ലഹരിക്കെതിരെ യുവജനങ്ങൾ പ്രതിജ്ഞയെടുത്തു; ഗുരുവായൂരിൽ യൂത്ത് കോൺഗ്രസ്സ് നേതൃത്വത്തിൽ പരിപാടി
ഗുരുവായൂർ: യൂത്ത് കോൺഗ്രസ്സ് ഗുരുവായൂർ മണ്ഡലം കമ്മിറ്റിയുടെ ആഭിമുഖ്യത്തിൽ യൂത്ത് കോൺഗ്രസ്സ് സ്ഥാപകദിനവും ക്വിറ്റ് ഇന്ത്യാ ദിനാചരണവും വിവിധ പരിപാടികളോടെ ആചരിച്ചു. രാജ്യത്തിന്റെ സ്വാതന്ത്ര്യസമര ചരിത്രത്തെയും യുവജനങ്ങളുടെ സാമൂഹിക ഉത്തരവാദിത്വത്തെയും ഓർമപ്പെടുത്തുന്നതിനൊപ്പം, ലഹരിയുടെ വ്യാപനത്തിനെതിരെ ശക്തമായ ബോധവത്കരണ സന്ദേശം ഉയർത്തിപ്പിടിച്ചായിരുന്നു പരിപാടി.
ഗുരുവായൂർ പടിഞ്ഞാറെ നടയിൽ നടന്ന ചടങ്ങിൽ യൂത്ത് കോൺഗ്രസ്സ് ഗുരുവായൂർ മണ്ഡലം പ്രസിഡന്റ് കെ.കെ. രഞ്ജിത്ത് പതാക ഉയർത്തി. തുടർന്ന് രാജ്യത്തിന്റെ സ്വാതന്ത്ര്യസമര പാരമ്പര്യവും യുവജന സംഘടനകളുടെ സാമൂഹിക ഇടപെടലുകളും അനുസ്മരിച്ചു.
ഇന്നത്തെ യുവതലമുറയെ ഗുരുതരമായി ബാധിച്ചുകൊണ്ടിരിക്കുന്ന ലഹരി ഉപയോഗത്തിനെതിരെ പ്രവർത്തിക്കാനുള്ള പ്രതിജ്ഞയും ചടങ്ങിൽ നടന്നു. യുവാക്കളെ ലഹരിയുടെ പിടിയിൽ നിന്ന് സംരക്ഷിക്കുന്നതിനും സമൂഹത്തിൽ ലഹരിവിരുദ്ധ സന്ദേശം ശക്തമായി എത്തിക്കുന്നതിനും യൂത്ത് കോൺഗ്രസ്സ് പ്രവർത്തകർ സജീവമായി രംഗത്തിറങ്ങണമെന്ന് ചടങ്ങിൽ ആഹ്വാനം ചെയ്തു. യൂത്ത് കോൺഗ്രസ്സ് സംസ്ഥാന സെക്രട്ടറി നിഖിൽ ജി. കൃഷ്ണൻ പരിപാടി ഉദ്ഘാടനം ചെയ്തു. സംസ്ഥാന സെക്രട്ടറി സി.എസ്. സൂരജ് മുഖ്യപ്രഭാഷണം നടത്തി.
നിയോജകമണ്ഡലം സെക്രട്ടറിമാരായ വി.എസ്. നവനീത്, വിശാഖ്, സുബീഷ് കെ.ആർ., യു.ഡി.എഫ് ഗുരുവായൂർ മണ്ഡലം ചെയർമാൻ പ്രതീഷ് ഓടാട്ട്, ഗുരുവായൂർ മണ്ഡലം കോൺഗ്രസ്സ് കമ്മിറ്റി ഭാരവാഹികളായ മിഥുൻ പൂക്കൈതക്കൽ, കൃഷ്ണദാസ് പൈക്കാട്ട് എന്നിവർ സംസാരിച്ചു. യൂത്ത് കോൺഗ്രസ്സ് മണ്ഡലം ഭാരവാഹികളായ മനീഷ് നീലമന, വിഷ്ണു തിരുവെങ്കിടം, ഡിപിൻ ചാമുണ്ടേശ്വരി, നിധിൻ എം.ജി., ഹരി, അനിൽകുമാർ, ജോയൽ എൻ.ജെ. എന്നിവർ പരിപാടികൾക്ക് നേതൃത്വം നൽകി.
സ്വാതന്ത്ര്യസമരത്തിന്റെ ത്യാഗപൂർണമായ ചരിത്രത്തെ പുതുതലമുറയ്ക്ക് പരിചയപ്പെടുത്തുന്നതിനും രാജ്യത്തിന്റെ ജനാധിപത്യ മൂല്യങ്ങൾ സംരക്ഷിക്കുന്നതിൽ യുവജനങ്ങളുടെ പങ്ക് ഓർമപ്പെടുത്തുന്നതിനും പരിപാടി വേദിയായി. അതോടൊപ്പം, ലഹരിവിരുദ്ധ പ്രവർത്തനങ്ങൾക്ക് കൂടുതൽ ഊർജം പകരണമെന്ന സന്ദേശവും ചടങ്ങിൽ ഉയർന്നു..