ഗുരുവായൂർ: ലിറ്റിൽ ഫ്ലവർ ഓട്ടോണമസ് കോളേജിൽ ‘കരിയർ ലോഞ്ച് 2026’ എന്ന പേരിൽ സംഘടിപ്പിച്ച തൊഴിൽ മേള ശ്രദ്ധേയമായി. 2026 ഫെബ്രുവരി 10, 11 തീയതികളിലായി നടന്ന മേളയിൽ “പഠനത്തോടൊപ്പം തന്നെ തൊഴിൽ” എന്ന ലക്ഷ്യമാണ് മുൻനിർത്തിയത്. വിവിധ തൊഴിൽ അവസരങ്ങളിലേക്കായി നടന്ന റിക്രൂട്ട്മെന്റ് നടപടികളിൽ ആകെ 605 വിദ്യാർത്ഥിനികൾ പങ്കെടുത്തു. ഇതിൽ 248 പേർക്ക് വിവിധ പ്രമുഖ സ്ഥാപനങ്ങളിൽ നിന്നുള്ള തൊഴിൽ വാഗ്ദാനം ഇതിനകം ലഭ്യമായി കഴിഞ്ഞു.
ഷെക്കെയ്ന ടിവി, ടെക് മഹീന്ദ്ര, എസ്ബിഐ ലൈഫ്, എച്ച്ഡിഎഫ്സി ബാങ്ക്, ആക്സിസ് ബാങ്ക് ഉൾപ്പെടെ 22 പ്രമുഖ സ്ഥാപനങ്ങളാണ് വിദ്യാർത്ഥിനികളെ തിരഞ്ഞെടുക്കുന്നതിനായി ക്യാമ്പസിലെത്തിയത്. പഠനം പൂർത്തിയാക്കുന്ന മുറയ്ക്ക് തന്നെ തൊഴിൽ മേഖലയിലേക്ക് പ്രവേശിക്കാൻ വിദ്യാർത്ഥികളെ പ്രാപ്തരാക്കുക എന്ന ഉദ്ദേശത്തോടെയാണ് ലിറ്റിൽ ഫ്ലവർ കോളേജ് ഇത്തരം മേളകൾക്ക് വേദിയൊരുക്കുന്നത്. തൊഴിൽ വിപണിയിലെ നൂതന സാധ്യതകൾ വിദ്യാർത്ഥികൾക്ക് നേരിട്ട് പരിചയപ്പെടാൻ ഈ സംരംഭം അവസരമൊരുക്കി.
സ്ത്രീ ശാക്തീകരണത്തിന്റെ ഭാഗമായി വിദ്യാർത്ഥിനികൾ പഠനം കഴിഞ്ഞ് ഇറങ്ങുമ്പോൾ തന്നെ മികച്ച തൊഴിലുകളിൽ പ്രവേശിക്കുക എന്നത് കോളേജിന്റെ സ്വപ്നമാണെന്ന് പ്രിൻസിപ്പൽ സിസ്റ്റർ ഡോ. ജെന്നി തെരേസ് വ്യക്തമാക്കി. കോളേജ് പ്ലേസ്മെന്റ് ഓഫീസർ സി.എഫ്. ലിൻസൺ, കരിയർ ഗൈഡൻസ് സെൽ കോർഡിനേറ്റർ ഡോ. തനൂജ മാത്യു എന്നിവർ തൊഴിൽ മേളയുടെ വിവിധ പ്രവർത്തനങ്ങൾക്ക് നേതൃത്വം നൽകി. ഗുരുവായൂർ മേഖലയിലെ ഉന്നത വിദ്യാഭ്യാസ രംഗത്ത് വിദ്യാർത്ഥികളുടെ കരിയർ വികസനത്തിന് ഈ മേള വലിയ മുതൽക്കൂട്ടായി.
