ന്യൂഡല്‍ഹി: പങ്കാളിത്ത പെൻഷൻ പദ്ധതി പരിഷ്കരിക്കാൻ കേന്ദ്ര സർക്കാർ തയ്യാറെടുക്കുന്നതായി റിപ്പോർട്ട്. അടിസ്ഥാന ശമ്പളത്തിന്റെ 50 ശതമാനം പെന്‍ഷന്‍ ലഭിക്കുന്ന തരത്തിലേക്ക് പദ്ധതിയിൽ മാറ്റം വരുത്തുമെന്നാണ് റിപ്പോർട്ടുകൾ പറയുന്നത്. സർവ്വീസിന്റെ അവസാനത്തിലുള്ള ബേസിക് പേ ആണ് മാനദണ്ഡമായി എടുക്കുക. ഇതിന്റെ പകുതി തുക പെൻഷനായി ലഭിക്കും.
2023 മാര്‍ച്ചില്‍ ടിവി സോമനാഥൻ അധ്യക്ഷനായ സമിതിയെ നിയോഗിച്ച് എന്‍പിഎസ് പ്രകാരം പെന്‍ഷന്‍ ആനുകൂല്യങ്ങള്‍ വര്‍ധിപ്പിക്കുന്നത് പഠിക്കാൻ ആവശ്യപ്പെട്ടിരുന്നു. പഴയ പെന്‍ഷന്‍ പദ്ധതിയിലേക്ക് തിരിച്ചുപോകാതെ പങ്കാളിത്ത പെൻഷൻ പദ്ധതി പരിഷ്കരിക്കുക എന്നതാണ് ലക്ഷ്യം.
ആന്ധ്രയില്‍ നടപ്പാക്കിയ എന്‍പിഎസ് മാതൃകയാക്കിയാണ് നടപടി. ഇതുവഴി അവസാന ശമ്പളത്തിന്റെ 40 മുതല്‍ 50 ശതമാനംവരെ വരുന്ന ശമ്പളം നൽകാൻ കഴിയും. പെന്‍ഷനായി സമാഹരിച്ച തുകയില്‍ കുറവുണ്ടായാല്‍ ബജറ്റ് വിഹിതത്തില്‍നിന്ന് നല്‍കാനാണ് നിര്‍ദേശം.
2004നു ശേഷം ജോലിയിൽ പ്രവേശിച്ച 87 ലക്ഷം പേർ ഈ പദ്ധതിയുടെ ഭാഗമാകുമെന്നാണ് കണക്കുകൂട്ടൽ. അതെസമയം പ്രതിപക്ഷം ഭരിക്കുന്ന സംസ്ഥാനങ്ങൾ പലതും പഴയ പെൻഷൻ പദ്ധതിയിലേക്ക് പോകുകയാണ്. അത് വോട്ടർമാരെ സ്വാധീനിക്കുന്ന സാഹചര്യവുമുണ്ട്.
ജീവനക്കാരുടെ ശമ്പളത്തിൽ നിന്നുള്ള വിഹിതവും തത്തുല്യമായ സർക്കാർ വിഹിതവും ചേർത്ത് രൂപീകരിക്കുന്ന ഫണ്ടിൽ നിന്ന് പെൻഷൻ നൽകുന്ന രീതിയാണ് പങ്കാളിത്ത പെൻഷൻ. ഈ പെൻഷൻ എത്രയെന്നത് വ്യക്തമാകില്ല ഒരു ജീവനക്കാരന്. ഈ പ്രശ്നം പരിഹരിക്കുകയാണ് കേന്ദ്രത്തിന്റെ ലക്ഷ്യം. പെൻഷൻ ഇത്രയായിരിക്കുമെന്ന് ഉറപ്പു നൽകുകയാണ് സർക്കാർ ചെയ്യുന്നത്.
