ന്യൂഡൽഹി : ഗുരുവായുർ ദേവസ്വം ബോർഡ് മുൻ അഡ്മിനിസ്ട്രേറ്ററും ഐ എ എസ് ഉദ്യോഗസ്ഥനുമായ കെ.എൻ. സതീഷ് (62) അന്തരിച്ചു. ഡൽഹി ചാണക്യപുരിയിലെ സ്വകാര്യ ആശുപത്രിയിലായിരുന്നു അന്ത്യം.
തലശ്ശേരി കുന്നത്ത് നല്ലോളി കുടുംബാംഗമാണ്. വിരമിച്ച ശേഷം എറണാകുളത്ത് എളമക്കരയിലായിരുന്നു താമസം. തിരുവനന്തപുരം, കാസർകോട് കലക്ടർ, ശ്രീപത്മനാഭസ്വാമി ക്ഷേത്രം ഭരണസമിതി ചീഫ് എക്സിക്യൂട്ടീവ് ഓഫിസർ, ഗുരുവായൂർ ദേവസ്വം ബോർഡ് അഡ്മിനിസ്ട്രേറ്റർ, ടൂറിസം ഡയറക്ടർ, റജിസ്ട്രേഷൻ ഐജി, പാർലമെന്ററി അഫയേഴ്സ് സെക്രട്ടറി, സപ്ലൈകോ എംഡി തുടങ്ങിയ പദവികൾ വഹിച്ചിട്ടുണ്ട്.
തഹസിൽദാറായി റവന്യു വകുപ്പിൽ ജോലിയിൽ പ്രവേശിച്ച അദ്ദേഹം ഗവൺമെന്റ് സെക്രട്ടറിയായാണ് വിരമിച്ചത്. 2004ലാണ് ഐ എ എസ് ലഭിച്ചത്. വിശ്വഹിന്ദു പരിഷത്ത് സംസ്ഥാന ഗവേണിംഗ് കൗൺസിൽ അംഗമായിരുന്നു. രമയാണ് ഭാര്യ. മകൾ : ഡോ. ദുർഗ, മരുമകൻ : ഡോ. മിഥുൻ ശ്രീകുമാർ. നിര്യാണത്തിൽ മുഖ്യമന്ത്രി പിണറായി വിജയൻ അനുശോചനം രേഖപ്പെടുത്തി.
