ഉണ്ണിമുകുന്ദനെ നായകനാക്കി അനൂപ് പന്തളം തിരക്കഥ എഴുതി സംവിധാനം ചെയ്ത ചിത്രമാണ് ഷെഫീക്കിന്റെ സന്തോഷം. ഉണ്ണി മുകുന്ദൻ തന്നെയാണ് ചിത്രം നിർമ്മിച്ചിരിക്കുന്നത്. സിനിമയിൽ ഷെഫീക്കിന്റെ അച്ഛൻ കഥാപാത്രത്തെ അവതരിപ്പിച്ചിരിക്കുന്നത് നടൻ കൃഷ്ണപ്രസാദാണ്. താരം ഇതുവരെ ചെയ്യാത്ത വേറിട്ട ഒരു വേഷമായിരുന്നു സിനിമയിലേത്. ഇപ്പോഴിതാ, സിനിമയിലെ കഥാപാത്രം ചെയ്യാൻ ഉണ്ണി മുകുന്ദൻ ക്ഷണിച്ചതിനെ പറ്റി ഓർത്തെടുക്കുകയാണ് താരം. പാടത്ത് കൊയ്ത്തു കഴിഞ്ഞ് ശോഷിച്ചു നിൽക്കുന്ന സമയത്താണ് ഉണ്ണിമുകന്ദന്റെ കോൾ വരുന്നതെന്ന് കൃഷ്ണപ്രസാദ് പറയുന്നു.
“കൊയ്ത്തു കഴിഞ്ഞ സമയത്താണ് ഉണ്ണി മുകുന്ദന്റെ ഫോൺ കോൾ വരുന്നത്. വെയിലൊക്കെ കൊണ്ട് ഞാൻ ആകെ വാടിയിരിക്കുന്ന സമയമാണ്. അപ്പോഴാണ് എന്നെ വിളിക്കുന്നത്. അച്ഛന്റെ വേഷം എന്നു പറഞ്ഞപ്പോൾ സന്തോഷമാണ് തോന്നിയത്. മേക്കപ്പ് പോലും വേണ്ട, ഞാനാകെ ശോഷിച്ച് ഇരിക്കുകയായിരുന്നു”
“വെയിൽ കൊണ്ട് മുഖം എല്ലാം വാടി പ്രായം തോന്നുന്ന രൂപത്തിലായിരുന്നു ഷൂട്ടിങ്ങിന് ചെല്ലുമ്പോൾ ഞാൻ. മേക്കപ്പ് ഇടേണ്ടി വന്നിട്ടില്ല. ഇനിയും അങ്ങനത്തെ വേഷം കിട്ടുമോ എന്നറിയില്ല. എല്ലാം ഒരു ഭാഗ്യമാണ്. കഴിവ് മാത്രം പോരാ, ഭാഗ്യം കൂടി ഒത്തു വരണം. എന്നെ ആവശ്യമുള്ളവർ വിളിക്കും. നാട്ടിൽ നിന്ന് മാറിനിൽക്കാൻ പറ്റില്ല, കൃഷിയുണ്ട്”-കൃഷ്ണപ്രസാദ് പറഞ്ഞു.
