ഡേറ്റിം​ഗ് ആപ്പിൽ സഹപാഠികളായ പെൺകുട്ടികളുടെ പേരിൽ വ്യാജ അക്കൗണ്ട്; മുൻ എസ്എഫ്ഐ നേതാവിന് സസ്പെൻഷൻ; യൂണിയനിൽ നിന്ന് പുറത്താക്കിയത് കേസിന് പിന്നാലെ

തിരുവനന്തപുരം: ഡേറ്റിംഗ് ആപ്പിൽ വിദ്യാർത്ഥിനികളുടെ വ്യാജ പ്രൊഫൈൽ ഉണ്ടാക്കിയതുമായി ബന്ധപ്പെട്ട് മുൻ എസ്എഫ്ഐ നേതാവിന് സസ്പെൻഷൻ. ​ഗവ ലോ കോളേജിലെ നാലാം വർഷ എൽഎൽബി വിദ്യാർത്ഥിനി എ.പി ആരോണിനേയാണ് അന്വേഷണ വിധേയമായി സസ്പെൻഡ് ചെയ്തത്.

സംഭവവുമായി ബന്ധപ്പെട്ട് ഇതേ കോളേജിലെ വിദ്യാർത്ഥിനികൾ സൈബർ സെല്ലിലും പൊലീസിലും പരാതി നൽകിയിരുന്നു. ആരോൺ പരാതിക്കാരുടെ പേരിൽ വ്യാജ അക്കൗണ്ടുകൾ നിർമിച്ച് അശ്ലീല ഫോട്ടോകളും മെസേജുകളും അയച്ചതായി പരാതിയിൽ പറയുന്നു. തുടർന്ന് സൈബർ സെൽ നടത്തിയ അന്വേഷണത്തിൽ പ്രതി ആരോൺ തന്നെയാണെന്ന് ഉറപ്പിക്കുകയായിരുന്നു.

പൊലീസ് കേസ് എടുത്ത് അന്വേഷണം ആരംഭിച്ചതിന് പിന്നാലെയാണ് ആരോണിനെ എസ്എഫ്ഐ യൂണിറ്റ് കമ്മിറ്റി പുറത്താക്കിയത്.