വലതുകൈയിലായുരുളവെണ്ണയും
കുഴലതൊന്നതങ്ങിടതുകൈയിലും
പരിചൊടേന്തിയിന്നമരുമുണ്ണിയേ
ഗുരുപുരത്തിലായ്! തൊഴുതുകുമ്പിടാം
മുടിയിലിന്നുമുണ്ടരിയ പീലിയും,
നിടിലഗോപിയും ചെവിയിൽ സൂനവും
ഗളമതിങ്കലോ കനകമാല്യമൊ-
ത്തിളകിടുന്നു ഹാ കുസുമഹാരവും
അരയിലങ്ങതാ കനകകാഞ്ചിയൊ –
ത്തരിയകോണകം, ചെറുപതക്കവും
ചരണതാരിലായ് തഴുകി പൊൻചില –
മ്പുരുവിടുന്നിതാ! ശരണകീർത്തനം
സ്മരണയിൽചിരം ഹരിപദം നിന-
ച്ചിരുകരങ്ങൾ ഞാൻ മുകുളമാക്കിടാം
തിരുനടയ്ക്കൽ ഞാൻ തിരിതെളിച്ചിടാം
ഗുരുപുരേശ്വരാ! കരുണയേകണേ
(വൃത്തം: സുഖാവഹം)