വായുഗേഹത്തിലെ ചന്ദനച്ചാർത്തിലി-ന്നേട്ടനോടൊപ്പമാണുണ്ണിക്കണ്ണൻ
ആനയെപ്പോൽ രാമൻ നില്ക്കുന്നു, കണ്ണന-ങ്ങേട്ടൻ്റെമേലേറിനില്പൂ ചേലായ്
മഞ്ഞപ്പട്ടാടയുടുത്തു പൊൻഭൂഷകൾ ചാർത്തിലസിക്കുന്നു രാമരൂപം
പുഞ്ചിരിതൂകുന്ന രാമൻ്റെ തൃക്കൈയിൽ വെണ്ണയുരുളയും കാണ്മതുണ്ട്
കണ്ണനോ ചെമ്പട്ടുകോണകം കിങ്ങിണി സ്വർണ്ണമാല്യങ്ങൾ, വനമാലകൾ
പീലി , മകുടം, തള, വള, കാതിൽപ്പൂ ഗോപിയും ചാർത്തിലസിപ്പു ഭംഗ്യാ
കണ്ണനിടംകരത്താലേയുറിയിലെ വെണ്ണക്കുടം ചായ്ച്ചുകാണ്മൂ മുന്നിൽ
വെണ്ണയുരുളയൊന്നുണ്ടാ വലംകൈയിൽ ഉണ്ണുവാൻ വാരിയെടുത്തതാണേ
കണ്ണൻ്റെ വെണ്ണക്കളവിൻ്റെയീ ദൃശ്യം കൺകുളിർക്കെക്കണ്ടു മോദമോടേ
തൃച്ചേവടികളിൽ വീണുവണങ്ങിടാം ഭക്തിയോടിന്നു നാമം ജപിക്കാം
കൃഷ്ണാ! ഹരേ! ജയ!കൃഷ്ണാ! ഹരേ! ജയ! രാമാ ! ഹരേ! ജയ!കൃഷ്ണാ! ഹരേ!
കൃഷ്ണാ! ഹരേ! ജയ! രാമാ! ഹരേ! ജയ! വാതാലയേശ്വരാ! കൃഷ്ണാ! ഹരേ!
( വൃത്തം: മഞ്ജരി)