പോർട്ട് മൊറെസ്ബി: പാപ്പുവ ന്യൂ ഗിനിയയിലുണ്ടായ മണ്ണിടിച്ചിലിൽ മരണസംഖ്യ ഉയരുന്നു. ഏകദേശം 2,000-ത്തിലധികം പേർ കുടുങ്ങിയതായി യുഎൻ റിപ്പോർട്ട്. രാജ്യത്ത് വൻ നാശനഷ്ടമാണ് മണ്ണിടിച്ചിലിന് പിന്നാലെ ഉണ്ടായതെന്ന് ദേശീയ ദുരന്തനിവാരണ സെന്റർ അറിയിച്ചു.
വെള്ളിയാഴ്ച പുലർച്ചെയാണ് രാജ്യത്തെ പിടിച്ചുലച്ച മണ്ണിടിച്ചിലുണ്ടായത്. തലസ്ഥാനമായ പോർട്ട് മൊറെസ്ബിയിൽ നിന്ന് 600 കിലോമീറ്റർ വടക്കുപടിഞ്ഞറായി എങ്കാ പ്രവിശ്യയിലെ മംഗലോ പർവതത്തിന്റെ സിംഹഭാഗമാണ് ഇടിഞ്ഞുവീണത്. ഉറക്കത്തിനിടയിൽ ആയതുകൊണ്ട് തന്നെ ഭൂരിഭാഗം പേർക്കും രക്ഷപ്പെടാൻ പോലും സാധിച്ചില്ല. ഇത് മരണസംഖ്യ ഉയരാൻ കാരണമായി.
മണ്ണിടിച്ചിൽ ഇപ്പോഴും തുടരുകയാണെന്നാണ് റിപ്പോർട്ട്. രക്ഷാപ്രവർത്തകരുടെ ജീവന് പോലും ഭീഷണിയുണ്ടെന്നും വൃത്തങ്ങൾ അറിയിച്ചു. പ്രവിശ്യയിൽ ഗതാഗതവും വൈദ്യുതിയും പൂർണമായി നിലച്ചു. സൈന്യവും ദേശീയ, സംസ്ഥാന ദുരന്തനിവാരണ സേനകളും പ്രാദേശിക സംഘടനകളുമാണ് രക്ഷാപ്രവർത്തനത്തിലേർപ്പെട്ടിരിക്കുന്നത്.
ദുരന്തത്തിന്റെ തീവ്രത സംബന്ധിച്ച് ലോകത്തെ അറിയിക്കാൻ പാപ്പുവ ന്യൂ ഗിനിയ ഐക്യരാഷ്ട്ര സഭയോട് ആവശ്യപ്പെട്ടിട്ടുണ്ട്. അയൽരാജ്യങ്ങളായ ഓസ്ട്രേലിയയും ഫ്രാൻസും പിഎൻജിയെ സഹായിക്കാൻ തയ്യാറാണെന്ന് അറിയിച്ചിട്ടുണ്ട്.
