പെട്ടെന്ന് ഒരു ദിവസം നമ്മുടെ കുളിമുറി പാമ്പുകളുടെ താവളമായാൽ എങ്ങനെയിരിക്കും? കുളിമുറികളിൽ നിറയെ പാമ്പുകൾ ഇഴയുന്നതിനെപ്പറ്റി ഓർക്കുമ്പോൾ തന്നെ ഭയം തോന്നും അല്ലേ! എന്നാൽ അങ്ങനെയൊരു സംഭവമാണ് ഇപ്പോൾ സോഷ്യൽ മീഡിയയിൽ വൈറലാകുന്നത്. ഒരു വീട്ടിലെ കുളിമുറിയിൽ നിന്നും കണ്ടെത്തിയത് ഒന്നോ രണ്ടോ പാമ്പുകളെ അല്ലാ, 35 പാമ്പുകളെയാണ്. ഇതിന്റെ വീഡിയോയാണ് സമൂഹമാദ്ധ്യമങ്ങളിൽ പ്രചരിക്കുന്നത്.
അസമിലെ നാഗോൺ ജില്ലയിലെ ഒരു വീട്ടിലാണ് ഞെട്ടിക്കുന്ന കാഴ്ച. വീട്ടിൽ നിന്നും പാമ്പുകളെ പിടികൂടുന്ന ദൃശ്യങ്ങൾ വാർത്താ ഏജൻസിയായ എഎൻഐ-യാണ് സമൂഹമാദ്ധ്യമങ്ങളിൽ പങ്കുവെച്ചത്. മൃഗസ്‌നേഹിയായ സഞ്ജിബ് ദേക്കയാണ് വീട്ടിൽ നിന്നും പാമ്പുകളെ സുരക്ഷിതമായി പിടികൂടിയത്. നിമിഷം നേരം കൊണ്ട് ലക്ഷങ്ങളാണ് ഈ വീഡിയോ കണ്ടത്.
പാമ്പുകളെ പിടികൂടിയ ശേഷം എ.എൻ.ഐയോട് സഞ്ജിബ് ദേക പ്രതികരിച്ചു.“പാമ്പുകളുടെ സാന്നിധ്യത്തെക്കുറിച്ച് വീട്ടുടമ എന്നെ അറിയിച്ചതിനെ തുടർന്ന് ഞാൻ സ്ഥലത്തെത്തുകയായിരുന്നു. അവിടെ ധാരാളം പാമ്പുകൾ ഇഴയുന്നത് ഞാൻ കണ്ടു. വീട്ടിൽ പുതുതായി നിർമ്മിച്ച ടോയ്‌ലറ്റിലാണ് 35 ഓളം പാമ്പുകളെ കണ്ടത്. ഇവയെ പിടിച്ച് ജോയിസാഗർ ദലാനി പ്രദേശത്താണ് ഞാൻ വിട്ടയച്ചത്”-സഞ്ജിബ് ദേക പറഞ്ഞു.
