പൗരാണിക പൈതൃകവും ആധുനിക സൗകര്യങ്ങളും സംയോജിപ്പിച്ച് നാഗഹാര ആഡിറ്റോറിയം തുറന്നു; മഹാരുദ്രയജ്ഞ ചടങ്ങുകൾ ഞായറാഴ്ച തുടങ്ങും
ഗുരുവായൂർ പെരുന്തട്ട മഹാദേവക്ഷേത്രത്തിൽ പുതുതായി നിർമ്മിച്ച നാഗഹാര ആഡിറ്റോറിയം ഗുരുവായൂർ ദേവസ്വം ചെയർമാൻ ഡോ. വി. കെ. വിജയൻ ഭദ്രദീപം കൊളുത്തി ഔദ്യോഗികമായി ഉദ്ഘാടനം ചെയ്തു. പൗരാണികവും ആത്മീയവുമായ പെരുന്തട്ട ക്ഷേത്രത്തിന്റെ ചരിത്ര പൈതൃകത്തെ സംരക്ഷിക്കുകയും നവകാല ആവശ്യങ്ങൾക്കനുസരിച്ചുള്ള സൗകര്യങ്ങൾ ഒരുക്കുകയും ചെയ്യുന്ന ക്ഷേത്രപരിപാലനസമിതിയുടെ പ്രവർത്തനങ്ങൾക്ക് ഈ ആഡിറ്റോറിയം പുതിയ ദിശ നൽകുമെന്ന് അദ്ദേഹം പറഞ്ഞു.
ഉദ്ഘാടന ചടങ്ങിനോടനുബന്ധിച്ച്, പെരുന്തട്ട മഹാദേവക്ഷേത്രത്തിന്റെ സമ്പന്നമായ ചരിത്ര പശ്ചാത്തലം വെളിപ്പെടുത്തുന്ന പഴയകാല ചിത്രങ്ങളുടെ പ്രത്യേക പ്രദർശനം ഡോ. വി. കെ. വിജയൻ അനാച്ഛാദനം ചെയ്തു. ക്ഷേത്രത്തിന്റെ പുരാതന മഹത്വവും കാലാനുസൃതമായ പരിണാമവും ഒരുമിച്ച് ദൃശ്യവൽക്കരിക്കുന്ന ഈ പ്രദർശനം വിശ്വാസികൾക്ക് ആത്മീയ അനുഭവമായി.
ക്ഷേത്രപരിപാലനസമിതി പ്രസിഡന്റ് കോങ്ങാട്ടിൽ അരവിന്ദാക്ഷൻ മേനോൻ അദ്ധ്യക്ഷത വഹിച്ച ചടങ്ങിൽ സ്വാമി കൃഷ്ണാനന്ദ സരസ്വതി, ഡോ. പി. നാരായണൻ നമ്പൂതിരി, മമ്മിയൂർ ദേവസ്വം മുൻ ചെയർമാൻ ജി. കെ. പ്രകാശൻ, വി. പി. ഉണ്ണികൃഷ്ണൻ, മുരളി മോഹൻ (കണ്ണൂർ) എന്നിവർ ഉദ്ഘാടനത്തെ അഭിവാദ്യം ചെയ്ത് സംസാരിച്ചു.
ഗുരുവായൂർ മണികണ്ഠൻ അവതരിപ്പിച്ച സംഗീത സമർപ്പണം ചടങ്ങിന് ആത്മീയ ഔന്നത്യം പകർന്നു.ഉഷ അച്ചുതന്റെ പ്രാർത്ഥനയോടെ ആരംഭിച്ച ചടങ്ങിൽ കിഴിയേടം രാമൻ നമ്പൂതിരി വിശിഷ്ട വ്യക്തികളെ പൊന്നാട അണിയിച്ച് ആദരിച്ചു. ആർ. പരമേശ്വരൻ സ്വാഗതവും കെ. രാമകൃഷ്ണൻ ഇളയത് നന്ദിയും പറഞ്ഞു.
ക്ഷേത്രം മാതൃസമിതിയുടെ നേതൃത്വത്തിൽ രാവിലെ നാരായണീയ പാരായണം നടന്നു. ഇതിനോടൊപ്പം, ചേന്നാസ് ദിനേശൻ നമ്പൂതിരിപ്പാടിന്റെ മുഖ്യകാർമികത്വത്തിൽ മഹാരുദ്രയജ്ഞചടങ്ങുകൾ ഞായറാഴ്ച മുതൽ ആരംഭിക്കുന്നതായുള്ള പ്രഖ്യാപനം, . ആത്മീയാചാരങ്ങളുടെയും വിശ്വാസപരമ്പരയുടെയും തുടർച്ചയായി നടക്കുന്ന ഈ ചടങ്ങുകൾക്ക് വലിയ ഭക്തജനപങ്കാളിത്തം പ്രതീക്ഷിക്കുന്നതായും അറിയിച്ചു.
നാഗഹാര ആഡിറ്റോറിയത്തിന്റെ ഉദ്ഘാടനം ഒരു ചടങ്ങിൽ ഒതുങ്ങരുത്. ഇത് ക്ഷേത്രഭരണം എങ്ങോട്ടാണ് നീങ്ങേണ്ടത് എന്ന ചോദ്യത്തിന് ഉത്തരം നൽകുന്ന മാതൃകയാകണം. പൈതൃകത്തിന്റെ പേരിൽ പുരോഗതി തടയുന്ന സമീപനങ്ങൾ ഉപേക്ഷിച്ച്, ആചാരങ്ങളുടെ ആത്മാവ് സംരക്ഷിച്ചുകൊണ്ട് ആധുനിക ആവശ്യങ്ങൾക്ക് മറുപടി നൽകുന്ന ഭരണരീതി പെരുന്തട്ടയിൽ നിന്നുതന്നെ ശക്തമായി ഉയരട്ടെ—അതായിരിക്കും ഈ ഉദ്ഘാടനത്തിന്റെ യഥാർത്ഥ വിജയം.
