പൈതൃകം ഗുരുവായൂരിന്റെ നേതൃത്വത്തിൽ ശിവരാത്രി ദിനത്തിൽ ആയിരങ്ങൾ ഒരുമിച്ച് ലളിതാസഹസ്രനാമാർച്ചന; എം.എൽ.എയും ഗായികയുമായ മൈഥിലി താക്കൂർ ആദരം ഏറ്റുവാങ്ങി ഭജനമാല അർപ്പിച്ചു
ഗുരുവായൂർ: ശിവരാത്രി ദിനത്തിൽ ഗുരുവായൂർ ആത്മീയ ഭക്തിസാന്ദ്രമായ നിമിഷങ്ങൾക്ക് സാക്ഷിയായി. പൈതൃകം ഗുരുവായൂർ സംഘടിപ്പിച്ച സമൂഹ ലളിതാ സഹസ്രനാമാർച്ചന ഭക്തജനങ്ങളുടെ വൻ പങ്കാളിത്തത്തോടെ നടന്നു. ഗുരുവായൂർ ടൗൺ ഹാളിൽ ഒത്തുകൂടിയ ഭക്തർ, ശബരിമല മാളികപ്പുറം മുൻ മേൽശാന്തിയായ വിഷ്ണു നമ്പൂതിരി നടത്തിയ പ്രാണശക്തി പൂജയ്ക്കുശേഷം നാമജപവുമായി ക്ഷേത്രനടയിലെത്തി.
ക്ഷേത്രമൂരാളൻ മല്ലിശ്ശേരി പരമേശ്വര നമ്പൂതിരിപ്പാട്, ഭാഗവതാചാര്യൻ സ്വാമി ഉദിത് ചൈതന്യ, മൈഥിലി താക്കൂർ എം.എൽ.എ, ഡോ. ഡി.എം. വാസുദേവൻ, ഗംഗാധരൻ, ആലീസ് ഉണ്ണികൃഷ്ണൻ എന്നിവർ ചേർന്ന് ദീപപ്രോജ്വലനം നിർവഹിച്ചു. ഡോ. കെ.ബി. പ്രഭാകരൻ അധ്യക്ഷത വഹിച്ചു. സ്വാമി ഉദിത് ചൈതന്യ അനുഗ്രഹപ്രഭാഷണം നടത്തി.
സ്വാമി ഉദിത് ചൈതന്യയുടെ നേതൃത്വത്തിൽ ലളിതാ സഹസ്രനാമാർച്ചന നടന്നു. ആലീസ് ഉണ്ണികൃഷ്ണൻ സഹസ്രനാമങ്ങൾ ചൊല്ലിക്കൊടുത്തപ്പോൾ രണ്ടായിരത്തിലേറെ ഭക്തർ പങ്കെടുത്തു. ഭക്തിസാന്ദ്രമായ അന്തരീക്ഷത്തിൽ നാമജപം മുഴങ്ങിയപ്പോൾ ക്ഷേത്രപ്രാകാരം ആത്മീയ സ്പന്ദനത്തോടെ നിറഞ്ഞു.
ഇന്ത്യയിലെ ഏറ്റവും പ്രായം കുറഞ്ഞ എം.എൽ.എയും പ്രശസ്ത ഗായികയുമായ മൈഥിലി താക്കൂർ ഗുരുവായൂരിന്റെ ആദരം ഏറ്റുവാങ്ങാനെത്തി. ബിഹാറിലെ അലിനഗറിൽ നിന്നുള്ള ബി.ജെ.പി. എം.എൽ.എയായ മൈഥിലി, ഹിന്ദി, ബംഗാളി, മൈഥിലി, ഉറുദു, മറാത്തി, ഭോജ്പുരി തുടങ്ങി നിരവധി ഭാഷകളിൽ ഗാനാലാപനം നടത്തുന്ന ഗായികയാണ്. രാജ്യത്തുടനീളം, പ്രത്യേകിച്ച് ഉത്തരേന്ത്യയിൽ, വൻ ആരാധകവൃന്ദം ഇവർക്കുണ്ട്.
ഭാഗവതാചാര്യൻ സ്വാമി ഉദിത് ചൈതന്യയും ക്ഷേത്രമൂരാളൻ മല്ലിശ്ശേരി പരമേശ്വര നമ്പൂതിരിപ്പാട്യും ചേർന്ന് മൈഥിലി താക്കൂറിന് ഉപഹാരം സമ്മാനിച്ചു. ഡോ. ഡി.എം. വാസുദേവൻ അനുഗ്രഹപ്രഭാഷണം നടത്തി.
അദരണത്തിന് ശേഷം ക്ഷേത്രനടയിൽ തിങ്ങിനിറഞ്ഞ ആയിരങ്ങൾക്കുമുന്നിൽ മൈഥിലി താക്കൂർ ഭജനുകൾ ആലപിച്ചു. ‘അച്യുതം കേശവം കൃഷ്ണദാമോദരം’ എന്ന ഭജനയോടെ ആരംഭിച്ച പരിപാടി ഒരുമണിക്കൂറിലേറെ നീണ്ടു. സഹോദരങ്ങളായ അയാച്ചി താക്കൂറും റിഷവ് താക്കൂറും പക്കവാദ്യം ഒരുക്കി. ഭക്തിസാന്ദ്രമായ ഗാനങ്ങൾ മുഴങ്ങിയപ്പോൾ ഗുരുവായൂർ ക്ഷേത്രനട ആത്മീയോത്സവമണിഞ്ഞു.
ചടങ്ങിൽ ആലീസ് ഉണ്ണികൃഷ്ണനെ ആദരിച്ചു. കൂടാതെ ഏപ്രിലിൽ നടക്കാനിരിക്കുന്ന ഭാഗവത സപ്താഹത്തിന്റെ ഔദ്യോഗിക വിളംബരവും നടന്നു. പി.എസ്. പ്രേമാനന്ദൻ, നിവേദിത സുബ്രഹ്മണ്യൻ, സി. രാജഗോപാലൻ, രവി ചങ്കത്ത്, മധു കെ. നായർ, ബ്രിഗേഡിയർ സുബ്രഹ്മണ്യൻ എന്നിവർ പ്രസംഗിച്ചു. ശിവരാത്രി ദിനത്തിൽ ഗുരുവായൂരിൽ നടന്ന സമൂഹ ലളിതാ സഹസ്രനാമാർച്ചന ഭക്തിസാന്ദ്രതയും സാംസ്കാരിക ഐക്യവും ഒത്തുചേർന്ന മഹത്തായ ആത്മീയസംഗമമായി മാറി.
