തൃശൂർ: കെഎസ്ആർടിസി ബസിൽ യാത്ര ചെയ്യുമ്പോൾ പ്രസവവേദന! ആശുപത്രിയിലേക്ക് എത്തും മുമ്പേ ബസിൽ തന്നെ പ്രസവം. എന്നാൽ ഈ സംഭവവികാസങ്ങളൊന്നുമറിയാതെ അമ്മയുടെ മാറോടണഞ്ഞ് ഇപ്പോൾ ആ കുഞ്ഞ്, തൃശൂർ അമലാ ആശുപത്രിയിൽ സുഖമായിരിക്കുന്നു. ബസിൽ പിറന്ന കുഞ്ഞിനെ കാണാൻ കെഎസ്ആർടിസി ഉദ്യോഗസ്ഥരും എത്തി. വെറും കയ്യോടെയല്ല കുഞ്ഞുടുപ്പുകളും കളി സാധനങ്ങളും നൽകിയാണ് അമ്മയ്‌ക്കും കുഞ്ഞിനും ആശംസകൾ അറിയിക്കാനായി ഉദ്യോഗസ്ഥർ എത്തിയത്. സ്‌നേഹോപഹാരം ആശുപത്രി അധികൃതർക്ക് ഉദ്യോഗസ്ഥർ കൈമാറി.
പേരാമംഗലത്ത് കെഎസ്ആർടിസി ബസിൽ പ്രസവിച്ച യുവതിയുടെയും കുഞ്ഞിന്റെയും തുടർ ചികിത്സ അമല ആശുപത്രിയും സൗജന്യമാക്കിയതായി അറിയിച്ചു. അമ്മയും കുഞ്ഞും സുഖമായി ഇരിക്കുന്നുവെന്നും രണ്ട് ദിവസത്തിനുള്ളിൽ ചികിത്സകൾ പൂർത്തിയാക്കിയ ശേഷം അമ്മയ്‌ക്കും കുഞ്ഞിനും സ്വന്തം വീട്ടിലേക്ക് പോകാൻ സാധിക്കുമെന്നും ഡോക്ടർമാർ പറഞ്ഞു.
ഇന്നലെ ഉച്ചയ്‌ക്ക് 1 മണിയോടെയാണ് ഓടിക്കൊണ്ടിരുന്ന കെഎസ്ആർടിസി ബസിൽ വച്ച് യുവതി പ്രസവിച്ചത്. തുടർന്ന് യുവതിയെയും കുഞ്ഞിനെയും തൃശൂർ അമല ആശുപത്രിയിൽ പ്രവേശിപ്പിക്കുകയായിരുന്നു.
