തിരുവനന്തപുരത്ത് ഷവായി മെഷീനിൽ വിദ്യാർത്ഥിനിയുടെ തലമുടി കുരുങ്ങി; മുടി മുറിച്ച് രക്ഷപ്പെടുത്തി ഫയർഫോഴ്സ്

തിരുവനന്തപുരം: ഷവായ് മെഷീനിൽ വിദ്യാർത്ഥിനിയുടെ തലമുടി കുടുങ്ങി. തിരുവനന്തപുരം പാളയത്ത് നൂർമഹൽ ഹോട്ടലിലാണ് സംഭവം. നിലമേൽ എൻഎസ്എസ് കോളേജിലെ വിദ്യാർത്ഥിനി അധീഷ്യയാണ് അപകടത്തിൽപ്പെട്ടത്.

ഉച്ചക്ക് പന്ത്രണ്ടരയോടെയാണ് സംഭവം. മഴ പെയ്തതോടെ പെൺകുട്ടി കടയിലേക്ക് ഓടി കയറുകയായിരുന്നു. ഇതിനിടയിൽ കാൽ വഴുതി വീണ പെൺകുട്ടിയുടെ തല മെഷീനിൽ ഇടിച്ചു. പ്രവർത്തിച്ചുകൊണ്ടിരുന്ന മെഷീനിൽ മുടി കുരുങ്ങിയതിനൊപ്പം ഉരുകി പിടിക്കുകയും ചെയ്തു.

ഉടൻ മെഷീൻ ഓഫാക്കിയതിനാൽ വൻ അപകടം ഒഴിവായി. അപകടത്തെ തുടർന്ന് ഫയർഫോഴ്സെത്തി മുടി മുറിച്ച് വിദ്യാർത്ഥിനിയെ രക്ഷിച്ചു. കുട്ടിക്ക് മറ്റു പരിക്കുകളില്ല