ഗുരുവായൂർ: ശ്രീ ഗുരുവായൂരപ്പൻ്റെ ഇഷ്ട കലയായ കൃഷ്ണനാട്ടത്തിലെ കലാകാരൻമാർക്കുള്ള ഈ വർഷത്തെ കച്ചകെട്ടി അഭ്യാസത്തിന് തുടക്കമായി. ബുധനാഴ്ച രാവിലെ 7 മണിക്ക് വേഷം വിഭാഗം സീനിയർ ആശാൻ എസ്.മാധവൻകുട്ടി കളരിയിൽ വിളക്ക് തെളിയിച്ചു.
കലാകാരൻമാർക്ക് മെയ് വഴക്കത്തിനും മികവിനും 41 ദിവസത്തെ ചിട്ടയായ കച്ചകെട്ടി അഭ്യാസം ആവശ്യമാണ്. ജൂലൈ 11 മുതൽ പുലർച്ചെ 3 മണിക്ക് കച്ചകെട്ടി അഭ്യാസവും ചൊല്ലിയാട്ടവും കളരിച്ചിട്ടയിൽ നടക്കും. പാട്ട്, മദ്ദള വിഭാഗങ്ങൾക്കുള്ള പ്രത്യേക പഠനവും സാധകവും പ്രത്യേകമായുണ്ടാകും.
കലാനിലയം സൂപ്രണ്ട് മുരളി പുറനാട്ടുകരയുടെ മേൽനോട്ടത്തിലാണ് പരിശീലനം. ആശാൻമാരായ എ മുരളീധരൻ, എം വി ഉണ്ണിക്കൃഷ്ണൻ, പി അരവിന്ദാക്ഷൻ എന്നിവർ കൃഷ്ണനാട്ടം ട്രയിനികൾക്ക് നിർദ്ദേശങ്ങൾ നൽകി. ദിൽക്കുഷ് (പാട്ട്), പി രാധാകൃഷ്ണൻ (ശുദ്ധമദ്ദളം), കെ ഗോവിന്ദൻ കുട്ടി (തൊപ്പി മദ്ദളം) എന്നിവർ അതതു വിഭാഗങ്ങൾക്ക് നേതൃത്വം നൽകി.
കൃഷ്ണനാട്ടം കോപ്പുപണികൾ ചുട്ടി വിഭാഗം ആശാൻ കെ.ടി.ഉണ്ണിക്കൃഷ്ണൻ, കോപ്പുപണികളുടെ ചുമതലയുള്ള ചുട്ടി ഗ്രേഡ് 1 കലാകാരൻ ഇ .രാജു എന്നിവരുടെ നേതൃത്വത്തിൽ ക്ഷേത്രം അണിയറയിൽ ആരംഭിച്ചു.
