ഗുരുവായൂർ: വിശ്വപ്രസിദ്ധമായ ഗുരുവായൂർ ദേവസ്വം ചെമ്പൈ സംഗീതോത്സവത്തിൻ്റെ ഒരു വർഷം നീണ്ടു നിൽക്കുന്ന സുവർണ്ണ ജൂബിലിയുടെ ഭാഗമായി തിരുവനന്തപുരത്ത് സെപ്റ്റംബർ 12ന് ആഘോഷ പരിപാടികൾ സംഘടിപ്പിക്കും. സംഗീതാർച്ചന, സാംസ്കാരിക സമ്മേളനം, ചെമ്പൈ അനുസ്മരണ പ്രഭാഷണം, വിശേഷാൽ കച്ചേരി എന്നിവയുണ്ടാകും.
സുവർണ്ണ ജൂബിലി ആഘോഷ പരിപാടികളുടെ വിജയകരമായ നടത്തിപ്പിനായുള്ള സ്വാഗത സംഘം രൂപീകരണ യോഗം ശ്രീവരാഹം ശ്രീചെമ്പൈ മെമ്മോറിയൽ ഹാളിൽ ചേർന്നു. സ്ഥലം എം എൽ എ ആൻറണി രാജുവിനെ മുഖ്യരക്ഷാധികാരിയായി തെരഞ്ഞെടുത്തു. തിരുവനന്തപുരം കോർപ്പറേഷൻ മേയർ ആര്യ രാജേന്ദ്രൻ രക്ഷാധികാരിയാകും.വാർഡ് കൗൺസിലർമാരായ ഹരികുമാർ ,മണക്കാട് സുരേഷ്, പാർവ്വതീപുരം പത്മനാഭ അയ്യർ, തിരുവനന്തപുരം വി സുരേന്ദ്രൻ എന്നിവർ രക്ഷാധികാരികളാകും. ചെമ്പൈ മെമ്മോറിയൽ ട്രസ്റ്റ് ചെയർമാൻ അഡ്വ.വാഞ്ചീശ്വര അയ്യർ ആണ് സംഘാടക സമിതിയുടെ ചെയർമാൻ. ബിനുകുമാർ, ബിജുകുമാർ, അഡ്വ ജയലക്ഷ്മി, ടി എസ് മണി (വൈസ് ചെയർമാൻമാർ). പ്രൊഫ വൈക്കം വേണുഗോപാലാണ് കൺവീനർ. ഡോ ആശ നായർ, പ്രിയ സി നായർ, ഡോ ശ്യാമ ഡോ പി പത്മേഷ്, സുരേഷ്, നീലകണ്ഠൻ, എന്നിവർ ജോ. കൺവീനർമാരാകും.
ദേവസ്വം ഭരണസമിതി അംഗം കെ പി വിശ്വനാഥൻ്റെ അധ്യക്ഷതയിൽ ചേർന്ന യോഗത്തിൽ ദേവസ്വം ഭരണസമിതി അംഗം ശ മനോജ് ബി നായർ സ്വാഗതം പറഞ്ഞു. ശ്രീവരാഹം കോർപ്പറേഷൻ വാർഡ് കൗൺസിലർ ഹരികുമാർ ഉദ്ഘാടനം നിർവ്വഹിച്ചു. കൗൺസിലർ മണക്കാട് സുരേഷ് മുഖ്യാതിഥിയായി. ദേവസ്വം അഡ്മിനിസ്ടട്രറ്റർ ഒ ബി അരുൺകുമാർ ആശംസ നേർന്നു. പ്രൊഫ വൈക്കം വേണുഗോപാൽ, വഞ്ചീശ്വര അയ്യർ, തിരുവനന്തപുരം വി സുരേന്ദ്രൻ, നെയ്യാറ്റിൻകര കൃഷ്ണൻ, നീലകണ്ഠൻ എനിവർ സംസാരിച്ചു. യോഗത്തിൽ പ്രസിദ്ധീകരണ വിഭാഗം അസി മാനേജർ കെ ജി സുരേഷ് കുമാർ കൃതജ്ഞത രേഖപ്പെടുത്തി.
