പൊതുജനങ്ങളുടെ ആശങ്കകൾക്കും വികസനവുമായി ബന്ധപ്പെട്ട സംശയങ്ങൾക്കും മറുപടി തേടി പ്രതിപക്ഷം; പ്രതിപക്ഷ നേതാവ് ബഷീർ പൂക്കോടിന്റെ നേതൃത്വത്തിൽ സെക്രട്ടറിക്ക് നിവേദനം
ഗുരുവായൂർ നഗരസഭയുടെ ബസ് സ്റ്റാൻഡ് നിർമ്മാണവുമായി ബന്ധപ്പെട്ട് ഉയർന്നുവരുന്ന വിവാദങ്ങൾക്കും പൊതുജനങ്ങൾക്കിടയിലും ജനപ്രതിനിധികൾക്കിടയിലും നിലനിൽക്കുന്ന ആശങ്കകൾക്കും പരിഹാരം കാണുന്നതിനായി അടിയന്തര കൗൺസിൽ യോഗം വിളിച്ചുചേർക്കണമെന്ന് ആവശ്യപ്പെട്ട് യുഡിഎഫ് കൗൺസിലർമാർ നഗരസഭാ സെക്രട്ടറിക്ക് നോട്ടീസ് നൽകി.
നഗരസഭാ പ്രതിപക്ഷ നേതാവ് ബഷീർ പൂക്കോടിന്റെ നേതൃത്വത്തിൽ യുഡിഎഫ് കൗൺസിലർമാർ ഒപ്പുവെച്ചാണ് നോട്ടീസ് സമർപ്പിച്ചത്. ഗുരുവായൂരിന്റെ ഭാവി വികസനത്തെയും നഗരത്തിലെ പ്രധാന പൊതുഗതാഗത സംവിധാനത്തെയും നേരിട്ട് ബാധിക്കുന്ന ബസ് സ്റ്റാൻഡ് നിർമ്മാണവുമായി ബന്ധപ്പെട്ട് നിരവധി സംശയങ്ങളും ആശങ്കകളും നിലനിൽക്കുന്ന സാഹചര്യത്തിലാണ് അടിയന്തര കൗൺസിൽ യോഗം ആവശ്യപ്പെട്ടിരിക്കുന്നത്.
ബസ് സ്റ്റാൻഡ് പദ്ധതിയുടെ നിലവിലെ പുരോഗതി, നിർമ്മാണവുമായി ബന്ധപ്പെട്ട നടപടിക്രമങ്ങൾ, സാമ്പത്തിക വശങ്ങൾ, സാങ്കേതിക വിഷയങ്ങൾ, പൊതുജനങ്ങൾക്ക് ഉണ്ടാകുന്ന ബുദ്ധിമുട്ടുകൾ, ഭാവി വികസന സാധ്യതകൾ തുടങ്ങിയ എല്ലാ വിഷയങ്ങളും കൗൺസിലിൽ വിശദമായി ചർച്ച ചെയ്യേണ്ടത് അനിവാര്യമാണെന്ന് നോട്ടീസിൽ ചൂണ്ടിക്കാട്ടുന്നു.
പൊതുജനങ്ങളുടെ യാത്രാസൗകര്യത്തെയും നഗരത്തിന്റെ സമഗ്ര വികസനത്തെയും നിർണായകമായി സ്വാധീനിക്കുന്ന വിഷയമായതിനാൽ, കേരള മുനിസിപ്പാലിറ്റി ആക്ടിലെയും ചട്ടങ്ങളിലെയും വ്യവസ്ഥകൾ അനുസരിച്ച് എത്രയും വേഗം അടിയന്തര കൗൺസിൽ യോഗം വിളിച്ചുചേർത്ത് എല്ലാ വിഷയങ്ങളും വിശദമായി വിലയിരുത്തുകയും ആവശ്യമായ തീരുമാനങ്ങൾ കൈക്കൊള്ളുകയും ചെയ്യണമെന്ന് യുഡിഎഫ് കൗൺസിലർമാർ ആവശ്യപ്പെട്ടു.
കഴിഞ്ഞദിവസം പുതിയ ബസ് സ്റ്റാൻഡ് നിർമ്മാണവുമായി ബന്ധപ്പെട്ട് അധികാരികൾ സ്വീകരിക്കുന്ന നിഷേധാത്മക നിലപാടുകൾക്കെതിരെ മണ്ഡലം കോൺഗ്രസ്സ് കമ്മിറ്റിയുടെ നേതൃത്വത്തിൽ ബസ് സ്റ്റാൻഡ് പരിസരത്ത് പ്രതിഷേധച്ചങ്ങല സംഘടിപ്പിച്ചിരുന്നു.
ബസ് സ്റ്റാൻഡ് നിർമ്മാണവുമായി ബന്ധപ്പെട്ട് നിലനിൽക്കുന്ന അനിശ്ചിതത്വങ്ങൾക്ക് വ്യക്തത വരുത്തുകയും നഗരത്തിന്റെ വികസന താൽപര്യം മുൻനിർത്തി സുതാര്യമായ തീരുമാനങ്ങളിലേക്ക് കൗൺസിൽ എത്തണമെന്നും പ്രതിപക്ഷം ആവശ്യപ്പെട്ടിട്ടുണ്ട്. സമർപ്പിച്ച നോട്ടീസിൽ നഗരസഭാ സെക്രട്ടറിയോട് വിഷയത്തിന്റെ അടിയന്തര പ്രാധാന്യം പരിഗണിച്ച് കൗൺസിൽ യോഗം എത്രയും വേഗം വിളിച്ചുചേർക്കുന്നതിനുള്ള നടപടികൾ സ്വീകരിക്കണമെന്നും അഭ്യർഥിച്ചിട്ടുണ്ട്.