വായുഗേഹത്തിൽ കളഭച്ചാർത്തിൽ കാണാം
കായാമ്പൂവർണ്ണൻ്റെ ചാരുരൂപം
ലീലകളാടാനൊരുങ്ങി , ചിരിതൂകി
ബാലഗോപാലൻ വിളങ്ങിടുന്നൂ
തെച്ചിപ്പൂവാലേ മനഞ്ഞ പൂപ്പന്തൊന്നു
വച്ചിട്ടുണ്ടിന്നു വലംകരത്തിൽ
പീലി കളഭത്തിനാലിന്നിടംകൈയിൽ
ചേലായുയർത്തിപ്പിടിച്ചു കാണ്മൂ
പൊൻകിരീടം , മലർമാലകൾ മൗലിയിൽ
തങ്കത്തിലകമാ ഫാലദേശേ
പൊൻപൂക്കളങ്ങിരുകാതിലും ചാർത്തിയി-
ന്നൻപോടെയുണ്ണി ലസിപ്പു മുന്നിൽ
പൊൻവളയം , വനമാല , പതക്കവും
പൊന്മണിമാലകൾ കങ്കണങ്ങൾ
പൊൻകിങ്ങിണിച്ചാർത്തു, പൊൻതള, കോണകം
പങ്കജനേത്രനണിഞ്ഞുകാണ്മൂ
താഴത്തരികത്തു കാണാം മനഞ്ഞതാ
വാഴക്കുലയൊന്നു ഭംഗിയായി
ഉണ്ണിക്കു കേളികളാടിത്തളരുമ്പോ-
ളുണ്ണാൻ കരുതിവച്ചുള്ളതാവാം
നെയ്ത്തിരിദീപത്തിൻ പൊൻപ്രഭാപൂരത്തി-
ലച്ചാരുരൂപം തെളിഞ്ഞുനില്ക്കേ
കൈകൂപ്പി ഭക്ത്യാ വണങ്ങിടാം ഭക്തിയോ-
ടക്കാല്ക്കൽ വീണുനമസ്കരിക്കാം
കൃഷ്ണാ! ഹരേ ജയ!കൃഷ്ണാ! ഹരേ ജയ!
കൃഷ്ണാ! ഹരേ ജയ!പാഹി കൃഷ്ണാ !
കൃഷ്ണാ! ഹരേ ജയ! കൃഷ്ണാ! ഹരേ ജയ!
വാതാലയേശ്വരാ!പാഹി കൃഷ്ണാ!
( വൃത്തം: മഞ്ജരി)