നല്ല ആവി പറക്കുന്ന ഇടിയപ്പവും കടലക്കറിയും അല്ലെങ്കിൽ ഇടിയപ്പവും മുട്ടക്കറിയും.. മലയാളികളുടെ പ്രാതലിലെ താരമാണ് ഇടിയപ്പം. ഏത് കറിക്കൊപ്പവും ചേരുന്ന വിഭവം.
സാധാരണയായി അരിപ്പൊടി ഉപയോഗിച്ചാണ് ഇടിയപ്പം തയ്യാറാക്കുന്നത്. സോഫ്റ്റായ ഇടിയപ്പം കിട്ടുകയും ചെയ്യും. എന്നാൽ നല്ല സൂപ്പർ സോഫ്റ്റായ ഇടിയപ്പം ഉണ്ടാക്കിയാലോ? അതും ഗോതമ്പുപ്പൊടി ഉപയോഗിച്ച്? റെസിപ്പി ഇതാ..
ചേരുവകൾ
ഗോതമ്പ് പൊടി – ഒരു കപ്പ്
തിളച്ച വെള്ളം – ആവശ്യത്തിന്
ഉപ്പ് – ആവശ്യത്തിന്
നെയ്യ് – 1 ടീസ്പൂൺ
തേങ്ങ ചിരകിയത് – ഒരു കപ്പ്
തയ്യാറാക്കുന്ന വിധം
ഗോതമ്പ് പൊടി ചെറിയ തീയിൽ വറുത്തെടുക്കുകയോ ആവിയിൽ 10 മിനിറ്റ് വേവിക്കുകയോ ആണ് ആദ്യം ചെയ്യേണ്ടത്. ചൂടാറിയ ശേഷം ആവശ്യത്തിന് ഉപ്പ് ചേർത്ത് തിളച്ച വെള്ളം ഒഴിച്ചൊഴിച്ച് കുഴച്ചെടുക്കുക. ഇതിനിടെയിൽ അൽപം നെയ്യ് കൂടി ചേർത്താൽ ഇടിയപ്പം സോഫ്റ്റാകും.
ഈ മാവ് സേവനാഴിയിൽ നിറച്ച് ഇഡ്ഡലി തട്ടിൽ ചുറ്റിച്ചെടുക്കുക. തേങ്ങ ചിരകിയത് കൂടി ചേർത്താൽ രുചിയേറും.
