അവസാന മണിക്കൂറിലെ രാഷ്ട്രീയ ചലനം; സംസ്ഥാനത്ത് പ്രചാരണരംഗം ഇനി കൂടുതല് സജീവം : 140 മണ്ഡലങ്ങളിലെയും മത്സരചിത്രം വ്യക്തമായി;
സംസ്ഥാന നിയമസഭാ തെരഞ്ഞെടുപ്പിനായുള്ള നാമനിര്ദേശ പത്രിക സമര്പ്പണത്തിന് ഇന്ന് അവസാന ദിനമായതിനാല് വിവിധ മണ്ഡലങ്ങളില് രാഷ്ട്രീയ ആവേശം കൂടുതല് ശക്തമായി മാറിയിരിക്കുകയാണ്. കഴിഞ്ഞ ദിവസങ്ങളിലായി ഭൂരിഭാഗം സ്ഥാനാര്ഥികളും തങ്ങളുടെ പത്രികകള് സമര്പ്പിച്ചിരുന്നുവെങ്കിലും, ശേഷിക്കുന്നവര് ഇന്ന് ബന്ധപ്പെട്ട വരണാധികാരികളുടെ മുമ്പാകെ ഔദ്യോഗികമായി പത്രിക സമര്പ്പിക്കും.
പുനലൂർ മണ്ഡലത്തില് നൗഷാദ് യൂനുസ് ഇന്ന് ആര്ടിഒ ഓഫീസില് എത്തി നാമനിര്ദേശ പത്രിക സമര്പ്പിക്കും. യുഡിഎഫിനുള്ളിലെ സ്ഥാനാര്ഥി തര്ക്കങ്ങള് അവസാനിച്ചതോടെ അവിടത്തെ പ്രചാരണ പ്രവര്ത്തനങ്ങള് പുതിയ ഉത്സാഹത്തിലേക്ക് കടക്കുകയാണ്.
കരുനാഗപ്പള്ളി മണ്ഡലത്തിലെ എന്ഡിഎ സ്ഥാനാര്ഥി ജിതിൻ ദേവയുടെ പത്രിക സമര്പ്പണ ചടങ്ങില് പങ്കെടുക്കാന് ദേവേന്ദ്ര ഫഡ്നാവിസ് എത്തുന്നതും ഇന്നത്തെ രാഷ്ട്രീയ ശ്രദ്ധാകേന്ദ്രങ്ങളിലൊന്നാണ്. തുടര്ന്ന് നടക്കുന്ന റോഡ് ഷോയും എന്ഡിഎ പ്രചാരണത്തിന് ശക്തി പകരുമെന്നാണു വിലയിരുത്തല്.
കൊട്ടാരക്കരയിൽ എന്ഡിഎ സ്ഥാനാര്ഥി ആർ രശ്മി, ഇരവിപുരം മണ്ഡലത്തില് യുഡിഎഫ് സ്ഥാനാര്ഥി വിഷ്ണു മോഹൻ, എല്ഡിഎഫ് സ്ഥാനാര്ഥി എം നൗഷാദ്, കൊല്ലം മണ്ഡലത്തില് എല്ഡിഎഫ് സ്ഥാനാര്ഥി എസ് ജയമോഹൻ എന്നിവരും ഇന്ന് പത്രിക സമര്പ്പിക്കും. ചടയമംഗലം മണ്ഡലത്തില് യുഡിഎഫ് സ്ഥാനാര്ഥി എം എം നസീർ, കുണ്ടറയിൽ എന്ഡിഎ സ്ഥാനാര്ഥി റോബിൻ രാധാകൃഷ്ണൻ, എല്ഡിഎഫ് സ്ഥാനാര്ഥി എസ് എൽ സജികുമാർ അടക്കമുള്ളവരുടെ പത്രിക സമര്പ്പണവും ഇന്നുതന്നെ പൂര്ത്തിയാകും.
മുന്നണികള് മൂന്നു വിഭാഗവും സ്ഥാനാര്ഥി പട്ടിക പൂര്ത്തിയാക്കിയതോടെ സംസ്ഥാനത്തെ 140 മണ്ഡലങ്ങളിലെയും തെരഞ്ഞെടുപ്പ് ചിത്രം പൂര്ണമായും വ്യക്തമായിരിക്കുകയാണ്. ഭരണതുടര്ച്ച ലക്ഷ്യമിട്ട് സര്ക്കാരിന്റെ പത്ത് വര്ഷത്തെ പ്രവര്ത്തന നേട്ടങ്ങള് ഉയര്ത്തിക്കാട്ടി എല്ഡിഎഫ് പ്രചാരണം ശക്തമാക്കുമ്പോള്, തിരിച്ചുവരവിന്റെ ആത്മവിശ്വാസത്തിലാണ് യുഡിഎഫ്. അതേസമയം മാറ്റത്തിന്റെ രാഷ്ട്രീയ സന്ദേശവുമായി എന്ഡിഎയും സംസ്ഥാനത്ത് ശക്തമായ സാന്നിധ്യം ഉറപ്പാക്കാന് ശ്രമിക്കുന്നു.
കേരളം പോളിങ് ബൂത്തിലേക്ക് കടക്കാന് ഇനി വെറും 17 ദിവസം മാത്രം ബാക്കി നില്ക്കെ, പ്രചാരണരംഗം അടുത്ത ദിവസങ്ങളില് കൂടുതല് ചൂടുപിടിക്കുമെന്നത് വ്യക്തമാണ്
