കൊച്ചി: ഇടതു സഹയാത്രികനും സംവിധായകനുമായ പിടി കുഞ്ഞുമുഹമ്മദ്ക്കെതിരായ ലൈംഗികാതിക്രമാരോപണത്തിൽ ശക്തമായ നിലപാടുമായി ചലച്ചിത്ര പ്രവർത്തക ഡോ. ആശാ ആച്ചി ജോസഫ്. ലൈംഗികാതിക്രമം ബോധപൂർവ്വമായാണ് നടത്തിയതെന്നും, ഔദ്യോഗിക ചുമതല നിർവഹിക്കുന്നതിനിടെയാണ് താൻ അപമാനിക്കപ്പെട്ടതെന്നും ഡോ. ആശ ആരോപിക്കുന്നു.
കേരള സംസ്ഥാന ചലച്ചിത്ര അക്കാദമിയുടെ ഔദ്യോഗിക ചുമതല നിർവഹിക്കുന്ന സമയത്താണ് സംഭവമുണ്ടായതെന്ന് അവർ വ്യക്തമാക്കുന്നു. വിഷയത്തിൽ മുഖ്യമന്ത്രിക്ക് പരാതി നൽകിയിരുന്നുവെന്നും, പൊലീസ് വീട്ടിലെത്തി മൊഴി രേഖപ്പെടുത്തിയിട്ടും എഫ്ഐആർ രജിസ്റ്റർ ചെയ്യുന്നതിൽ വൈകിയെന്നുമാണ് ആരോപണം.
മലയാള മനോരമ ദിനപത്രത്തിൽ പ്രസിദ്ധീകരിച്ച ലേഖനത്തിലൂടെയാണ് ഡോ. ആശയുടെ പ്രതികരണം. “മിണ്ടാതിരിക്കുക എന്നത് അന്തസ്സിനുമേൽ നടക്കുന്ന രണ്ടാമത്തെ അതിക്രമമാണ്” എന്ന വാക്കുകൾ ലേഖനത്തിൽ ശ്രദ്ധേയമാണ്. തൊഴിൽസ്ഥലത്ത് വീണ്ടും അപമാനിക്കപ്പെട്ട അനുഭവം പങ്കുവെച്ചുകൊണ്ട്, ഒൻപതു വർഷങ്ങൾക്ക് മുൻപ് സിനിമയിലെ സ്ത്രീ കൂട്ടായ്മ ഉയർത്തിയ ശബ്ദത്തിന് പിന്നാലെയും മാറ്റമുണ്ടായില്ലെന്ന് അവർ ചൂണ്ടിക്കാട്ടുന്നു.
“സഹതാപമല്ല, ഐക്യദാർഢ്യമാണ് അഭ്യർഥിക്കുന്നത്” എന്ന നിലപാട് ആവർത്തിച്ചാണ് ലേഖനം ആരംഭിക്കുകയും അവസാനിക്കുകയും ചെയ്യുന്നത്. തന്റെ ശബ്ദം മറ്റൊരു സ്ത്രീക്ക് സംസാരിക്കാൻ ധൈര്യം നൽകുമെന്ന പ്രതീക്ഷയോടെയാണ് തുറന്നുപറച്ചിലെന്നും അവർ പറയുന്നു.
സുരക്ഷ വാഗ്ദാനം ചെയ്യുന്നവർ അതിന്റെ ഉത്തരവാദിത്വം ഏറ്റെടുക്കണം എന്ന ആവശ്യം ഉയർത്തിയ ഡോ. ആശ, തൊഴിൽസ്ഥലങ്ങളിൽ ലൈംഗികാതിക്രമങ്ങൾക്കെതിരെ ശക്തമായ നടപടികൾ ആവശ്യമാണ് എന്നും വ്യക്തമാക്കി. വിഷയത്തിൽ ബന്ധപ്പെട്ടവരുടെ ഔദ്യോഗിക പ്രതികരണം ഇതുവരെ ലഭ്യമായിട്ടില്ല.
