ഡ്യൂപ്പില്ലാതെ റോപ്പിൽ പറന്നടിക്കുന്ന മമ്മൂട്ടി!; ടർബോ മേക്കിം​ഗ് വീഡിയോ

മമ്മൂട്ടിയെ നായകനാക്കി വൈശാഖ് സംവിധാനം ചെയ്ത ‘ടർബോ’ സമ്മിശ്ര പ്രതികരണങ്ങളോടെ പ്രദർശനം തുടരുകയാണ്. മാസിനും ആക്ഷനും പ്രാധാന്യം നൽകി കൊണ്ട് പുറത്തിറങ്ങിയ ചിത്രത്തിൽ മമ്മൂട്ടിയുടെ പ്രകടനത്തിനാണ് കയ്യടി. ഡ്യൂപ്പില്ലാതെയാണ് മമ്മൂട്ടി സംഘട്ടന രം​ഗങ്ങളിൽ അഭിനയിച്ചിരിക്കുന്നത്.

ചിത്രത്തിലെ ആക്ഷൻ രം​ഗങ്ങൾ കോർത്തിണക്കി കൊണ്ടുള്ള മേക്കിം​ഗ് വീഡിയോ പുറത്തിറക്കിയിരിക്കുകയാണ് അണിയറ പ്രവർത്തകർ. മമ്മൂട്ടി കമ്പനിയുടെ യൂട്യൂബ് ചാനലിലൂടെയാണ് ടർബോയുടെ മേക്കിം​ഗ് വീഡിയോ റിലീസ് ചെയ്തത്.

ഫീനിക്സ് പ്രഭുവാണ് ചിത്രത്തിലെ ആക്ഷൻ കൊറിയോ​ഗ്രാഫർ. ഡ്യൂപ്പിന്റെ സഹായമില്ലാതെ സംഘട്ടന രംഗങ്ങൾ ചെയ്യുന്ന മമ്മൂട്ടിയെയാണ് വിഡിയോയിൽ കാണുന്നത്. മമ്മൂട്ടി കമ്പനി നിർമ്മിക്കുന്ന അഞ്ചാമത്തെ സിനിമയാണ് ‘ടർബോ’.