താനെ : കാറിന് മുകളിലേക്ക് ട്രക്ക് മറിഞ്ഞ് ഒരാൾ മരിച്ചു. ഇന്ന് പുലർച്ചെ താനെ ജില്ലയിലെ ഭിവണ്ടി മേഖലയിലാണ് സംഭവം. അപകടത്തിൽ അഞ്ച് പേർക്ക് പരിക്കേറ്റു. ഘാട്‌കോപ്പർ സ്വദേശി നിതിനാണ് മരിച്ചത്. 2.30-ന് മുംബൈ നാസിക് ഹൈവേയിൽ മാങ്കോലി നാക്കയ്‌ക്കടുത്താണ് സംഭവം.
നിതിൻ കിഷൻ ഭഗത്, ഓംകാർ വിശ്വറാവു, ദേവ താംബെ, വൈഷ്ണവ്, ഭാരത് ബെലോട്ട്, ഓംകാർ പവാർ എന്നിവർ ഘാട്‌കോപ്പറിൽ നിന്ന് പൂനെയിലെ അവരുടെ ഗ്രാമത്തിലേക്ക് പോവുകയായിരുന്നു. എർട്ടിഗ കാറിലായിരുന്നു ഇവർ യാത്ര ചെയ്തിരുന്നത്. ഇതിനിടെ അമിതഭാരം കയറ്റിയ ട്രക്ക് ഭിവണ്ടിയിൽ നിന്ന് താനെ റോഡ് വഴി ബെംഗളൂരുവിലേക്ക് അമിത വേഗതയിൽ വരികയായിരുന്നു.
ട്രക്ക് ഡ്രൈവറുടെ നിയന്ത്രണം നഷ്ടപ്പെട്ടതാണ് അപകടത്തിന് കാരണമായത്. ആറ് പേരെയും ഉടൻ ആശുപത്രിയിൽ എത്തിച്ചെങ്കിലും നിതിൻ മരിച്ചിരുന്നു. ട്രക്ക് ഡ്രൈവർ മദ്യപിച്ച നിലയിലായിരുന്നുവെന്നും ഇയാളെ അറസ്റ്റ് ചെയ്തിട്ടുണ്ടെന്നും പൊലിസ് പറഞ്ഞു.
