ഗുരുവായൂർ : മമ്മിയൂർ അയ്യപ്പ ഭക്ത സംഘത്തിന്റെ ആഭിമുഖ്യത്തിൽ ദേശ വാസികളുടെ കൂട്ടായ്മയോടെ മമ്മിയൂർ ശ്രീ മഹാദേവ ക്ഷേത്ര സന്നിധിയിൽ നടത്തിവരുന്ന ചരിത പ്രസിദ്ധമായ 66-ാമത് ദേശവിളക്കും അന്നദാനവും 2022 ഡിസംബർ 10-ാം തിയ്യതി ശനിയാഴ്ച വിപുലമായ പരിപാടികളോടെ ആഘോഷിക്കുകയാണ്.
ശനിയാഴ്ച കാലത്ത് 4 മണിക്ക് നിർമ്മാല്യ ദർശനത്തോടെ ദേശവിളക്കിനോടനുബന്ധിച്ച പരിപാടികൾ ആരംഭിക്കും. കാലത്ത് 5 മണിക്ക് കേളി, 6 മണിക്ക് മമ്മിയൂർ ഭഗവതി ക്ഷേത്രത്തിൽ നിന്ന് എഴുന്നള്ളിപ്പിന് ശേഷം പട്ടിശ്ശേരി മങ്ങാട്ട് വീട്ടിൽ ഗോവിന്ദൻ നായർ സ്മാരക വിളക്കു സംഘം ഗുരുസ്വാമി ശ്രീ ഗോവിന്ദൻകുട്ടി വിളക്കു പന്തലിൽ പ്രതിഷ്ഠാകർമ്മം നിർവ്വഹിക്കും. തുടർന്ന് പുഷ്പാഭിഷേകം നടക്കും. കാലത്ത് 7 മണിക്ക് ഗുരുവായൂർ കൃഷ്ണകുമാർ & പാർട്ടിയുടെ അഷ്ടപദി, 9 മണിക്ക് ഗുരുവായൂർ മുരളി & പാർട്ടിയുടെ നാദസ്വരകച്ചേരിയും 10 മണിക്ക് ശ്രീഹരി ഭജൻ സംഘം തൃശൂർ അവതരി പ്പിക്കുന്ന (ടി.എസ്.കൃഷ്ണമൂർത്തി & ടി.എസ്. ശങ്കരരാമൻ) ഭക്തിമലർ (ഭജന ഗാനങ്ങൾ) ഉണ്ടായിരിക്കുന്നതാണ്.
വൈകീട്ട് ദീപാരാധനക്കുശേഷം ഗുരുവായൂർ ക്ഷേത്രം കിഴക്കെ നടയിൽ നിന്ന് ഗജവീരന്മാർ, താലപ്പൊലി, കേരളത്തിലെ പ്രശസ്ത പഞ്ചവാദ്യ കലാകാരന്മാർ പങ്കെടുക്കുന്ന പഞ്ചവാദ്യത്തോടും നാദസ്വര മേളത്തോടും കൂടി പാലക്കൊമ്പ് എഴുന്നള്ളിക്കും. വിളക്കു പന്തലിൽ വൈകീട്ട് 7 മണിക്ക് ശ്രീ ജി കെ പ്രകാശ് & പാർട്ടിയുടെ സമ്പ്രദായ ഭജനയും, രാത്രി 10 മണിക്ക് ശാസ്താം പാട്ടും തുടർന്ന് പാൽകുടം എഴുന്നള്ളിപ്പ്, കനലാട്ടം, തിരി ഉഴിച്ചിൽ എന്നീ ചടങ്ങുകളും നടക്കും.
ദേശവിളക്ക് ദിവസം മമ്മിയൂർ ക്ഷേത്രത്തിൽ നിറമാല, ചുറ്റുവിളക്ക്, വിശേഷാൽ പൂജകൾ എന്നിവ ഉണ്ടായിരിക്കും.
അന്നേ ദിവസം ക്ഷേത്രത്തിൽ വരുന്ന പതിനായിരക്കണക്കിന് ഭക്ത ജനങ്ങൾക്ക് രാവിലെയും, ഉച്ചക്കും, രാത്രിയും വിപുലമായ രീതിയിൽ അന്നദാനം ഒരുക്കിയിട്ടുണ്ടെന്ന് മമ്മിയൂർ അയ്യപ്പ ഭക്തസംഘം പ്രസിഡന്റ് ഒരതീഷ്, ദേശവിളക്ക് ആഘോഷസമിതി ചെയർമാൻ കെ.കെ. ഗോവിന്ദദാസ്, ജനറൽ കൺവീനർ അനിൽകുമാർ ചിറക്കൽ, അന്നദാന കമ്മിറ്റി ചെയർമാൻ അരവിന്ദൻ പല്ലത്ത്, രാജഗോപാൽ മുള്ളത്ത്, രാമചന്ദ്രൻ പല്ലത്ത്, പി.സുനിൽകുമാർ, ഗോപൻ ടി.എസ്, നന്ദകുമാർ വാറാട്ട് എന്നിവർ അറിയിച്ചു.
