മാറോളമുയർത്തിക്കരതാരിൽകുഴലേന്തി
തൃക്കാലിണയിന്നങ്ങു പിണച്ചിട്ടതിമോദാൽ
നില്പൂ ഗുരുവായൂരിലതാ കാർമുകിൽവർണ്ണൻ
കൈകൂപ്പി വണങ്ങാം ചെവിയോർത്തങ്ങനെ നില്ക്കാം
പൊന്നിൻമകുടം കാണ്മു ശിരസ്സിൽ,പ്രിയമേറും-
പൂമാലകളുണ്ടേ, നിടിലേ ഗോപിയുമുണ്ടേ
കാതിൽ തെളിയുന്നുണ്ടിരുസൂനങ്ങൾ,കഴുത്തിൽ
പൊന്മാലകളുണ്ടേ, വനമാല്യങ്ങളുമുണ്ടേ
പൊൻകങ്കണജാലം, പുതുകൗപീനമരയ്ക്കും
കുമ്പയ്ക്കഥ ചുറ്റുന്നൊരു പൊൻകിങ്ങിണിയും ഹാ!
തൃപ്പാദമതിങ്കൽ തള,യെന്നിങ്ങനെ കാണാം
ശ്രീവായുപുരേ കണ്ണനെയിന്നങ്ങതിഭംഗ്യാ
സുസ്മേരനിലാവിൻപ്രഭ തഞ്ചുന്നൊരു ചുണ്ടിൽ
ചേർന്നങ്ങമരാനായ് കൊതിയോടെത്തിയ വംശം
ചെഞ്ചുണ്ടിലമർന്നെങ്കിലുയർന്നീടുമതിൽ നി-
ന്നൂറുംമൃദുരാഗത്തിനു കാതോർത്തുവണങ്ങാം
(വൃത്തം: മദനാർത്ത)