ചിരിപ്പൂരവുമായെത്തി മലയാളി പ്രേക്ഷകരെ ആവേശം കൊള്ളിച്ച ചിത്രമാണ് ഫഹദ് ഫാസിൽ പ്രധാന കഥാപാത്രമായ ആവേശം. ചിത്രത്തിന് വലിയ ജനപ്രീതിയാണ് ലഭിച്ചത്. ഇപ്പോഴിതാ, ചിത്രത്തിനെ പ്രശംസിച്ച് രംഗത്തെത്തിയിരിക്കുകയാണ് ബോളിവുഡിന്റെ പ്രിയതാരം വരുൺ ധവാൻ. എല്ലാ സിനിമാപ്രേമികളും ആവേശം കാണണമെന്നും എല്ലാവർക്കും ഈ ചിത്രം ഇഷ്ടപ്പെടുമെന്നും വരുൺ ഇൻസ്റ്റഗ്രാമിൽ കുറിച്ചു.
ഫഹദിന്റെ ചിത്രവും വരുൺ ഇൻസ്റ്റഗ്രാമിൽ പങ്കുവച്ചിട്ടുണ്ട്. ജാൻവി കപൂറിനൊപ്പം ബവൽ എന്ന ചിത്രത്തിലാണ് വരുൺ ധവാൻ അവസാനമായി അഭിനയിച്ചത്. ബോളിവുഡ് നടന്റെ ഇൻസ്റ്റാപോസ്റ്റിന് പിന്നാലെ നിരവധി പേരാണ് ചിത്രത്തെയും ഫഹദ് ഫാസിലിനെയും പ്രശംസിച്ച് രംഗത്തെത്തിയത്.
ജിത്തു മാധവന്റെ സംവിധാനത്തിലൊരുങ്ങിയ ചിത്രമാണ് ആവേശം. മൂന്ന് കോളേജ് വിദ്യാർത്ഥികളുടെയും ഇവർക്ക് സഹായെത്തിനെത്തുന്ന ലോക്കൽ ഗുണ്ടയുടെയും കഥയാണ് ചിത്രത്തിലൂടെ പ്രേക്ഷകർക്ക് മുന്നിലെത്തുന്നത്. സീനിയേഴ്സിന്റെ റാഗിംഗിൽ നിന്ന് രക്ഷനേടാൻ രംഗൻ എന്ന ലോക്കൽ ഗുണ്ടയെ ആശ്രയിക്കുന്നതും തുടർന്നുണ്ടാകുന്ന പൊല്ലാപ്പുമാണ് ചിത്രം പറയുന്നത്.
ആഗോളബോക്സോഫിൽ 150 കോടിയാണ് ചിത്രം സ്വന്തമാക്കിയത്. തികച്ചും വ്യത്യസ്തമായ കഥാപാത്രമായാണ് ഫഹദ് ചിത്രത്തിലെത്തിയത്. രോമാഞ്ചത്തിന് ശേഷം ജിത്തുമാധവൻ സംവിധാനം ചെയ്ത ചിത്രം കൂടിയാണ് ആവേശം.
