മാളികപ്പുറം ടീം വീണ്ടുമൊന്നിക്കുന്ന പുതിയ ഹൊറർ ചിത്രം സുമതി വളവിന് ആശംസകളുമായി ഉണ്ണി മുകുന്ദൻ. ചിത്രത്തിന്റെ ടൈറ്റിൽ വീഡിയോ പങ്കുവച്ചുകൊണ്ടാണ് ഉണ്ണി മുകുന്ദൻ ആശംസകൾ പങ്കുവക്കുന്നത്. പ്രേക്ഷകരുടെ ആകാംക്ഷ ഇരട്ടിയാക്കുന്ന തരത്തിൽ കഥയുടെ ചരിത്രം വിവരിക്കുന്നതാണ് വീഡിയോ.
അഭിലാഷ് പിള്ള തിരക്കഥ എഴുതുന്ന ചിത്രം വിഷ്ണു ശശിശങ്കറാണ് സംവിധാനം ചെയ്യുന്നത്. അർജുൻ അശോകനാണ് ചിത്രത്തിലെ നായകൻ. ’18-ാം നൂറ്റാണ്ടിന്റെ ചരിത്രത്തിൽ’ എന്ന് തുടങ്ങുന്ന ടൈറ്റിൽ വീഡിയോയാണ് ഉണ്ണി മുകുന്ദൻ പങ്കുവച്ചിരിക്കുന്നത്. പ്രേക്ഷകർക്ക് വേണ്ടി ധാരാളം സസ്പെൻസുകൾ ഒളിപ്പിച്ചു വച്ചിരിക്കുന്ന ചിത്രമാണിതെന്ന് വീഡിയോയിൽ വ്യക്തമാണ്. പ്രേക്ഷകരെ ആകാംക്ഷയുടെ മുൾമുനയിൽ എത്തിക്കുന്ന ദൃശ്യങ്ങളാണ് വീഡിയോയിലുള്ളത്.
തിരുവനന്തപുരം പാലോടിന് സമീപത്തുള്ള സ്ഥലമാണ് സുമതി വളവ്. രാത്രി വൈകി ആളുകൾ പോകാൻ ഭയക്കുന്നയിടമാണ് ഇവിടം. ഒരു കാലത്ത് യാത്ര ചെയ്യാൻ ഭയപ്പെട്ടിരുന്ന ഈ വളവും അതിനെ ചുറ്റിപ്പറ്റി പ്രചരിച്ച കഥയുമാണോ ചിത്രം പറയുന്നത് എന്നാണ് ടൈറ്റിൽ വീഡിയോ കണ്ടതിന് പിന്നാലെ പ്രേക്ഷകർ ചോദിക്കുന്നത്.
സുമതി എന്ന പെൺകുട്ടിയെ ജീവനോടെ ചുട്ടുകൊന്ന സ്ഥലമെന്നാണ് സുമതി വളവ് പറയപ്പെടുന്നത്. പകൽ പോലും ആളുകൾ പോകാൻ മടിക്കുന്ന സ്ഥലമാണിവിടം. സത്യമാണോ, കെട്ടുക്കഥയാണോ എന്ന ചോദ്യം നിലനിൽക്കുന്നതിനിടെയാണ് സുമതി വളവ് ചിത്രമായി പ്രേക്ഷകർക്ക് മുന്നിലെത്താൻ പോകുന്നത്.
