ജമ്മു കശ്മീരിൽ സ്ഫോടനം; മൂന്ന് പേർക്ക് സാരമായി പരിക്കേറ്റു; ദുരൂഹത

ശ്രീന​ഗർ: ജമ്മു കശ്മീരിലെ സാമ്പയിൽ വൻ സ്ഫോടനം. മൂന്ന് പേർക്ക് ​ഗുരുതരമായി പരിക്കേറ്റതായാണ് വിവരം. സാമ്പയിലെ ഖാദ മഥന സ്വ​ദേശികളായ സൂര്യ ബീവി, രമിത് സിം​ഗ്, സെമ്രൂ ദേവി എന്നിവർക്കാണ് പരിക്കേറ്റത്. ഇവർ ചികിത്സയിൽ തുടരുകയാണ്.

ഇന്നലെ രാത്രി എട്ട് മണിയോടെയായിരുന്നു സ്ഫോടനം നടന്നത്. തുരുമ്പിച്ച ഷെൽ പൊട്ടിത്തെറിച്ചതാണ് സ്ഫോടനത്തിന് പിന്നിലെന്നാണ് പ്രാഥമിക വിവരം. പ്രദേശത്തെ കാർഷിക രീതികളുടെ ഫലമായി വൈക്കോൽ കത്തിക്കുന്നതിനായി ഷെൽ ഉപയോ​ഗിച്ചിരിക്കാം. ഇത് പൊട്ടിത്തെറിച്ചതാകാമെന്നാണ് വിലയിരുത്തൽ. ​സംഭവത്തിൽ ദുരൂഹ​തയുണ്ടെന്നാണ് പൊലീസ് പറയുന്നത്. സംഭവത്തെ ​ഗൗരവമായി കാണുന്നുവെന്നും അന്വേഷണം പുരോ​ഗമിക്കുകയാണെന്നും പൊലീസ് വൃത്തങ്ങൾ അറിയിച്ചു.