൽ 3 വരെ സീറ്റുകൾ നേടാനാകുമെന്നും റിപ്പോർട്ടിൽ പറയുന്നു.
അതേസമയം പി മാർക്ക് എക്സിറ്റ് പോൾ ഫലവും സമാനമായ ചിത്രം തന്നെയാണ് നൽകുന്നത്. യുഡിഎഫ് 71 മുതൽ 79 വരെ സീറ്റുകൾ നേടി ഭരണം പിടിക്കുമെന്നാണ് പ്രവചനം. എൽഡിഎഫിന് 62 മുതൽ 69 വരെ സീറ്റുകളും എൻഡിഎയ്ക്ക് 1 മുതൽ 4 വരെ സീറ്റുകളും ലഭിക്കാമെന്നാണ് കണക്കുകൾ.
ഐസിപിഎൽ പുറത്തുവിട്ട എക്സിറ്റ് പോൾ ഫലവും യുഡിഎഫിന് അനുകൂലമാണ്. യുഡിഎഫ് 63 മുതൽ 74 വരെ സീറ്റുകൾ നേടുമെന്നും എൽഡിഎഫ് 58 മുതൽ 70 വരെ സീറ്റുകൾ സ്വന്തമാക്കുമെന്നും റിപ്പോർട്ട് വ്യക്തമാക്കുന്നു. എൻഡിഎയ്ക്ക് 2 മുതൽ 5 വരെ സീറ്റുകൾ നേടാനാകുമെന്ന പ്രവചനവുമുണ്ട്.
ടൈംസ് ഓഫ് ഇന്ത്യയും CNN-News18ഉം പുറത്തുവിട്ട എക്സിറ്റ് പോൾ ഫലങ്ങളും യുഡിഎഫ് വിജയസാധ്യത ശക്തമാണെന്ന് ചൂണ്ടിക്കാട്ടുന്നു. വോട്ടെടുപ്പിന് മുൻപായി പുറത്തുവന്ന അഭിപ്രായ സർവേകൾ കലർന്ന സൂചനകളായിരുന്നു നൽകിയത്. ഒരു മുന്നണിക്കും വ്യക്തമായ ഭൂരിപക്ഷസാധ്യത നൽകാതിരുന്ന സാഹചര്യത്തിൽ എക്സിറ്റ് പോൾ ഫലങ്ങൾ രാഷ്ട്രീയ ആവേശം കൂടുതൽ ശക്തമാക്കിയിരിക്കുകയാണ്.
കേരളത്തോടൊപ്പം പശ്ചിമ ബംഗാൾ, അസം, തമിഴ്നാട്, പുതുച്ചേരി എന്നിവിടങ്ങളിലെയും തിരഞ്ഞെടുപ്പ് ഫലങ്ങൾ പുറത്തുവന്നിട്ടുണ്ട്. അഞ്ച് സംസ്ഥാനങ്ങളിലെയും തിരഞ്ഞെടുപ്പ് ഫലം അറിയാൻ ഇനി അഞ്ച് ദിവസം മാത്രം ബാക്കി നിൽക്കുന്നതിനാൽ രാഷ്ട്രീയ പാർട്ടികളും പ്രവർത്തകരും വലിയ പ്രതീക്ഷയോടെയാണ് കാത്തിരിക്കുന്നത്.
അന്തിമഫലം എക്സിറ്റ് പോൾ കണക്കുകളെ ശരിവെക്കുമോ എന്ന ആകാംക്ഷയിലാണ് കേരള രാഷ്ട്രീയ ലോകം.