ഗുരുവായൂർ ക്ഷേത്രത്തിൽ കുഞ്ഞുങ്ങൾക്കുള്ള ചോറൂൺ വഴിപാട് ഹാൾ ശീതീകരിച്ചു.

ഗുരുവായൂർ ക്ഷേത്രത്തിലെത്തുന്ന കുഞ്ഞുങ്ങൾക്ക് ഇനി ഏ.സി. ഹാളിൽ ചോറൂൺ നൽകാം. ശീതീകരിച്ച ചോറൂൺ വഴിപാട് ഹാളിൻ്റെ സമർപ്പണം വെളളിയാഴ്ച വൈകുന്നേരം നടന്നു. ദീപാരാധനയ്ക്ക് ശേഷം ആറേമുക്കാൽ മണിയോടെ നടന്ന ചടങ്ങിൽ ദേവസ്വം ചെയർമാൻ ഡോ വി കെ വിജയൻ ചോറൂൺ ഹാളിൽ നിലവിളക്കു തെളിയിച്ചു. ശീതികരിച്ച ഹാളിൻ്റെ സമർപ്പണവും അദ്ദേഹം നിർവ്വഹിച്ചു.

ദേവസ്വം അഡ്മിനിസ്ട്രേറ്റർ കെ പി വിനയൻ, ഡപ്യൂട്ടി അഡ്മിനിസ്ട്രേറ്റർ ടി.രാധിക, ഇലക്ട്രിക്കൽ എക്സിക്യൂട്ടീവ് എൻജിനീയർ പി ജയരാജൻ, ദേവസ്വം ജീവനക്കാർ എന്നിവർ ചടങ്ങിൽ സന്നിഹിതരായി. നാല് ടൺ കപ്പാസിറ്റിയുള്ള 5 ഏ സിയാണ് ചോറുൺ ഹാളിൽ സ്ഥാപിച്ചത്. ദേവസ്വത്തിൻ്റെ തന്നെ പണം ചെലവഴിച്ചാണ് ഏ സി സംവിധാനം ഒരുക്കിയത്.