നൂറോളം അമ്മമാർക്ക് പെൻഷൻ, അന്നദാനം, ചികിത്സാ ധനസഹായം – മമ്മിയൂരിൽ സുവിതം ഫൗണ്ടേഷന്റെ സ്നേഹസംഗമം
ഗുരുവായൂർ: സ്നേഹവും കരുതലും മാനവികതയും ഒത്തുചേരുന്ന സാന്ത്വന വേദിയായി മമ്മിയൂർ മാതാ ഹാളിൽ സംഘടിപ്പിച്ച ‘സുവിതം സംഗമം’ സമൂഹത്തിന്റെ ശ്രദ്ധ നേടി. ജീവകാരുണ്യ രംഗത്ത് സജീവമായ സുവിതം ഫൗണ്ടേഷന്റെ നേതൃത്വത്തിൽ നടന്ന സംഗമത്തിൽ നൂറോളം അമ്മമാർക്ക് പെൻഷൻ വിതരണം ചെയ്യുകയും, അന്നദാനവും നിർധനരായ രോഗികൾക്ക് ചികിത്സാ ധനസഹായവും നൽകുകയും ചെയ്തു.
കേരള ഹോട്ടൽ ആൻഡ് റസ്റ്റോറന്റ് അസോസിയേഷൻ പ്രസിഡന്റ് ഒ.കെ.ആർ. മണികണ്ഠൻ അദ്ധ്യക്ഷത വഹിച്ച ചടങ്ങ് ഗുരുവായൂർ നഗരസഭ ചെയർപേഴ്സൺ സുനിത അരവിന്ദൻ ഉദ്ഘാടനം ചെയ്തു. സമൂഹത്തിലെ അവശ വിഭാഗങ്ങൾക്ക് കൈത്താങ്ങാകുന്ന ഇത്തരം പ്രവർത്തനങ്ങൾ മാതൃകാപരമാണെന്ന് ഉദ്ഘാടന പ്രസംഗത്തിൽ അവർ പറഞ്ഞു.
നഗരസഭ കൗൺസിലർ ശോഭ ഹരി നാരായണൻ പെൻഷൻ വിതരണ ചടങ്ങിന് നേതൃത്വം നൽകി. നിർധനരായ രോഗികൾക്കുള്ള ചികിത്സാ ധനസഹായ വിതരണം മാധ്യമപ്രവർത്തകൻ ലിജിത്ത് തരകൻ നിർവഹിച്ചു. ബ്രഹ്മക്കുളം എഫ്.എസ്.സി. സിസ്റ്റർ റോസിലിൻ മുഖ്യപ്രഭാഷണം നടത്തി, ജീവകാരുണ്യ പ്രവർത്തനങ്ങളുടെ സാമൂഹിക പ്രാധാന്യം വിശദീകരിച്ചു.
സുവിതം ഫൗണ്ടേഷൻ സെക്രട്ടറി വരുണൻ കൊപ്പര, ബാലൻ വാരണാട്ട്, മാർട്ടിൻ ആന്റണി, സീമ നീലേഷ് എന്നിവർ ആശംസാ പ്രസംഗങ്ങൾ നടത്തി. ചടങ്ങിനോടനുബന്ധിച്ച് നഗരസഭ ചെയർപേഴ്സൺ സുനിത അരവിന്ദൻ, കൗൺസിലർ ശോഭ ഹരി നാരായണൻ, മാധ്യമപ്രവർത്തകൻ ലിജിത്ത് തരകൻ എന്നിവരെ സ്നേഹാദരവ് നൽകി അനുമോദിച്ചു.
ഗാനസല്ലാപം, സ്നേഹസഹായ വിതരണം, സൗഹൃദ വിരുന്ന് എന്നിവയോടെ സംഗമം ആത്മീയവും മാനസികവുമായ ഉന്മേഷമായി. കെ.പി. കരുണാകരൻ, എം.പി. ശങ്കരനാരായണൻ, പി. ഇന്ദിര, വിലാസിനി, സി.എ. ലൂയിസ് എന്നിവർ പരിപാടിക്ക് നേതൃത്വം നൽകി.മാനവികതയുടെ വിളക്കായി സുവിതം ഫൗണ്ടേഷൻ സംഘടിപ്പിച്ച ഈ സംഗമം, സാമൂഹിക പ്രതിബദ്ധതയുടെ ശക്തമായ സന്ദേശമായി മാറി.
