കോഴിക്കോട്: പന്തീരാങ്കാവ് ഗാർ‌ഹിക പീഡനക്കേസിൽ വീണ്ടും യൂട്യൂബ് വീഡിയോയുമായി യുവതി. താൻ സുരക്ഷിതയാണെന്നും വീട്ടിൽ നിന്ന് മാറി നിൽക്കുന്നത് സമ്മർദ്ദം കൊണ്ടെന്നും യുവതി വീഡിയോയിലൂടെ പറയുന്നു.
ആരും തന്നെ തട്ടിക്കൊണ്ടുപോയിട്ടില്ലെന്നും യുവതി ആവർത്തിച്ചു. ചാർജർ കേബിൾ വച്ച് കഴുത്ത് ഞെരിച്ചെന്ന് പറഞ്ഞത് പച്ചക്കള്ളമെന്നും കഴുത്തിൽ ജന്മനായുള്ള പാടാണ് അതെന്നുമാണ് യുവതിയുടെ വിശദീകരണം. കൈയിലുണ്ടായ പരിക്ക് ഡാൻസ് കളിച്ചപ്പോൾ ഉണ്ടായതാണെന്നും യുവതി പറഞ്ഞു. വീണ്ടും മൊഴി നൽകാൻ യുവതി കോടതിയോട് അനുവാദം ചോദിച്ചിട്ടുണ്ട്.
തെറ്റിദ്ധാരണയുടെ പുറത്തുണ്ടായ പ്രശ്നത്തിൽ മാതാപിതാക്കൾ ഇടപെട്ട് പ്രശ്നം വഷളാക്കിയതാണ്. അച്ഛനാണ് പരാതി നൽകിയത്. കരഞ്ഞ് അഭിനയിക്കാനാണ് ഇളയച്ഛൻ പറഞ്ഞത്. സ്വന്തം ഇഷ്ടപ്രകാരമാണ് വീട്ടിൽ നിന്ന് മാറി നിന്നത്. സുരക്ഷിതയാണെന്ന വിവരം അമ്മയെ യഥാ സമയം അറിയിച്ചിരുന്നു- വീഡിയോയിലൂടെ യുവതി പറഞ്ഞു.
മകളെ കാണാനില്ലെന്ന് ചൂണ്ടിക്കാട്ടി പിതാവ് നൽകിയ പരാതിയിൽ അന്വേഷണം മെല്ലേ പോകുന്നതിനിടെയിലാണ് 47 മിനിറ്റ് ദൈർഘ്യമുള്ള വീഡിയോയുമായി യുവതി വീണ്ടും രംഗത്തെത്തിയിരിക്കുന്നത്. ആദ്യ വീഡിയോയിലൂടെ പറഞ്ഞ കാര്യങ്ങൾ ആവർ‌ത്തിക്കുന്നതിനൊപ്പം പുതിയ വിവരങ്ങളും പങ്കുവച്ചിട്ടുണ്ട്. വീട്ടുകാരെ തള്ളി, ഭർത്താവ് രാഹുലിനെ പിന്തുണയ്‌ക്കുന്നതാണ് പുതിയ വീഡിയോയും.
