മലയാള നടന്മാരിൽ പേരു കൊണ്ടുതന്നെ ശ്രദ്ധിക്കപ്പെട്ടവരാണ് ഇന്ദ്രജിത്തും പൃഥ്വിരാജും. അധികമാരും ഇട്ടിട്ടില്ലാത്ത പേരുകളാണ് നടന്മാർക്ക് അവരുടെ മാതാപിതാക്കളായ സുകുമാരനും മല്ലിക സുകുമാരനും നൽകിയത്. ഇപ്പോഴിതാ, മക്കൾക്ക് പേരുകൾ കണ്ടുപിടിച്ചത് സുകുമാരൻ ആണെന്ന് പറയുകയാണ് മല്ലിക സുകുമാരൻ. പൃഥ്വിരാജ് എന്നും ഇന്ദ്രജിത്തെന്നും മക്കൾക്ക് പേരുകൾ ഇടാനുള്ള കാരണവും നടി വെളിപ്പെടുത്തി. മകൾ ഉണ്ടായാൽ അവൾക്കിടാനുള്ള പേരും സുകുമാരൻ കണ്ടെത്തിയിരുന്നു എന്നും ഒരു ഓൺലൈൻ മാധ്യമത്തിൽ മല്ലിക സുകുമാരൻ പറയുന്നു.
“സുകുവേട്ടൻ മക്കൾക്ക് എന്ത് പേരുകളാണ് ഇട്ടിരിക്കുന്നത് എന്ന് പലരും എന്നോട് ചോദിച്ചിട്ടുണ്ട്. അന്ന് മക്കൾക്ക് പേരിടുമ്പോൾ സുകുവേട്ടൻ എന്നോട് പറയും, ഇന്ദ്രജിത്തിനെ അറിയത്തില്ലേ, മേഘനാഥൻ എന്നും പേരുണ്ട്. രാവണന്റെ മകനാണ്. എവിടെപ്പോയാലും വിജയിച്ചു വരുന്നവൻ. എന്നിങ്ങനെയുള്ള കഥകളൊക്കെ പറഞ്ഞാണ് അദ്ദേഹം പേരിടുന്നത്. പൃഥ്വിയുടെ രാജാവ്, അതാണ് പൃഥ്വിരാജ്. മക്കളുടെ പേര് അധികം കുട്ടികൾക്ക് വരാൻ പാടില്ല എന്ന് സുകുവേട്ടന് നിർബന്ധമായിരുന്നു”.
“ഒരിക്കൽ ഞാൻ തമാശയായി പറഞ്ഞു, രണ്ട് ആൺമക്കളായത് നന്നായി. പെൺകുട്ടിയായിരുന്നുവെങ്കിൽ എന്ത് പേരിട്ടേനെ. എന്നാൽ ഒരിക്കൽ അദ്ദേഹം എന്നോട് പറഞ്ഞു ഒരു പെൺകുട്ടിയും കൂടെ ഉണ്ടായിരുന്നുവെങ്കിൽ അവൾക്ക് ഞാൻ ഗംഗ എന്ന പേരിട്ടേനെ. അതൊരു സാധാരണ പേരല്ലേ എന്ന് ഞാൻ ചോദിച്ചു. അപ്പോൾ സുകുവേട്ടൻ പറഞ്ഞു, ‘ആ നദിയിലൂടെ അതൊഴുകിപ്പോയി ഇതൊഴുകി പോയി എന്നൊക്കെ ആൾക്കാർ പലതും പറയും. എന്നാൽ ഗംഗ എന്നത് നമ്മുടെ പവിത്രമായ നദിയാണ്’. ഗംഗ എന്ന പേര് എപ്പോഴും സുകുവേട്ടൻ പറയുമായിരുന്നു. ഒരു മകൾ ഇല്ലാത്തതിൽ ചെറിയ ഒരു സങ്കടം ഇന്നെനിക്കുണ്ട്”-മല്ലിക സുകുമാരൻ പറഞ്ഞു.
