ചെന്നൈ: സിനിമാ ഷൂട്ടിങ്ങിനിടെ നടൻ ജോജു ജോർജിന് പരിക്ക്. ഹെലികോപ്ടറിൽ നിന്നും ചാടുന്ന രംഗം ചിത്രീകരിക്കുന്നതിനിടെയാണ് പരിക്കേറ്റത്. അപകടത്തിൽ ജോജുവിന്റെ കാൽപ്പാദത്തിലെ എല്ലിന് പൊട്ടൽ സംഭവിച്ചു. മണിരത്നം സംവിധാനം ചെയ്യുന്ന തഗ്ഗ്‌ ലൈഫ് എന്ന ചിത്രത്തിന്റെ ഷൂട്ടിങ്ങിനിടെയാണ് അപകടം സംഭവിച്ചത്.
കമലഹാസനും മണിരത്നവും നീണ്ട ഇടവേളയ്‌ക്ക് ശേഷം ഒന്നിക്കുന്ന ചിത്രമാണ് തഗ്ഗ്‌ ലൈഫ്. നേരത്തെ ദുൽഖർ സൽമാനും ചിത്രത്തിൽ അഭിനയിക്കുമെന്ന് വാർത്തകൾ ഉണ്ടായിരുന്നെങ്കിലും പിന്നീട് പിന്മാറുകയായിരുന്നു. എ ആർ റഹ്‌മാനാണ് ചിത്രത്തിനായി സംഗീത സംവിധാനം നിർവഹിക്കുന്നത്.
അതേസമയം ജോജു ആദ്യമായി സംവിധാനം ചെയ്യുന്ന ചിത്രമായ ‘പണി’ റിലീസിനൊരുങ്ങുകയാണ്. സിനിമയിൽ പ്രധാനവേഷം കൈകാര്യം ചെയ്യുന്നതും ജോജു തന്നെയാണ്. തഗ്ഗ്‌ ലൈഫ് സിനിമയുടെ പോണ്ടിച്ചേരിയിൽ നടന്ന ചിത്രീകരണവേളയിലാണ് ജോജുവിന് പരിക്കേറ്റിരിക്കുന്നത്. ഇതിനെ തുടർന്ന് സിനിമയുടെ ചിത്രീകരണം താത്കാലികമായി നിർത്തിവച്ചിരിക്കുകയാണ്.
