തൃശൂർ : അതിരപ്പിള്ളിയിൽ വീണ്ടും കാട്ടാന ആക്രമണം. ലോറിയ്‌ക്ക് നേരെ പാഞ്ഞടുത്ത കാട്ടാന വാഹനം തകർത്തു. അതിരപ്പിള്ളി മലക്കപ്പാറ റോഡിലാണ് ആക്രമണമുണ്ടായത്. ഷോളയാർ പെൻസ്റ്റോക്ക് പൈപ്പിന് സമീപം ഇന്നലെ രാത്രി 11 മണിയോടെയാണ് സംഭവം.
കാട്ടാന ആക്രമണത്തിൽ ലോറി ഡ്രൈവർ അത്ഭുതകരമായാണ് രക്ഷപ്പെട്ടത്. മലക്കപ്പാറയിൽ നിന്ന് എറണാകുളത്തേക്ക് പോയ ലോറിയാണ് കാട്ടാന ആക്രമിച്ചത്. രാത്രി കാലങ്ങളിൽ ആനക്കൂട്ടങ്ങൾ റോഡിൽ തമ്പടിക്കാറുള്ളത് പതിവാണ്. നാട്ടുകാർ തുരത്തി ഓടിക്കാൻ ശ്രമിച്ചാലും അക്രമകാരികളായ കാട്ടാനകൾ സ്ഥലത്ത് നിന്നും പോകാറില്ല.
കഴിഞ്ഞ ദിവസം പത്തനംതിട്ടയിലെ കോന്നിയിൽ കാട്ടാനക്കൂട്ടത്തിന്റെ മുന്നിൽ നിന്നും യുവതി തലനാരിഴയ്‌ക്കാണ് രക്ഷപ്പെട്ടത്. ഇതിന്റെ വീഡിയോ സമൂഹമാദ്ധ്യമങ്ങളിലൂടെ പുറത്തുവന്നിരുന്നു. ചേങ്ങറ എസ്റ്റേറ്റ് ലയത്തിന് സമീപത്താണ് സംഭവം നടന്നത്. യുവതിയ്‌ക്ക് നേരെ പാഞ്ഞടുത്ത കാട്ടാന ലയത്തിന്റെ ഭിത്തി തകർക്കുകയും പരിസരത്തുണ്ടായിരുന്ന സാധനങ്ങൾ വലിച്ചെറിയുകയും ചെയ്തു.
